1. Itiur enentaimminiaitiaj?

 “Warí Uunt Yuska ni shuari̱n wararniuiti” Yuus papii ainis tawai, nu neka asar shiir enentaimiaji (YKan. 149:4). Jehovaka mashiniun ni enentaimtuiniana nuna iiyak warawiti. Tumaitkiusha wini enentaimsasha warawash tu enentaimsar kuntuts enentaimminiaitji. Yaunchuksha Yuusan enentaimtin armia nusha ainis enentaimiarmiayi (1 Sa. 1:​6-10; Juup 29:​2, 4; YKan. 51:11).

2. Jehovajai iisam shiir iisma ataj takurkia wari itiurkatniuitiaj?

² Maakchartiniaitkiursha Jehová penker iirmasminiaitji Yuus papii ainis tawai. Tura iisha wari itiurkatniuitiaj? Jesús iini jarutramkamiajnia nu nekasaiti tusar imiantiniaitji (Juaṉ 3:16). Ii tunaarin ene enentaimia ajasar Yuusru yamaikia amin tuke umirkatjame tusar nukap aents iruntramunam imiantainti (Tur. 2:38; 3:​19, 20). Jehová amikri ataj tusar ainis turutainti nu turakrin Jehovasha warawai. Tuke umirkatjame Jehovan tu tiniu asar ni umirkattsar kakakrinkia Jehovasha shiir iirmattaji (Sal. 25:14 TNM).

3. Ju akankamunmasha wari nekaataj?

³ Jehová winisha enentaimias warawash urukamtai tu enentaimsamniaitiaj nu nekaatai. Tura aintsan iin chikichkimsar shiir enentaimturmajnia nuna nekaawarat tusa Jehovasha itiurniuit? Nuyasha Jehová winiasha shiir enentaimtureawai tu enentaimsatai tusar wari itiurkatniuitiaj nusha nekattaji.

JEHOVAKA IMIANCHA AINIS ENETAIMTUREAWAI URUKAMTAI TU ENENTAIMMINIAITIAJ

4, 5. Wikia imianchaitjiai tu enentaimiakrisha warinma enentaimsatniuitiaj?

⁴ Uchichinmayan wikia imianchaitjiai tu enentaimniutisha nukap irunji (YKan. 88:15). Ii yachi Adrián naartin  junis tawai: Wikia imianchaitjiai ainis tuke enentaimsaitjiai. Uruma nui shiiram nunkanam wi shuar tuke pujuarat tusan Yuusan tuke aujniuyajai tumaitkiusha wikia nui penke jeashtatjai tu enentaimsan kuntuts enentaimniuyajai tu tawai. Ii yachi Tony naartin ni apari testigo de Jehovachu asar itiur tsakatmararmia nuna aujmatuk junis tawai: Apar nukurjainkia anentiarmiania nunaka turutcha armiayi tura wikia aparnasha nukurnasha waramtikiainiatsjai tu enentaim wemajai tu tawai.

⁵ Wikia imianchaitjiai tu enentaimtumakrikia Jehová winiasha ni iruntramurin pachinkiai tusa yainkiaiti tu enentaimsartai (Juaṉ 6:44). Iikia nekamachkurnincha penkeraitiajnia nuna Jehovaka nekawai tura ii nekas urukuitiaj nunasha ninkia nekawai (1 Sa. 16:7; 2 Crón. 6:30 TNM). Tuma asamtai atumniaka ti penker enentaimtajrume turamkurin nekas turameaji tu enentaimsatniuitji (1 Juan 3:​19, 20 TNM).

6. Pablo yaunchuk tunaan najanamiania nui enentaimiuk itiur nekapmia?

⁶ Yuusna penker nekachmiajnia nui warinkisha yajauch turamunam enentaimsar itiurchat enentaimminiaitji (1 Ped. 4:3 TNM). Tura chikichkia nukape uwi Jehovan enentaimtuiniayat yajauchin turamnia nekapainiaksha kakainiawai. Amesha warinmansha enentaimkium itiurchat nekapeamek? Ainis nankaamakmeka chikitcha ame aintsan nankaamasaru nekaam shiir enentaimsattame. Pablosha tunaan turamnia nekapeak kuntuts enentaimmiayi (Rum. 7:24). Pablo ene enentaimia ajasu asa imianniuitkiusha “chíkich Yus akatrámuja̱i̱ ímianchaitjiai” tu enentaimmiayi. “Tura wikia ashí shuarja̱i̱ naṉkaamas tunaan túriniaitjiai” tu timiayi (1 Kur. 15:9; 1 Ti. 1:15).

