1, 2. Urukamtai Jehová ipiatmaitiajnia aintsait?

 Amesha Jehová itiur enentaimtam tu aninmainiakuisha warintiak aimkiaintiam? Jehovaka amikruiti, aparuiti tura Yuusruiti tu timiniapitmea turutskesha ni urukuit nui enentaimsam warinkish timiniaitme. Tumaitkiusha winia ipiataka Jehovayaiti timiniashitiam?

² Aents ni jeen ipiamu asar taarmatai shiir amajniua aintsan Jehovasha nin enentaimtuiniana nuna shiir amajniuiti David tu timiayi. “Maa, Uunt Yusá, Ame Shiir Awajtai̱ Je̱e̱mincha ¿yaki pujusaint? Ámin akantúkma náintrumincha ¿ya pujusminiait?” David tu timiayi (YKan. 15:1). Nu chichamka Jehová ni amikri arat tusa Jehová ni jeen ipiatmaitiajnia aintiakuiti tusa tawai. Nuka ti penkeraiti.

JEHOVÁ AKMAKMARIN IPIAMU AINTSAITJI

3. a) Jehová yana emka ipiamia? b) Maimtaik itiura enentaimiarmia?

³ Jesusan najanchamiania nuinkia Jehová ninki pujuyayi tura arum Jesusan najanamiayi. Jesuska Jehová akmakmarin emka ipiamuyania aintsauyayi. Jehovaka Jesús nijiai puja asamtai ti shiir enentaimmiayi. Nuya Jesussha aparijiai puja asa ti waras pujumiayi tawai Yuusa chichame (Neka. 8:30).

4. Jehovasha yana ni akmakmarin ipiana ainis chikichnasha ipiawarmia?

⁴ Tsawan nankaamaki weakui Jehová ni suntarincha najankamiayi tura nisha Jehová akmakmarin waniawarat  tusar ipiawarma ainis armiayi. Yuusa suntarinkia Yuusa uchiri ainiawai tura Yuusjai pujuiniak shiir enentaimmiarmiayi tawai Yuusa chichame (Juup 38:​6, 7; Tan. 7:10). Uwir uwir nayaimpiniam matsamiarmiania aya nuke Jehová amikrinkia armiayi. Nuyasha tsawan nankaamaki weakui Jehová aentsun najanamiayi. Aentsun najana aentscha amikiur ajasarat tusa ni akmakmarin awayana aitkiamiayi. Enoc, Noé, Abrahán Jobsha nui wayainia ainis armiayi. Anairajnia nuna Yuus papiikia chikichkimias Yuus wakeramun turin asar Yuusa amikri armiayi tawai (Gén. 5:24 TNM; 6:9; Job 29:4 TNM; Isa. 41:8).

5. Isekiár 37:​26, 27 tana nuna wari nekaamniaitiaj?

⁵ Tsawan nankaamaki weakui chikich amikrincha ni akmakmarin waniawarat tusa ipiana ainis turimiayi. Isekiár 37:​26, 27 (aujsata) aujmatna nu nekaatai, nuinkia Yuus nin enentaimtuiniana nuka ni amikri asar warasarat tusa wakerawai tu tawai. Penker shiir pujuarat tusan chichaman najanattajai Jehová tu timiayi. Nu chichamka nayaimpiniam tuke iwiaku pujuartatna nu tura ju nunkanam tuke iwiaku pujuartatna nusha chikichkia aintsar Jehová jeen wayainia ainis artinian timiayi (Juaṉ 10:16). Nu chichamka yamai timiatrusan uminniawai.

TUINSHA PUJAJNIA NUI JEHOVÁ PENKER WAITMAJI

6. a) Yuusai sumameakur urukniuitiaj? b) Jehová akmakmarin tajinia nusha tuin aa?

⁶ Yaunchukka yumi yutakui ajamkatai tusar tura ayampratai tusar akmau armiayi. Yaksha Israel aents chikich akmakmanum waniamtainkia shiir awajin armiayi. Yuusru tuke umirkatjame tusar Yuusai sumameakur Jehová ni akmakmanum wayajnia aintsaiti (YKan. 61:4). Tuma asar Jehová ayurtameajnia aintsan ni chichamen ti penker jintintramniuitji. Nuyasha chikich aentsjai Yuusan umirainiajai shiir nawamnainiaitji. Jehová akmakmarin tajinia nusha tuin aa? Jehová akmakmari tajinia nuka nekas akmakman achiakeawai tusar ainis tatsuji, antsu Jehovan umirainia tuinsha pujuiniaksha Jehová akmakmarin pujuinia ainis ainiawai. Yaja nunkanam uunt tuakmanum pachinkiatai tusar wearuka nuka nekas aintsaiti tu tiniu ainiawai (Apu. 21:3).

