1. Itiurchat wainiakrisha Jehová tuke enentaimtustinniash wari yainmakminiaitiaj?

 Amuukatin nuntumsamunam puja asar ti itiurchat awai Yuus papiinium tu aarmaiti (2 Ti. 3:1). Yamaiya juinkia ashi aentsti itiurchatka waintainti, tura Jehová enentaimtatikia aents kajertamainiajnia nusha katsuntratniuitji. Itiurchat wainiakrisha Jehová tuke enentaimtustinniash wari yainmakminiaitiaj? Yuus papii Jehovan “Niṉkia iwiaaku Yúsaiti” tu tawai. Nu kajinmatkishtiniaitji (Jrm. 10:10; 2 Ti. 1:12).

2. Jehová nekas iwiaku Yuus asa itiurniuit?

² Jehovaka nekas iwiaku Yuusaiti tura ninkia itiurchat pujakrin tuke yainmawitji (2 Crón. 16:9 TNM; YKan. 23:4). Jehová nekas Yuusaiti tu enentaimkiurkia itiurchat wainiakrisha katsuntrattaji. Ju unuimiatmanum Davidnia nekaatai.

3. “Uunt Yus iwiaakui” David urukamtai ainis timia?

³ Davidkia Jehovan nekaamiayi tuma asa ni yainkiattawai tu enentaimniuyayi. Saúl tura chikitcha apapenam Davidkia Jehovan yainkiata tusa seamiayi (YKan. 18:6). Jehová uwemtikram ninkia junis timiayi: “Uunt Yus iwiaakui” tu timiayi (YKan. 18:46). Aya Yuuska iwiaku pujuwiti titiasa ainis tichamiayi antsu iwiaku Yuus asa nin enentaimtuiniana nunaka tuke yainiaiti ainis taku timiayi. Unuimiatratniun papiin aents najanawaruana nui tana aintsan Davidkia Jehová ashi warinmansha yainminia nuna paant nekaamamiayi tuma asa Jehovaka nekas iwiakuiti tu timiayi. Nui enentaimias ninkia Jehovan tuke umirkamiayi (YKan. 18:​28, 29, 49).

4. Yuuska nekas iwiaku pujuwiti tu enentaimiakrikia urukattaj?

⁴ Yuuska nekas iwiaku pujuwiti tu enentaimiakrikia warinkisha niniua nu wara warat najanattaji. Tura itiurchat  wainiakrisha katsuntrattaji. Niniu warinkish najankur asumprusar najanattaji nuyasha ni tuke umirkatin wakerittiaji.

IWIAKU YUUS KAKARMAN AMASTATUI

5. Itiur enentaimsaria itiurchat wainkiarsha katsuntramniaitiaj? (Filipenses 4:13 TNM).

⁵ Jehovaka nekas iwiaku pujawai tura ni yainmaktatji tu enentaimiakrikia warinkisha itiurchat wainiakrisha katsuntrattaji. Ninkia warinkish itiurchat wainiakrincha ti kakaram asa itiurchat katsuntratniun yainmakminiaitji (Filipenses 4:13 TNM aujsata). Tuma asamtai itiurchat wainiakrisha katsuntrattaji. Itiurchat wainiajnia nui Jehová yainmakrin ti itiurchat nankaamakuisha nekas yainkiattawai tu enentaimsattaji.

6. David natsamaruyania nui warinma enentaimias Jehová nekas yainkratniuiti tu enentaimsamia?

⁶ David itiur nankaamasa nuya Jehová nekas yainkratniuiti tu enentaimsamia nu nekaatai. David uchi asa murikiun wainniuyania nui uunt yawa murikiun esai jukimiayi tura chikich tsawantincha chaisha murikiun esai jukimiayi. Davidkia uunt yawan tura chaincha murikiun apak wean tuku maamiayi. Jehová nekas yainkiayi tu enentaimiu asa ni paant juaktinian wakerukchamiayi (1 Sa. 17:​34-37). Davidkia Jehová yaunchuk yainmiania nuna kajinmatkichmiayi. Nui enentaimias Yuuska nekas iwiaku pujuwiti tura ukunmataisha yainkiattawai tu enentaimsamiayi.