7. Tunaamkarsha ene enentaimia ajasakrinkia Jehovasha itiurtamkattaj?

⁷ Tunaamkakrincha ene enentaimia ajasakrinkia Jehová atumi tunaarin tsankurattajrume turameaji (YKan. 86:5). Tuma asamtai tunaamkarsha Jehovaka nekas tsankukratniuiti tu enentaimsatniuitji (Kurs. 2:13).

8, 9. Nukap warinkisha najankuisha Jehovajainkia imianchaiti tu enentaimsaij tusar wari itiurkatniuitiaj?

⁸ Jehová waramtiksatai tusar warinsha najanattsar wakeraji. Tumaitkiusha Jehová waramtiksattsan nukap najaneakuisha Jehovaka shiir enentaimtureatsui tu enentaimminiaitji. Ii umai Amanda naartin junis tawai: Jehová waramtiksattsan ti nukap najanatniuitjai tu enentaimniuitjiai tura jeatsujna nuna najanatniuncha wakeriniaitjiai tura nuna najanatniun jeachkun yamaikia Jehovaka shiir enentaimtureatsui tu enentaimniuitjiai tu tawai.

⁹ Nukap warinkish najankuisha Jehovajainkia imianchaiti tu enentaimsaij tusar wari itiurkatniuitiaj? Jehovaka timianu najanatniuitrume turamtsuji antsu ii jeamuk najanman shiir iiyawai. Nukap turutskesha ishichik najaneakrisha ii jeamuk najankurnincha Jehovaka warawai. Jehovan nekas enentaijiai umiriarmiania nu aentsna nekaatai. Yaunchukka Pablo Yuusa chichamen etserkattsa tui tuinsha aran wuyayi. Nuyasha Kristu aents nukap ajasarat tusa ti takakmasmiayi. Tumaitkiusha ni jeen apenmia pujumiania nuinkia aran we Yuusa chichamen etserkachminiuyayi. Pablo ainia nankaamakui  Jehová imiancha nuke enentaimtimiashia? Atsaa, Pablo ni jeamunak najanatniun iniaisachmiayi tuma asamtai Jehovasha tuke yainmiayi (Tur. 28:​30, 31). Iisha aintsan nukap najanatin jeachkurnisha Jehovaka nekas enentaijiai ii najaneajnia nuna iiyak shiir enentaimsattawai. Jehová shiir enentaimtajrume tusa itiurniuit nuna yamaikia nekaatai.

JEHOVASHA SHIIR ENENTAIMTURMAJNIA NUNASHA ITIUR NEKAMTIKRAMEAJ

10. Jehová ni anenmajnia nunasha itiur nekamtikrameaj? (Juaṉ 16:​26, 27).

¹⁰ Yuusa chichamejai. Jehovaka nin enentaimtuiniana nuna aneajrume tiniuiti. Jehová Jesusan juka aneamu uchiruiti tura shiir enentaimtajai timiania nuna Yuus papiiniam aarma awai (Mat. 3:17; 17:5). Jehová amincha ainis turamit tusam wakeramek? Ninkia nayaimpiniam pujus ainis nakak turamtsuji. Tumaitkiusha ni chichamejai shiir enentaimtajme turameaji. Jesús ni unuiniamurin aneasmajai tu wemiania nuna aujkur Jehová iincha ainis turameajnia ainis nekapeaji (Juaṉ 16:​26, 27 aujsata). Jesuska ni apari urukuya aitkiasan iniakmam wemiayi tuma asamtai Jesuska maakchartin ainiakuisha ni unuiniamurin aneajrume tu wemiania nuna aujkur Jehovasha iincha aitkiasan turameajnia nuke nekapeaji (Juaṉ 15:​9, 15).

11. Itiurchat nankaamakur Yuus nakitruru asamtai juniajai urukamtai tu enentaimsashtiniaitiaj? (Sántiak 1:12).

¹¹ Ni najanmajai. Jehovaka warijiainsha yainkratkattsa wakerawai, watskea ii utsumakrin nui yainkratniuiti. Tumaitkiusha Job nankaamasmiania aintsan iisha urutainsha waitsamniaitji (Juup 1:​8-11). Itiurchat nankaamakur Yuus nakitruru asamtai juniajai tu enentaimsashtiniaitji. Antsu itiurchat nankaamakrisha ni yainkiattawai tu enentaimiu asar tura ni anea asar nininia penke kanakchattaji (Sántiak 1:12 aujsata). Ainis itiurchat nankaamakrincha katsuntrarat tusa Yuuska anenkratea asa yainmaktatji.