7. Jehovan umirkaru jakaru ainiana nusha Jehová akmakmarin pachitkia ainiawai urukamtai ainis taji? (Nakumkamusha iista).

 ⁷ Jehová umirkarmiania nu jakaru ainiana nusha Jehová akmakmarin pachitkia ainiawak? Ee, nisha nui pachitkia ainiawai. Urukamtai ainis taji? Jehovajai iismaka nu aentska iwiaku ainiawai tawai Yuus papii. Jesús junis timiayi: “Tura jákaru nantakiartin ainia nuna imia Muisais jintíamiayi. Warí, numichiniam ji wajái̱ keamunan Yus niji̱a̱i̱ chichaamun Yus Papinium Muisaiska áarmiayi. Nú aarmanum Uunt Yus Aprajáma, Isaka tura Jakupu Yúsri̱nti, tímiayi. Nú aishmaṉ yaunchu jákaru ai̱ṉ ‘ni Yúsri̱nti’ tímiayi. Nuna taku nantaktin awai tu jintíamiayi. Kame jaka meṉkakatniunam pujuinia nuna Yúsri̱nchuiti. Tuma asamtai jakáa Yúsri̱nti tíchamniaiti. Antsu iwiaaku ainia nuna Yúsri̱nti. Ashí Níniun iwiaarkainiawai tímiayi” (Ruk. 20:​37, 38).

JEHOVASHA ITIUR YAINMAJ TURA IISHA WARI ITIURKATNIUITIAJ

8. Ni akmakmarin puja asakrin Jehovasha itiur yainmaj?

⁸ Akmakmanumka yumi yutakui ajamkamniaitji tura nui ayampramniaitji. Aintsan Jehová akmakmari tajinia nui pujakur tunaanum iniararain tusa Jehová penker waitmaji tura uruma nui atatna nui enentaimsar kakartatji. Jehovajai pujakrinkia iwianchkia ti itiurchat amajtamsashminiaitji (YKan. 31:23; 1 Juaṉ 3:8). Shiiram nunkanmasha tunaanum iniararain tusa Jehová penker waitmaktatji nuyasha jakatniunmayasha uwemtikramprattaji (Apu. 21:4).

9. Iisha Jehová akmakmarin tajinia nui pachitkia atai takurkia wari itiurkatniuitiaj?

⁹ Jehová akmakmarin puja asar ni amikri ajasminiaitji, nuka ti penkeraiti. Iisha Jehová akmakmarin tajinia nui pachitkia atai takurkia wari itiurkatniuitiaj? Yaksha ni jeen ipiatmainiakrin sapatrum ukuinkiata turamainiakrin iikia pachitsuk umiktatji. Aintsan Jehová akmakmarin pachitkia atasar Jehová warinia turawarat tusa wakera nu nekaatniuitji. Jehová anea asar ii najaneajnia nujai ni waramtiksattsar wakeraji (Col. 1:10 TNM). Jehovaka ii amikriyaiti tura ii Yuusrinti, ii aparinti tuma asa arantuktiniaitji (Sal. 25:14 TNM). Jehová ti nankaamakua nu penke kajinmatkishtiniaitji. Jehová aranta asar yajauchia nu najanashtatji tura nankaamantu enentaimtumaschattaji (Mik. 6:8).

ASHI ISRAEL AENTSUN PENKER WAINKIAMIAYI

10, 11. Jehovaka mashiniun metekrak wainniuiti urukamtai ainis taji?

¹⁰ Ni akmakmarin pachitkiatinkia Jehovaka metekrak iirmaitji (Rum. 2:11). Israel aents Sinaí nunkanam kampuntin atsumiania nui Jehová itiurkamia nu nekaatai.

¹¹ Israel aents Egiptonmania jinkiarmiania nui sacerdote ajasar Yuus enentaimtustai tusar akmakmanum yaimkiarat tusa Jehová warumchiniak anaikiamiayi. Nuyasha Leví aentsun nuisha yaimkiarat tusa anaikiarmiayi. Nui takakmarmia nuna tura chikich nui ayamach matsamiarmiania nuna nankaamasash Jehová wainmia? Atsaa. Jehová Israel aents armiania nunaka mashiniun penker wainmiayi.

