Yuusa amikri ataj takurkia ni tana nuka nekas turunattawai tu enentaimsatniuitji. Tumaitkiusha Yuusa chichamenka nekas turunattawai mashikia tu enentaimcha ainiawai tawai (2 Tis. 3:2). Nin kajeriarmiania nuna taku Pablo ainis aarmiayi. Yajauch aents tura Yuusan umircha aents armiania nuyainia Pablo uwemtikramu atiniuyayi. Tumaitkiusha ni timiania nuka chikich aentsnasha timiniuyayi. Chikichkia ashi irunna nunaka Yuuska najankachuiti tu enentaimiainiasha iruneawai (Rum. 1:20). Tura Yuuska ana nuna paant nekaamainiayat ninkia atsawai tu enentaimiainiasha irunui. Ainis enentaimiamunka Jehová nakitiawai.

Yuusa amikri atai takurkia nekas ninkia pujawai tu enentaimsatniuitji. Yuuska nekas pujawai tu enentaimiainianka ninkia warinmansha yainiaiti (Isr. 11:6). Yuuska nekas pujawai tu enentaimsatniun Yuusa kakarmari yainmakminiaitji. Yuus ni kakarmarin surusat takurkia ni seatniuitji (Ruk. 11:​9, 10; 11:13 TNM). Nuyasha Yuus ni kakarmarijiai ni chichamen aamtikra asamtai Yuus papiikia aujsatniuitji. Nuyasha aujsaitiajnia nui esetrar enentaimsar ii iwiakmarincha aitkiasrik najanatniuitji. Ainis turakrinkia Yuusa kakarmari Yuuska nekas pujawai tu enentaimsatniun yainmaktatji.