12. Dimitri nankaamasmiania nuna wari nekamniaitiaj?

¹² Ii yachi Asia nunkanmaya Dimitri naartin nankaamasmiania nuna nekaatai. Takatjainchu juakmiayi, nukape nantu takatan waitmaktinian tujintiak Jehová yainkiattawai tusa Yuusa chichamen  etserkatniun pujurmiayi. Takatan eaksha penke waitmachmiayi, tuma pujus sunkurmak tepermiayi. Ainis nankaamak winia jearui pujuinian penker wainiainiatsjai, Jehová nakitruruiti tu enentaimsatniun juarkimiayi. Ainis nankaamamunam ni nawanchiri Isaías 30:15 TNM tana nuna papiinium jusa susamiayi nui junis aarmauyayi: “Sapijmiakairap, Jehová yainkiattawapi tu enentaimkiuram kakaram ajastatrume”. Ni nawanchiri papiin jusa suak apachiru kuntuts pujakun jui enentaimsamnium tu timiayi. Jehová yaintiakui winia jearui pujuiniana nusha pushin tura yurumatniuncha takurmakainiawai tu timiayi. Ii yachi junis tawai: Nuna aujsan itiurchat enentaimtsuk Jehová nekas yainkiattawai tu enentaimsatniuitjiai timiajai tu tawai. Amesha aintiaku nankaamakmeka Jehová amini enentaimiu asa katsuntrat tusa ni kakarmarijiai yainmaktatui.

13. Jehovasha iin anenkrateana nunasha yajaiya nekamtikrameaj?

¹³ Ii yachi ii umaijiaisha. Itiurchat nankaamakrin ii yachi ii umainsha Jehová utsuamu asar ikiakatmararminiaitji. Ii umai Asia nunkanmaya ainis nankaamasmiayi. Takatchajai juakmiania nui ti sunkurmakmiayi. Tura arum ni aishri tunaa najana uuntri anaikiamu ajasman iniaisamiayi. Ti itiurchat nankaama asa ii umai urukamtain ainisha nankaamaj tu timiayi. Warinmansha awajirchashitiaj tuma asamtai Yuus anentatsui tu enentaimmiajai. Tu enentaimia asa Yuusan seak nekas anentakmeka paant nekamtikruata tu timiayi, turam Jehovasha paant nekamtikiamiayi. Nusha itiuran nekamtikiamia? Uuntri armiania nu wijiai aujmatainiak Jehová anenmawai tu turutiarmiayi ainis tawai. Ii umainkia ataksha Jehovan seak anentamna nu paant nekamtikruata timiayi. Tu seamtai wari nankaamasmia? Ni tawai: Nu tsawantinin umar kair papiin aarar akupturainiak ti aneajme turutiarmiayi nuna aujeakun Jehová nekas anturtukai tu enentaimsamiajai ainis tawai. Jehovaka iin anenmajnia nunaka ii yachi ii umai turamainiajnia nujai nekamtikrameaji (YKan. 10:17).

14. Anenkratin asa Jehová itiurtamniuitiaj?

 ¹⁴ Jehovaka anenkrata asa ii yachi ii umai ainiana nujainsha chichartameaji. Jehová Pablon Kristu aentsun chicharkarta tusa 14 papiin aamtikramiayi. Jehovasha Pablon urukamtai aini chicharkarta timia? Penker asa anenkratin asa nuya apa ni uchirin chichareana aitkiasan chicharkartin asa Pablon aini turata timiayi (Neka. 3:​11, 12). Yaksha Yuusa chichamejai chichartamkurin Yuuska yamaikia nakitruruiti tu enentaimsachartai. Antsu Yuuska anenkrata asa ainis chichartameaji tu enentaimsartai (Isr. 12:​5, 6). Yuuska shiir enentaimturmaji nuniasha urukamtai timiniaitiaj nu nekaatai.

JEHOVÁ SHIIR ENENTAIMTURMAJNIA NUSHA ITIUR NEKAMAMNIAITIAJ

15. a) Jehová yana ni kakarmarijiai yainiait? b) Jehová shiir enentaimturmajnia nu itiur nekaamniaitiaj?

