1, 2. Imianirkia urukamniaitiaj?

 Yaksha imianinkia Jehovanu ajawai. Nuka ti penkeraiti. Yus Kanta 65:4 nui David junis timiayi: “Aents Ame je̱e̱min pujusat tusar Ame achikma Aminí̱ weamkaka ti shiir awajsamuiti”. Imianiaru ainiana nusha David timiania aintsan enentaimiainiawai.

² Jehovaka ni iruntramurin nankamas yaksha enkemat tusanka iniaichuiti. Nuik atsakamutin unuimiarmajnia aintsan Jehovaka nin nekas enentaijiai nekattsar wakeruinianka weamtiniaiti (San. 4:8). Jehovai sumamas imianiarka Jehovanu ajainiawai. Imianiaru ainiana nuna Jehová junis tawai: “Wikia nayaimpinmaya̱ yumiṉkian taramkar naṉkaamas takustinian akuptúkchatjarmeash” (Mks. 3:10; Jrm. 17:​7, 8).

3. Imianniniaitiajnia nusha wari turatniuitiaj? (Eclesiastés 5:​4, 5 TNM).

³ Imianir Yuus wakeramu najanatin juareaji. Imianniniaitiajnia nuka itiurchat nankaamakrisha turutskesha tunaa turamnia nekapeakrisha Yuus tuke umirkatniuitji (Eclesiastés 5:​4, 5 TNM aujsata). Nuyasha Jesús turamiania aitkiasrik najanatniuitji tura aintsan ni timiania nusha umirkatniuitji (Mat. 28:​19, 20; 1 Pit. 2:21). Ainis turatniun nuna yamai unuimiatrattaji.

 ITIURCHAT NANKAAMAKRISHA TURA TUNAA TURAMNIA NEKAPEAKRISHA JESÚS TURAMIANIA AITKIASRIK TUKE TURAWARTAI

4. Atumi pauri entsakrum nemartustiniaitrume Jesús tu timiania nunasha warinkiua timia? (Lucas 9:23 TNM).

⁴ Imianin asan itiurchatnaka wainkiashtatjai tu enentaimsaip. Jesussha kashi kashinin atumi pauri entsakrum winia nemartustiniaitrume tu timiayi (Lucas 9:23 TNM aujsata). Kristu aentska tuke waitiu pujuartatui tusan ainis timia? Atsaa, antsu penker pujuiniaksha urutainsha itiurchat wainkiartatui tusa ainis timiayi (2 Ti. 3:12).

5. Yuusna nuna nekaska najanatai tusar warinkish ikiukiaruana nuna Jesús waritmia?

⁵ Jehová umiru asakmin amee shuarkesha kajertamcharmashi turutskesha Yuusna nu nekaska najanattsam kuit nuyanchuka warinkisha ikiaunkatin iniaisachuashitiam? (Mat. 6:33). Jehovaka ame najanaitmena nuna nekawai (Isr. 6:10). Amesha Jesús timiania nu nekasaiti tatsumeash. Ninkia junis timiayi: “Ti nekasan tájarme shuar Yus akupeana nuna túrataj tusa ni je̱e̱ncha núnisaṉ aparí̱ncha, nukurí̱ncha, yachi̱nkisha, nuwe̱nkesha, uchirí̱nkisha ikiuakka ju̱ nuṉkanmasha nu shuarka núkap wainkiattawai. Tura tuke iwiaaku pujustinniasha wainkiattawai” timiayi (Ruk. 18:​29, 30). Warinkisha ikiukniuitmena nujaisha nankaamas Jehová ti penkera nuna amasuiti (YKan. 37:4).

6. Imianimsha urukamtaiya ame ayashim wakeramu najanawaij tusam kakartiniaitiam?

⁶ Tunaartin akinia asam imianimsha ame ayashim wakeramu najanawaij tusam kakartiniaitme (1 Juaṉ 2:​15-17). Apóstol Pablo itiur enentaimmia ainis urutainsha enentaimminiaitme. Ni junis timiayi: “Nekas enentáiji̱a̱i̱ Yusa akupkámuri̱n wakerajai. Tumai̱ yaunchu enentáimtai̱ winia enentái̱rui̱ pujurtak nupettawai tura nekas wakeraj nuna akirturui” (Rum. 7:​22, 23). Yajauch turamia nekapea asam kuntuts enentaimtsumeash. Tumaitkiusha Jehovai sumameakum aminiak tuke enentaimtustatjame timiamna nui enentaimsam katsuntramniaitme. Urukamtai ainis taji nu nekaatai.

7. Yuusai sumama asar wari turiniaitiaj?

⁷ Yuusai sumameakur warinkisha ejetuktasar wakeramu turutskesha Yuus nakitiana nu turatin iniaiyaji (Mat. 16:24 TNM). Tuma asamtai itiurchat nankaamakrisha turutskesha tunaa turamnia nekapeakrisha Yuusan wikia tuke waramtiksattajai tura umirkattajai tu enentaimniuitji. Job timiania ainis junis titiniaitji: “Wi jaamam Yuusan umirkatniun penke iniaisashtatjai” (Job 27:5 TNM).

