Bélgica nunkanam Bastoña matsatkamu ana nuni tijiuch Noville irutkamu awai. Nui 22 de diciembre 1929 uwitin akiniamiajai. Aparu nunken pujusan tsakarmiajai. Nui puja asan warasan pujumiajai. Yatsur Raymondjai tuke tsawan waaka muntsuri ijiur wemiaji tura warinkisha juuktin akuinkia nuisha yain wemiaji. Irutkamunmanka mai yainiai aja wemiaji.

Winia aparka Emile naartiniuyayi tura nukurka Alice naartiniuyayi. Winia apar nukurjainkia católico asar tumintin taamtsuk misanam weu armiayi. 1939 uwitin Inglaterranmaya precursor ainia ii irutkamurin tarmiayi. Taar winia aparun papii Consolación naartinian susarmiayi tura tuke surusat tusam wakeramek tusar aniasarmiayi (nu papiikia yamaikia ¡Despertad! tutainti). Winia aparka Yuusa chichamen penker jintinkratainian nekaama Yuusa chichamen unuimiartinian juarkimiayi. Winia apar misanam wetinian iniaisamtai ii irutkamurinia aents ti kajerkatniun nankaamawarmiayi. Misanam urukamtai weatsum tusar warinkisha tiarmiayi. Tuma asamtai aparun nukape jiakarmiayi.

Wi iimmianum aparun jiainiakui ti najaimiakmiajai. Tuma asan aujmattsattsan juareakun Yuusan seamiajai tayaitiajna nunaka ainis nekapea asan seamiajai. Aents winia aparun kajeriarmiania nuka tutu yawetkiar iniaisarmatai Jehovaka nekas ii seamun antiniaiti tu enentaimsamiajai.

Alemania nazinmaya aents 10 de mayo 1940 uwitin Belgicanam wayawarmiayi. Turawarmatai aents nui pujuiniaka pisararmiayi. Iikia Francia nunkani wemiaji. Jintia wesar Alemanianmaya suntar Francianmaya suntarjai maaniniamunmani nankaamakmiaji.

 Ii jeen waketkir jeamiajnia nui waya tukamar aents wayawar mash jukiaruyayi. Aya ii yawai Bobbie naartin juakuyayi. Nu nankaamasmatai urukamtain mesetcha tura itiurchatcha irunea tu enentaimsamiajai.

Ainis nankaamakrin ii yachi Emile Schrantz a ti nukap yainmakmiaji. Ninkia uuntri anaikiamu tura precursor anaikiamuyayi. Urukamtai waitiaj nuna Yuusa chichamejai jintintramamiaji tura wisha nekaattsan wakerimiajnia nusha jintintruamiayi. Nuyanka Yuuska nekas anenkratniuiti tu enentaimsamiajai.

Mesetka amuwatsain ii yachijiai wainniaikiar aujmattsamniauyaji. Agosto 1943 uwitin ii yachi José-Nicolas Minet Yuusa chichamen jintinkratattsa ii jeen tamiayi. Yuusa chichame jintinkrata amuak ya imiantiasa wakera tu anintrusmiayi. Tu anintrusmatai winia aparjai ewej takuimiaji. Turawakrin ashints amiania nui imianmiaji.

Diciembre 1944 uwitin Alemanianmaya suntar Europa occidental nui maanimiayi. Nui maaniamunka Batalla de las Ardenas tu anaikiarmiayi. Ii jeen ayamach maaninia asarmatai iikia ii jeen chikichki nantu nunka wayar pujumiaji. Tanku takumiajnia nuna ayurawartasan jinkiai ii nunken tijiuch ipiatainiak ii jeen ayam jeach amiania nuna teerin tukuar emesrarmiayi. Jeach amiania nui ayam suntar Estados Unidosnumia nunka inianta turutmiayi. Turutkui tsekenki wena ni pujamunam ayam tepesan juakmiajai. Turamtai casco etsenkrakman mukrui etsenmamtikrurmiayi.

Meset amukamtai ii yachi ii umai Lieja matsatkamunam pujuiniajai nekanaiyawarmiaji. Lieja matsatkamuka arakani 90 kilómetros jeastatuk nui amiayi. Bastoñanam pujusar warumchik aents Yuusa chichame iruntrar unuimiatratin juarkimiaji. Kuit umushtainiam takakmastinian juarkimiajai. Takakmayatnak chichaman iwiarin ajastasan unuimiatramiajai tura urum notarionam papii ain takakmamiajai. 1951 uwitin uunt tuakma Bastoñanam najanamiaji tura nuinkia 100 aents iruntrarmiayi. Elly Reuter ninkia precursora anaikiamuyayi. Uunt tuakmanum jeattsa 50 kilómetros timianu aran bicicletajai tamiayi. Wakerunaiya asar nuatnaikiatai  timiaji. Ellynkia Estados Unidosnum Escuela de Galaad nui pachinkiat tusa ipiawaruyayi. Elly pachinkiachminiaitjiash tumainti tusa papiin aar akupkamiayi. Ii yachi Knorr Testigos de Jehová takatrin chichamprin asa papii aar akupkamun ayak ukunmatai aishrumjai nuinkia pachinkiamniaitme tu aar akuptukmiayi. Febrero nantu 1953 uwitin nuatnaikiamiaji.