7. David warinma enentaimias Goliatan awakkamia?

⁷ David Israel aentsu suntarin iyutasa wemiayi. Ninkia natsamaruyash tumainti. Israel aentsu suntarinkia filisteo suntari Goliat naartinian ashamainian iismiayi. Goliat naartinkia Israel aentsu suntarin junis timiayi: “Wats ashí Israer suntartirmin ¿ya kakaram nekapea? ¡Nu wiji̱a̱i̱ yamái nekapnaisai tájarme! Tura chikichik áishmaṉ akuptúrkatarum jímiarchik mániktaj” tu timiayi (1 Sa. 17:​10, 11). Israel aentsu suntarinkia Goliat ti naya asamtai tura ya wijiai maniktasa wakera ainis takui ashamiarmiayi (1 Sa. 17:​24, 25). Tumaitkiusha Davidkia Goliatka aya Israel aentsu suntarin ainis katsekeatsui tichamiayi antsu iwiaku Yuusa suntarin tawai tu timiayi (1 Sa. 17:26). Ninkia imiankaska Jehovai enentaimmiayi. Murikiun ayampruktinian yainkiana aintsan yamaisha yainkiattawai tu enentaimmiayi. Jehová yayam Goliatjai maanik nupetkamiayi (1 Sa. 17:​45-51).

8. Jehová nekas yainmaktatji tu enentaimsatai tusar warinma enentaimsatniuitiaj? (Nakumkamusha iista).

⁸ Iisha David aintsan Jehovaka tuke yainkratniuana nui enentaimiakrikia itiurchat wainiakrisha katsuntrattaji (YKan. 118:6). Yaunchuksha ni itiur yainkratkamia nui enentaimiakur nekas yainmaktatji tu enentaimsattaji. Yaunchuksha Jehová nin enentaimtiarmiania nuna itiur uwemtikrarmia nuna unuimiatramniaitji (Is. 37:​17, 33-37 TNM). Yamaiya juisha Jehová ii yachi ii umaincha itiur yainkiaruit nuna nekaattsam jw.org nui enkemam aujsata. Amincha Jehová itiur yainmakuit nuisha enentaimsata. Davidtia aintsan uunt yawa turutskesha chain maatniun Jehová yainmakchaitkiuisha amin yainmaktaj tusa warinkish najanana nui enentaimsata. Ni amikri  atinian itiur yainmakuit nui enentaimsata (Juaṉ 6:44). Ni yainmaku asamtai ni iruntramurin pachitkiame. Wi seamiajmena nui nukape yainkiamiamna nui enentaimsatin yainkiata ainis seamniaitme. Ti itiurchat nankaamakui yainkiamiamna nui enentaimsatin yainkiata nunisha seamniaitme. Jehová itiur yainmakuit nui enentaimkium ninkia nekas tuke yainkiattawai tu enentaimsattame.

9. Aya ii itiurchatrinin enentaimtsuk wari itiurkatniuitiaj? (Nekatai̱n Jintinkiartin 27:11).

⁹ Jehová iwiaku Yuusana nu neka asar aya ii itiurchatrinin enentaimsashtatji. Iwianchkia aentska itiurchatan wainiainiak Jehovainia aran ajasartatui tu tiniuiti (Juup 1:​10, 11; Nekatai̱n Jintinkiartin 27:11 aujsata). Tuma asamtai itiurchat wainiakrisha katsunteakrikia Jehová anea asar katsuntratniuitji. Turakur iwianch waitramu paant nekanattawai. Uunt naamkaru amincha itiurchat amajtamainiawak? Kuitchajai pujamek? Yuusa chichame etserkumin anturtamkatniun nakitiainiawak? Turutskesha warinkish chikich itiurchat wainiamek? Itiurchat nankaamakmeka ju kajinmatkip: Itiurchat wainiakmesha Jehová waramtiksamniaitme. Ame katsuntrashminian katsuntrat tusa iniaitiamsashtatui (1 Kur. 10:13). Antsu itiurchat katsuntratniun kakarman amastatui.