12. Jehová Israel aentsun mashiniun penker wainkiartasa itiurkamia? (Jíinkiarma 40:38; nakumkamusha iista).

 ¹² Israel aents pujuarmiania nuinkia warinmansha yaimkiat tusar anaikiachmaitkiusha turutskesha Yuus enentaimtustai tusar akmakma amiania nui aran pujuiniaksha tijiuch pujuiniachkusha mashiniu Jehová amikri arminiuyayi. Yuus enentaimtustai tusa akmakma amiania nui yurankim tura ji kea wajai amiania nuna ashi Israel aents iisarat tusa Jehová ainis apujsamiayi (Jíinkiarma 40:38 aujsata). Ainis asamtai yurankim wean aran pujuiniasha wainkiar nisha weartasa iwiarnararminiuyayi (Wek. 9:​15-23). Nuyasha weartai tusar trompetan umpuiniakui ashi Israel aents antukarminiuyayi (Wek. 10:​1-10). Yuus enentaimtustai tusar akmakma amiania nui tijiuch pujuarmiania nuke Yuusa amikrinkia acharmiayi antsu ashi Israel aents Jehová amikri arminiuyayi tura Jehovasha ashi Israel aentsun penker wainmiayi. Yamaisha aintsan tuinsha pujakrincha Jehovaka anenmaji tura penker waitmaji.

YAMAIYA JUISHA JEHOVÁ ASHI AENTSUN METEKRAK ENENTAIMTAWAI

13. Yamaiya juisha Jehovaka mashiniun penker wainiawai urukamtai ainis taji?

¹³ Estados Unidosnum Warwicknium Betel ana nui tura chikich Betel irunna nui ayam pujuiniasha tura nuin takakmainiasha iruneawai. Nui takakmainia warinmansha Jehovanun yaimiainiawai tura Testigos de Jehová takatrin irunturar chichampruiniana nujaisha tura chikitcha anairamu ainiana nujaisha shiir amajnaisarminiaiti. Tura chikichkia wekas iikratin ainiawai nuyanchuka warinmansha Jehovanun nukap yaimkiarat tusar anairamu ainiawai. Tumaitkiusha mashikia nui yaimkiacharminiaiti. Ainis asamtaisha Jehovaka mashiniun ti penker  wainiawai (1 Pit. 5:7). Yuuska niniu ainiana nunaka mashiniun chikichkimias ni chichamejai penker jintintiainiawai nuyasha warinmansha penker wainkiartatui.

14. Jehovaka ashi aentsun shiir enentaimta asa itiurkait?

¹⁴ Ashi aents nekarawarat tusa wakera asa Jehovaka ni chichamen chikich chichamjaisha aamtikraiti. Yuusa chichamenka hebreo, arameo tura griego chichamjaisha aantramiayi. Nu chichamjai Yuus papii aarman takakainiana aya nukeash Yuusa amikri ainia? Atsaa (Mat. 11:25).

15. Ashi aentsun Jehovaka shiir enentaimtiniaiti urukamtai ainis taji? (Nakumkamusha iista).

¹⁵ Aya unuimiaru ainiana nunak turutskesha hebreo, arameo nuya griego chichaman nekainiana nuke Jehová amikri ainiatsui. Jehovaka unuimiaru ainiana nunak ni nekatairin suatsui. Antsu unuimiarcha ainiakuisha ni nekatairinkia suwiti. Ni chichamenka untsuri chichamnum aarmaiti tuma asamtai ashi aents ni jintinkrateana nuna nekaawarminiaiti tura ni amikrisha ajasarminiaiti (2 Ti. 3:​16, 17).

JEHOVÁ AKMAKMARIN PUJAJNIA NUNIA JINKICHARTAI

16. Jehová akmakmarincha yaki waniawarminiait? (Túramuri 10:​34, 35).

¹⁶ Jehová akmakmarin pujustinkia ti penkeraiti. Ninkia ti tsanka anenkratin asa shiir amajtamniuitji. Ninkia unuimiaru, unuimiarchancha, chikich nunkanmania ainiakuisha, aishman, nuwankesha, uchi, uuntnasha, mashiniun metekrak shiir amajniuiti. Ni akmakmarin waniainianka aya umirtukarat tusa wakeriniaiti (Túramuri 10:​34, 35 aujsata).

17. Chikich atsakamutincha wari nekaattaj?

¹⁷ Yus Kanta 15:1 nui David junis timiayi: “Maa, Uunt Yusá, Ame Shiir Awajtai̱ Je̱e̱mincha ¿yaki pujusaint? Ámin akantúkma náintrumincha ¿ya pujusminiait?” tu timiayi. Arusan nu anintramunka ninki aimkiamiayi. Jehová jeen waniar pujustai takurkia wari itiurkatniuitiaj nuka chikich atsakamu nekaattaji.