Nu uwitinin nuarjai uunt tuakmanum Sociedad del Nuevo Mundo tamanum pachinkiamiaji. Nunaka Nueva Yorknum nakurutai amiania nui najanawarmiayi. Nui Yuusnumia yatsur takat awai tusa ujatkamiayi. Jui tame takakmaitia tusa ipiatamiayi. Yuus sear ni ipiatmamiajnia nuka nakitramiaji. Ainis turar ataksha Belgicanam jear Bastoñanam warumchik ii yachi ii umai matsamiarmiania nu yaintai tusar wemiaji. Chikichik uwi nankaamas ii uchiri Serge akiniamiayi. Tumaitkiusha siete nantuchik pujus jakamiayi. Yuus seakur ti kuntuts nekapmiajnia nu ujakmiaji. Ninkia uruma nui nantaktin atatna nujai ikiakatmarmiaji.

Octubre 1961 uwitin ti nukap takakmaschatniun takatchin waitmakmiajai. Ainis takakma asan precursor ajasmiajai. Tumaitkiusha nu tsawantinin yatsur sucursal Belgican nuna chichamprin untsurkamiayi, Siervo de Circuito ajaschamniakaitiam tusa anintsamiayi (Siervo de Circuito nuka yamaikia wekas iikratin tutainti). Wi ayakun emka precursor ajaschamniakaitiaj tu timiajai. Ainis tiniu asamtai, ee ame tamena nu turata turutiarmiayi. 8 nantu nankaamas septiembre 1962 uwitin wekas iikratin ajasat tusa ipiatawarmiayi.

Jimiara uwi nankaamas Betel Bruselasnum nui yaimkiat tusa ipiatmawarmiaji. Octubre 1964 nu uwitin nui yaimkiatin juarkimiaji. Nui yaimiakrin Jehová ti penker takatan amasmiaji. 1965 uwitin Belgicanam Betelnum ii yachi Knorr tamiayi tura nui Betelnum chichamprin ati tusa anaitiukarmiayi. Arum nuarjai metek Galaadnum pachinkiarat tusar ipiatmawarmiaji. Clase 41 nui pachinkiamiaji. Yatsur Knorr timiania nuka 13 uwi nankaamasu ai uminkiamiayi. Nu unuimiatainmaya jinkir ataksha Betel Belgicanam waketkimiaji.

Europa nunkanam tura chikich nunkanmansha abogado asan testigos de Jehovanu chichaman chichampruktinian yaimkiaitjiai (Filip. 1:7 TNM). Ainis yaimiakun testigos de Jehová etserkarain tusar nakitiainiamunmaya naamkarujai aujmattsaitjiai. Nijiai aujmatainiakun unuimiaruitjiai tusan nuna auj wechamiajai antsu wikia Yuusan enentaimtiniaitjiai tu tiniuyajai. “Uunt Yuska akupniu enentái̱nkia entsa akatai̱ya̱ áitkiaraiti. Tuma asa Ni wakera núnaka tímiatrusaṉ umimtikniuiti” Yuus papii ainis tawai. Nuna neka asan Jehová yainkiata tusan tuke sea wemiajai (Neka. 21:1).

Parlamento Europeo nui takakmajai aujmattsamiajna nuna aujmattsattajai. Nijiai aujmattiasan nukape seamiajai tura aujmattsatai turutmiania  nuinkia amijiainkia 5 minutoschik aujmattsattajai tu turutmiayi. Tsuntsuman Yuusan seamiajai. Urukamtai ainiam? turutmiayi. Pankai chicharkun ameka Yuus apujsamu asakmin Yuusan yuminkiajai tu timiajai. Wari tame? tu turutmiayi. Rúmanam 13:4 nuna iniaktusmiajai. Ninkia protestante asa nuna iniaktusan enentaimias juakmiayi. Ainis turamtai media hora nijiainkia penker aujmattsamiaji. Ii Yuusa chichame etsereajnia nuna shiir iiyajai tu timiayi.

Europanmanka testigos de Jehová ainiana nu ju nunkanam warinkisha najantai irunainia nui pachinchaitji tusar ayamprumainiak chicham iwiartainiam nukape wearuiti. Uchirtin ainiana nu chichaman inkiunkarmatai turutskesha warinkish akikmaktin irunna nui chicham wainkiar nusha iwiaraitji. Ainis nankaamamunam nukape yaimkiaitji tura Jehová nupetmaktinian itiur yainmakuitiaj nuna paant nekaitjiai. Testigos de Jehovatikia Tribunal Europeo de Derechos Humanos nui 140 timianu chicham inkiunkar nupetmakuitji.