IWIAKU YUUS AKIRMAKTATUI

10. Jehovasha warinia amastataj?

¹⁰ Jehová tamtsuk ni umiru asakrin akirmaktatji (Isr. 11:6). Yamaiya juinkia warasar pujustinniasha yainmaji tura uruma nuinkia tuke iwiaku pujustinian amastatji. Ninkia kakaram asa nekas yainkratkattsa wakerawai tu enentaimiaji. Nu neka asar yaunchunia aents Yuusan umiriarmiania nu turawarmiania aitkiasrik iisha Jehovanu warinmansha wakerusmajai yaimkiatin enentaimiaji. Timoteo ainis turamiania nuna nekaatai (Isr. 6:​10-12).

11. Timoteosha itiur enentaimsa Jehovanun ti nukap takarsamia? (1 Timiutéun 4:10).

 ¹¹ (1 Timiutéun 4:10 aujsata). Timoteo Yuus akirkattawai tu enentaimniuyayi. Tuma asa Jehovanun tura chikich aentsnancha ti nukap takarsamiayi. Warinia turamia? Pablo Timoteon Yuusa chichame penker unuikiartin tura penker jintinkiartin ajasta tu timiayi. Natsamaru ainiana nusha tura uuntcha amijiai metek najanatniun wakeriarat tusam penker iniakmamsata timiayi. Nakak anenkratmajai yanaksha chicharkatniuyayi (1 Ti. 4:​11-16; 2 Ti. 4:​1-5). Timoteoka ni turimiania nuna yaksha wainchakuisha turutskesha imiancha ainis iiniakuisha Jehovaka kajinmatkichmiayi (Rum. 2:​6, 7).

12. Uuntri anairamusha warintia enentaimsara wakerusmajai takakmainia? (Nakumkamusha iista).

¹² Uuntri ainiana nusha Timoteo aintsan ni najanainiana nuna Jehová ti shiir enentaimtana nuna kajinmatkichartiniaiti. Nuyasha uuntri ainiana nuka ni yachi ni umain ikiakain ainiawai, tura jintinkratin ainiawai nuyasha Yuusa chichamencha etserin ainiawai. Tura aintsan Yuusna jean jeammanumsha nuyasha ni yachi ni umain itiurchat nankaamasarmatai warinmansha yaimin ainiawai. Tura chikichkia hospitalnum jaak pujuinian iisarat tusar anaikiamush iruneawai. Tura Hospitalnum takakmainiajai chichasarat tusa anairamusha irunui. Uuntri ainiana nuka ni yachi ni umainkia Jehovanu ainiana nuna nekainiawai tuma asar ni takatrin wakerusmajai najanainiawai tura Yuuska nekas akirmaktatji tu enentaimiainiawai (Kurs. 3:​23, 24).

13. Ii najaneajnia nuna Jehová iiyak itiur enentaimniuit?

¹³ Mashikia uuntri anaikiamu achamniaitji tumaitiatar Jehovanu warinmansha yaimkiamniaitji. Niniu najanattsar  kakajnia nuna ninkia shiir iiyawai. Yuusna najanat tusam kuitjiai yaimiamna nuna ti shiir iiyawai warumchijiain yaimiakmincha nunaka shiir iiyawai. Chicharpatchaitiatam ewej takuim iruntainiam aujmateakminkia ninkia warawiti. Yaksha itiurchat amajtamsana nu tsankureakmin ti warawai. Ti nukap Jehovanu najanatin jeachkumnincha ame jeamuk najanmena nuna ninkia ti shiir iiyawai. Anenma asa ame najanmena nuna akirmaktatui (Ruk. 21:​1-4).