8. Tunaa turamnia nekapeakrisha Yuusai sumamsaitiajnia nui urukamtai enentaimsatniuitiaj?

⁸ Yuusai sumameakur tiniuitiajnia nui enentaimiakrikia tunaa turamnia nekapeakrisha katsuntrattaji. Watskea nuatnaikiaru ainiana nujai wishia wishia ajatjiash? Atsaa, nuka penke turashtiniaitji. Yama nankamtaik ainis nankaamasain tusar yajauch enentaimmia kishmakrikia yajauch enentaimmia emenkaktai tusar waitsashtatji. Yajauch aents turuiniana ainis iisha penke najanashtatji (Neka. 4:​14-16).

9. Takat wainkiarsha Jehovai sumama asar itiurkatjik?

 ⁹ Takat waitmakrisha iruntainiam wetin tujintiakrikia itiurkattaj? Nuka iikia nekaji. Ju takatnum takakmasta turamainiatsain iikia nu takatnum takakmaschamniaitiajnia nuka yaunchuk enentaimsaitji. Tuma asamtai nu takatnumka takakmaschattaji. Tura nui takakmakuisha Jehovaka yainkiattawai tu enentaimsashtatji. Jesús turamiania aitkiasrik turattaji. Jesuska ni apari wakeramun najanatniun tuke enentaimniuyayi. Jesusa aintsarik Jehová nakitiana nu iisha nakitrattaji (Mat. 4:10; Juaṉ 8:29).

10. Imianiarsha Jesús turamiania aitkiasan turawarat tusa Jehovasha itiura yainmaktataj?

¹⁰ Itiurchat nankaamakur tura tunaa turamnia nekapeakrisha Jesús itiurkamia aitkiasrik turattsar wakera asar katsuntrattaji. Jehová ainis turatniun yainmaktatji. Ninkia junis tawai: “Ti útsutkamuitkiumnisha Yuska tuke iniaitsuk waitma asa ame katsuntrachminian tsaṉkatramkashtatui. Tuma asa nu tunaanum útsutkamunmaya̱ uwempratniun iniakturmastatui. Núja̱i̱ṉkia katsuntramin átatme” (1 Kur. 10:13).

JESÚS TURAMIANIA AITKIASMEK TURATTSAM WARI ITIURKAMNIAITIAM

11. Iisha Jesús turamiania aintsan Jehovainia kanakij tusar wari itiurkamniaitiaj? (Nakumkamusha iista).

¹¹ Jesuska Jehovan nekas enentaijiai enentaimtimiayi tura nijiai tuke aujmatuk Jehovaiya kanakchamiayi (Ruk. 6:12). Imianniniaitkiurkia Jehová tuke umirkatai tusar warinkisha Yuusna turattsar  kakartiniaitji. Yuus papiikia junis tawai: “Nakimtsuk jeajnia nuja̱i̱ métek umirkatin pimpitsuk takastiniaitji” (Jir. 3:16). Ii yachi ii umai Jehovanu nu nukap yaimkiatai tusar warinia itiurkarmia nu urutainsha aujmatma antu wetatme. Escuela para Evangelizadores del Reino nui wearu turutskesha Yuusa chichame etsernaktin utsumnamunam wearusha antuktatme. Amesha ainis turamniashitiam? Ainis turamnia jeakmeka nu turata. Jehová enentaimtatikia Jehovanu nu nukap najanatin wakeriniaitji (Tur. 16:9). Ainis turatin jeachkumsha wikia chikich turuiniana ainis turatniun jeatsjai tusam kuntuts enentaimsaip. Jehová tuke umirkatai tusar kakartiniaitji (Mat. 10:22). Ame jeamuk warinmansha yaimkiataj tusam kakamna nuna Jehovaka shiir iiyawai. Nu turakmeka amesha Jesús turamiania aitkiasmek Yuus tuke umirkattame (YKan. 26:1).

12, 13. Majat ajamu nekaamamka wari najanamniaitiam? (1 Kurintiunam 9:​16, 17;  Yuus tuke umirkatai tusar wari itiurkamniaitiaj? tana nuisha iista).

¹² Yuus seakum aya nuke seamu nekaamamka turutskesha warinkish aya nuke pujurkumka nuyanchuka Yuusa chichame etsereakmesha tura Yuusa chichame aujeakmesha majat enentaimiakmeka Yuuska ni kakarmarinkia suratsui tu enentaimsaip. Tunaarintin asar urutainsha ainis nekapminiaitji. Majat ajaki weamu nekaamamka Pablo itiurkamia nui amamkesam enentaimsata. Jesús turamiania aitkiasan turattsa wakerimiayi. Tumaitkiusha ni umiktiniuyania nuna umiktasa  wakeraksha urutainsha majat enentaimniuyayi (1 Kurintiunam 9:​16, 17 aujsata). Pablo junis timiayi: “Tura nakitiaknasha tuke Yus surusmanka umiktiniaitjiai”. Majat enentaimiaksha Yuus wakeramunka tuke najanatniun enentaimia asa ainis timiayi.