Cubanmaya testigos de Jehová ainia Yuusa chichame etserkarain tusar suritkiaru asarmatai ni yaintai tusar chichamprimiaji. Sede Mundialnumia Philip Brumleyjiai nuya Italianmaya Valter Farnetijiai nijiai chichamprukmiaji. 1990 uwi nankaamaki ainis takakmasmiaji. Bélgica nunkanam Embajada de Cuba ana nui papii aaran akupkamiajai. Urum nunia aentsjai iijiai chichastiniuya nujai iruntramiajai. Ii najaneajnia nuka yajauchichuiti tusar iwiarattsar wakerimiaji tumaitkiusha yama nankamtaikkia chicham amiania nuka iwiarachmiaji.

Ainis amunam pujakrisha Cuba nunkanam 5 mil Yuus papii akupkatai tusar Yuus seammiaji nuyasha nuka turatarum tusar tsankatramkarmiaji. Yuus papii akupkamiajnia nunaka ii yachin susarmiayi. Nu antukar Jehová nekas yainmaji tu enentaimsamiaji. Tuma asamtai urum Yuus papii 27.500 akupkatai tusar seammiaji. Turawakrin uunt naamkaruka nu turamniaitrume tusar ujatmakarmiaji. Ii yachi ii umaisha Cubanmaya Yuus papiin takuarat tusa yainkia asan ti shiir enentaimsamiajai.

Cuba nunkanam Yuusa chichame ankan etserkatniun tsankamkarat tusan nuna iwiarattsan nukape wekatusuitjiai. Nuna turakun Cuba uuntrijiai takakmainiana nuna nawamkaruitjiai.

1994 uwitin Ruanda nunkanam tutsi aentsun amuktai tusar wakeriarmiayi tuma asar tutsi aentsun 1 millón timianun maawarmiayi. Ainis  maniamunam ii yachi ii umaincha maawarmiayi. Nu nankaamasmatai ii yachi nui matsatainia yaintai tusar warik chichamprukarmaji.

Kigali matsatkamunam jear Oficina de Traducción amiania nui tura ii papiiri ikiutai aminia nunasha tukuraru wainkiamji. Ii yachi ii umain machitjiai awatrar maawaruyania nunasha ujatmakarmiaji. Tura aintsan ii yachi ii umaisha anenaiya asar warinia turawaruya nunasha ujatmakarmiaji. Ii yachi tutsi aentsun maawarain tusar ii yachi hutus armiania nu uukar pujuaruyania nuna ujatmakarmiaji. Ii yachi ii umai ikiakarartai tusarsha iruntramji. Ii yachi ii umai 900 iniankasan timianu iruntrar pujuinia ikiakararmiaji.

Nuyanka Zaire nunkanam timianai wemiaji (yamaikia República Democrática del Congo tu anaikiamuiti). Goma matsatkamu nuntumas arantia pisarar taaru matsamtai iruniarmiayi. Nui ii yachi ii umai Ruandanmaya pujuinia eakarmiaji. Ea ea wainkiachar wainkiatniun yainkratkat tusar Jehová seamiaji. Aya neachma aents winia wainkiar testigos de Jehová nekainiatsmek tu aniasmiaji. Wikia testigo de Jehovayaitjiai, Comité de Socorro pujuiniana nui eje ikiutajrume turammiaji. Ii yachi Comité de Socorro pujuiniajai ti shiir aujmattsamiaji tura ii yachi ii umai arantia pisarar kaunkaru ikiakartai tusar iruntramji. Ninkia 1.600 armiayash tumainti. Nuyasha Testigos de Jehová takatrin irunturar chichamprin ainiana nu papii aarmasha aujtusarmaji. Atumi enentaimsar Yuus seaji tura Jehová ajapa iniaitiamsashtatrume tu aarma aujsakrin ii yachi ii umaisha shiir enentaimiarmiayi. Testigos de Jehová takatrin irunturar chichamprin ainiana nu tiarmiania nuka nekasen tiarmiayi. Yamaikia Ruanda nunkanmanka 30.000 testigos de Jehová warasmajai Jehovanun takakmainiawai.

2011 uwitin nuar Ellyn ajakramiajai. Nijiainkia 58 uwi nuatnaikian pujumiajai. Yuusan seakun wi itiur nekapeaj nuna mash ujakuitjiai. Turam ninkia ikiakatraiti. Chikich aentsnasha Yuusnan ujainiakun kakaruitjiai.

90 uwi iniankasan takakeaknasha Yuusa chichamenka tuke atsakamutin etsereajai. Nuyasha Departamento de Asuntos Legales nuisha Bélgica nunkanam yaimiajai. Wi unuimiatraitiajna nuna chikich yatsur ainiana nunasha jintin ainiajai. Betelnum yaimiainia uchipiat ainiana nunasha ikiakainiajai.

Jehovan emka seamiajna nuka 84 uwi nankaamasuiti. Nuyainia juarkin Jehová amikri ajastinian juarkimiajai. Jehová wi seamun tuke anturtin asamtai ti yuminkiajai (YKan. 66:19). b