Aujin ainia nu anintruiniamu
Yus Kanta 12:7 tawai: “Túrasha Uunt Yusá ame wáinkiartatme”. Nu chichamsha warinkiua ainis ta? Aents waitiainia nunak ta (akantramuri 5) turutskesha Jehová chichamenak ta (akantramuri 6)?
Nekas nekaamka aentsun taku ainis tawai.
Yus Kanta 12:1-4 nui timiatrusan umikmin ainiana nu aentska menkararai tawai. Tura Yus Kanta 12:5-7 nui junis tawai:
“Tura Uunt Yus chichaak ‘Kuítrinchasha wáitkiainiamu asamtai
núnisan atsumainiasha útainia asamtai
Wi wajatrattajai.
Túran wáitkiainiak wishikiainia nuya̱ṉka uwemtikrartatjai’ tawai.
Warí Uunt Yusa chichame̱ṉka
kuit jíruk awajsatai tusar jinium siati awenar unuikiar kuit aya jíruk awajsamua tímianuiti.
Túrasha Uunt Yusá ame wáinkiartatme.
Túram ju̱ aents ainia nuya̱ṉka tuke ayamprúkarta”.
Akankamu cinconmanka Yuus aents waitiainiana nuna uwemtikrartatui tawai.
Akantramuri 6 nui tawai: “Warí Uunt Yusa chichame̱ṉka kuit jíruk awajsatai tusar jinium siati awenar unuikiar kuit aya jíruk awajsamua tímianuiti” tu tawai. Kristu aentstikia nu chichamka nekasaiti tu enentaimiaji (YKan. 18:30; 119:140).
Yamaikia Yus Kanta 12:7 nui tana nu nekaatai. Nui tawai: “Túrasha Uunt Yusá ame wáinkiartatme. Túram ju̱ aents ainia nuya̱ṉka tuke ayamprúkarta” tu tawai. Nu chichamsha warintiua ainis ta?
Akantramuri 6 nui Yuusa chichameniun aujmateawai. Tuma asamtai akantramuri 7 nui tana nuka Yuusa chichameniun tawai tu enentaimsarminiaitji. Yuuska ni chichamen aents emenkakarain tusa ayampruktasa warinkisha turaiti (Isa. 40:8; 1 Pit. 1:25).
Tumaitkiusha akantramuri 5 tana nusha kajinmatkishtiniaitji. Waitkiasma ainiana nuna Jehová ayamprukaruiti tura yainkiaruiti nuya tuke ainis turuki wetatui (Job 36:15 TNM; YKan. 6:4; 31:1, 2; 54:7; 145:20).
Nuinkia akantramuri 7 tana nusha warinia taku ainis ta?
Ju akantramunmanka nekas nekaamka aentsun taku ainis tawai.
Yus Kanta 12:1, 2 nuinkia Yuusan umirainian anankataj tusar waitruawar tuinia irunmiayi tawai. Nuyasha akantramuri 3 nuyainia juarki waitruawar tuiniana nuna Jehová itiurchat awajsartatui tusa aujmateawai. Yus Kanta 12 nuinkia Yuuska waitrichu asa nin umirin ainian nekas yainkiartatna nuna aujmatui.
Tuma asamtai akantramuri 7 nui aujmatna nuka aents waitkiasma ainiana nuna tawai taji.
Hebreo chichamjai yaunchuk Yuus papii aarmanum Yus Kanta 12:7 nui tana nuka aentsun tawai. Nuyasha griego chichamjai aarmanum aents waitkiasma ainiana nuna aujmatuk iin turameajnia ainis aujmatui [nuka Salmo 11:8 Septuaginta nui awai]. Nuyasha akantramuri 7, 8 nuisha aents yajauchin turamtai warartai ainiana nuyainia nin umirainiana nunaka chikichkimias Jehová ayamprukartatui tu tawai (YKan. 12:7, 8). Akantramuri 7 nui hebreo chichamnumiajai arameonam aarmanum junis tawai: “UUNTA ameka penkera turin ainiana nu ayamprukartatme. Yamainia aents yajauch ainiana nuyainia tuke penker wainkiartatme. Yajauch aentska tenta wekainiawai. Muju aentsu numpen mukutainiana ainis ainiawai” tu tawai. Tuma asamtai Yus Kanta 12:7 nui aujmateana nuka Jehová chichakman tatsui tu taji.
Antsu nu akantramurin aujmatna nuka umin ainiana nuna Yuus nekas yainkiartatna nuna aujmateawai.