¹⁵ Jehová yana shiir enentaimta nunaka ni kakarmarijiai yainiaiti (Mat. 12:18). Yuusa kakarmari yaintiu asamtai penker iniakmamniukaitiaj tu animiasminiaitji. Yaunchuk urukuyam nui enentaimsam yamaiya juinkia imiankaska warinkish katsuntratin jeamek? Jehová ni kakarmarijiai yainmakrin ni wakerana ainis iniakmamsattaji. Jehovaka shiir enentaimturmaji tuma asa ainis iniakmamsatniun yainmajnia nu nekaamniaitji ( Yuus ni kakarmarijiai yainmakrin itiur iniakmamtain? tana nui iista).

16. a) 1 Tisarúnikianam 2:4 tana aintsan Jehová urukamtai ni chichamen etserkatniun tsankatrameaj? b) Amesha nu nekaam itiur enentaimiam?

¹⁶ Jehovaka shiir enentaimturmaji tuma asa ni chichamen etserkarat tusa tsankatrameaji (1 Tisarúnikianam 2:4 aujsata). Nuka nekas aintsaiti tusa ii umai Jocelyn naartin nankaamasmiania nu nekaatai. Aya neachma kuntuts enentaimias tsawarmiayi. Ni junis tawai: Kakarmachu nuya warinkish najanachminia nekapmiajai. Tumaitkiusha precursora asan Yuusa chichamen etserkatniuyajai. Tuma asan Yuusan sean Yuusa chichamen etserkattsan jinkimiajai tu tawai. Yuusa chichamen etseru wekas ii umainkia Mary naartinjiai aujmattsamiayi. Ninkia Yuusa chichamen unuimiatrattsa wakerimiayi. Nukape nantu nankaamasu ai Marykia ii umain chichaak ame yama  tamiamnia nuinkia kashik Yuusan sean aminiu nekaattsan yainkiata tu seamiajai timiayi. Ii umai ainis nankaamasu asa warinia nekaamamia? Ninkia tawai: Shiir enentaimtajme Jehová turuteana ainis enentaimmiajai tu tawai. Mashikia Yuusa chichamen antuktasar wakerichartatui. Tumaitkiusha Yuusa chichame etserkatai tusar kakakrinkia Jehovaka ti shiir enentaimsattawai.

17. Vicky naartin nankaamasmiania nui enentaimkium Jesús ii tumashrin akikmakmiania nuna wari nekaamniaitiam? (Yus Kanta 5:12).

¹⁷ Shiir enentaimtuiniana nunaka Jehová Jesusa jakamurijiai ni tunaarin tsankurainiawai (1 Ti. 2:​5, 6). Jesús ii tumashrin akikmakmiayi tu enentaimiakrisha tura imianniniaitkiursha nekasash Jehová shiir enentaimturea? Tu enentaimminiaitji. Ii enentain itiurchat nekapeakrisha nekaska Jehová warintia enentaimia nuke nekasaiti titiniaitji. Jesusa jakamurin enentaimsar Yuusan umirainiana nu aentsun Jehovaka ti penkeran susartatui (Yus Kanta 5:12 aujsata; Rum. 3:26). Ii umai Vicky naartin Jehovaka anentatsui tu enentaimniuyayi. Yaunchukka junis enentaimniuyajai tawai: Jehová anenkratakmesha winiaka yainkiachminiaitme, Jesús akikmakmiania nujaisha winia tunaarka tsankurachminiaitme ainis Jehovan tajana nuke ajamiajai. Ainis enentaimiakuisha Jehová ti nukap anenniuiti tu tawai. Iisha Jesús iini jakamiania nui enentaimiakrikia Jehová nekas anentawai tura shiir enentaimtureawai tu enentaimsattaji.

18. Warinma enentaimsatniuitiaj?

¹⁸ Ju akankamunam unuimiarajnia nu umirkur nekasash Jehová shiir enentaimturea tusar kuntuts enentaimminiaitji. Amesha ainis enentaimkiumka Jehová nin anena nu aentsun penke ikiuchuana nui enentaimsata (San. 1:12). Tuma asamtai Jehovai weamkattsam tuke kakarta, nuyasha amincha itiur yainma nui enentaimsattsam kakakim weta. “Túrasha Yuska jeashtaka pujurtamtsuji” tawai Yuus papii. Nu penke kajinmatkip (Tur. 17:27).