¹³ Majat enentaimiu asam nankamsam enentaimsam najanawaip. Antsu warinkisha turachmin nekapeakmesha kakaram ajasam turata. Yuusna nu turakum shiir enentaimsattame. Yuusna nu tuke turakmeka imianimsha Jesús turamiania aitkiasmek tuke turukim wetatme. Ame turamna nuna iisar ii yachi ii umaisha kakarartatui (1 Tis. 5:11).

TUKE PENKER IIMIASARTAI

14. a)Imianirsha warinma tuke enentaimsatniuitiaj? b) Nuisha urukamtai enentaimsatniuitiaj? (2 Kurintiunam 13:5).

¹⁴ Imianirsha wari najaneaj nui tuke enentaimsatniuitji (2 Kurintiunam 13:5 aujsata). Yuusan tuke aujniukaitiaj, Yuusa chichamen tuke unuimiajak, iruntainmasha tuke weajak, Yuusa chichamencha etsereajak tu animiasartiniaitji. Ainis turaknaka nu penker najanattsan wari itiurkamniaitiaj tu enentaimsatniuitji. Junis animiasarminiaitji: Yuusa chichame jintinkrateana nuna paant jintinkratamniakaitiaj? Yuusa chichamen etseruujat nekaptiasan warinkisha turamniakaitiaj? Yuusan seaknasha warinia enentaimiaj nuna tu weajak tura Yuus yainkiattawai tu enentaimiajak? Iruntainiam taamsaij tusan kakajak? Iruntainiam amamkesan antuktaj tusan tura uwejrun takuin aujmattiasan warinia itiurkamniaitiaj? Ainis animiasarminiaitji.

15, 16. Ii yachi Robert nankaamasmiania nui enentaimkiur wari unuimiatramniaitiaj?

¹⁵ Warinma yapajniamniaitiaj nu nekaamattsar tuke tsawantin iik iimiastiniaitji. Urukamtai ainis turatniuitiaj nu nekaami tusar ii yachi nankaamasmiania nuna nekaatai. Ii yachi Robert 20 uwi takakuya nui, nuwa ni takatnumia ai, jearui wetai iik pujusar penker nankaamasmi ainis tutai ii yachinkia yama nankamtaikia ishamshim nakitiajme timiayi, tumaitkiusha urumka kakaram ajas penke nakitramiayi. Ii yachi ainis tura Jehová umirkamiayi. Tumaitkiusha ninki enentaimias junis tawai: Warichik  ishamshim ajatsuk winia airun nakitratniuyajai. José Potifara nuarin penke nakitramiania aintsan wisha turatniuyajai (Náṉ. 39:​7-9). Winia airun warik nakitrachu asan Jehovai nu nukap weamkatniuyajna nuna nekaamamiajai tu tawai.

¹⁶ Iisha urutainsha tunaa turamnia nekapkur Robert itiurkamiania aitkiasrik turamniaitji. Junis animiasminiaitji: Nu tunaan warik nakitramkaj? Warinmansha yapajniatin nekaamarkia kuntuts enentaimia pujutsuk antsu Jehová seatniuitji nuya kakarar Jehová tuke umirkir wetiniaitji (YKan. 139:​23, 24).

17. Ii yachi Robert nankaamasmiania nui enentaimkiur penkera nu najankurkia Jehová naarisha itiur juaktata?

¹⁷ Ii yachi Robert nankaamasmiania nuna nu nukap aujmattsatai. Ni takatnumia ai chichaak: Ameka Yuus penker umirniuitme timiayi. Ainis tutai ii yachinkia wariniak ta tusa nuna nu nukap nekaattsa wakerimiayi. Nuya ni takatnumia ai junis timiayi: Winia amikiur yaunchu testigo de Jehovauya nu chichartak chikich testigo de Jehová natsamaru ainiana nuka Yuusan imian enentaimtuiniatsui tura urutainsha tunaa turamnia nekapainiakka Yuusan umirkachartatui tu turutmiayi. Tuma asamtai wikia nu nekasashit tusan amin jearui wetai timiajme tu timiayi. Ii yachi Robert Jehová naarin penker ujukaitjiai tusa ti warasmiayi.

18. Imianimsha wari tuke turukim wetasam wakeram? ( Natsamarunu aujsatin awai tana nuisha iista).

¹⁸ Itiurchat akuisha Jehová naarin paant ujukatin wakera asam Jehovai sumamsam imianniuitme. Itiurchat akuisha nuya tunaa turamnia enentaimkium ni umirkattsam kakamna nunaka Jehová nekawai. Tura ninkia ti nukap penkeran amastatui. Winia umirtukat tusa Jehovaka ni kakarmarijiai yainmaktatui (Ruk. 11:​11-13). Tuma asamtai imianimsha Jesús turamiania aitkiasmek tuke turukim wetatme.