IWIAKU YUUS TUKE UMIRKARTAI

14. Yajauchia nu najanawaij tusar wari itiurkatniuitiaj? (Nakumkamusha iista).

¹⁴ Jehovaka nekas iwiaku pujawai tu enentaimiakrikia ni tuke umirkattaji. José ainis turamiayi. Yuuska nekas iwiaku pujawai tu enentaimia asa yajauchia nuna turatniun penke nakitramiayi (Náṉ. 39:9). Iisha Jehová nekas iwiaku pujawai tu enentaimsatai tusar Yuusa chichame unuimiatrattsar seattsar tsawan ankatniuitji. Nu turakur ni ti aneastatji. José aintsan Jehovaka nekas amikruiti tu enentaimiakrikia yajauchia nu penke najanashtatji (San. 4:8).

15. Israel aents atsuu nunkanam pujusar urukawarmia nuna wari nekaamniaitiaj? (Israernum 3:12).

¹⁵ Iwiaku Yuusan kajinmatainiana nuka nekaamatsuk Yuusaiya aran ajasarminiaiti. Israel aents armiania nu atsuu nunkanam pujusar nankaamasarmiania nui enentaimsartai. Jehovaka iwiaku Yuusana nuna nekarmiayi tumaitkiusha nekasash yainmaktaj tu enentaimsatniun juarkiarmiayi. Tura “Cha, Yussha íija̱i̱sha ¿pujawash?” tu tiarmiayi (Jiin. 17:​2, 7). Tu pujusar Yuusan nakitrarmiayi. Iikia Israel aents turawarmiania ainis turatin nakitiaji (Israernum 3:12 aujsata).

16. Wari urukamtaiya Yuus umirkatin penkerashit tu enentaimminiaitiaj?

¹⁶ Yamaiya jui Jehová umirkatniuka yupichuchichuiti. Nukap aents Yuuska atsawai tu enentaimiainia iruneawai. Tura  yajauchia nuna najanainiasha penker pujuiniana ainis ainiawai. Ainis nankaama asamtai nekasash Yuus umirkatin penkerait tu enentaimsamniaitji. Yuuska nekas iwiaku pujawai tu enentaimiaiyatar Yuussha nekasash yainkratkamniait tu enentaimsatin juarkimniaitji. Yus Kanta 73 nuna aarmiania nuka ainis enentaimsamiayi. Yuusan umircharmiania nuka penker nankaamainian wainmiayi. Ainis nankaamainian wainiak Yuus umirkatniusha nekasash penkerait tu enentaimsamiayi (YKan. 73:​11-13).

17. Jehová tuke umirkatin wakerittsar warinma enentaimsatniuitiaj?

¹⁷ Yus Kanta 73 aarmiania nu ni majat enentaimmiancha itiur yapajiamia? Jehovan kajinmatainiaka urukawartata nui enentaimsamiayi (YKan. 73:​18, 19, 27). Nuyasha Yuus enentaimtustin urukamtai penkerait nuisha enentaimsamiayi (YKan. 73:24). Iisha aintsan Yuus itiura yainmakuitiaj nui enentaimsamniaitji. Nuyasha ni enentaimtachkurkia itiurak pujua nuisha enentaimsamniaitji. Nu turakur Jehová tuke umirkatin wakerittiaji. Yus Kanta 73 nuna aaru timiania aintsan “Antsu wikia Yusai̱ tíjiu̱ch pujakun tí peṉker pujajai” tu titiatji (YKan. 73:28).

18. Urukamtaiya uruma nui turunattana nui enentaimsar ashamkashtiniaitiaj?

¹⁸ Iikia nekas iwiaku Yuus enentaimta asar yamaiya jui warinkish itiurchat wainiakrisha katsuntramniaitji (1 Tis. 1:9). Jehovaka iwiaku Yuus asa iini enentaimias pujuwiti tura tuke yainmaktatji. Yaunchuksha ainis turamiayi tuma asa yamaiya juisha aitkiasan turattawai. Jukerusan ti waitsatin tsawan atatui tumaitkiusha iikkia pujushtatji (Isa. 41:10). Tuma asamtai junis timiniaitji: “Winia yainnia nuka Úunt Yusaiti. Nu asamtai shuar túrutamnia nuna ashamkashtatjai” (Isr. 13:​5, 6).