1, 2. Imiantsuk wari itiurkatniuitiaj?

 Yamaipiattaku un millón iniankasan testigos de Jehová ajasaruiti. Timoteo turamiania aintsan uchichik Yuusnan nekaawarusha irunui (2 Ti. 3:​14, 15). Tura chikichkia uunt ajasar Yuusnan nekaawaruiti. Tura chikichkia penke uuntach ajasar pujusar Jehovan nekaawaruiti. Ii umai 97 uwi takakusha Jehovan nekaa yamaipiat imianmiayi.

² Yuusa chichame unuimiamek? Turutskesha ame apa testigos de Jehová asar Yuusnan jintintramainiawak? Imiantiasam wakeratsmeash? Nuka penkeraiti. Tumaitkiusha imiantsuk Yuusai sumamsatniuitme. Nuna yamai aujmattsattaji. Nuyasha Yuusai sumamsam imiantinsha urukamtai ashamkashtiniaitiam nunasha aujmattsattaji.

YUUSAI ITIURA SUMAMSATNIUITIAJ?

3. Yaunchuksha ya Yuusai sumamsaru armia nu anaikiarta.

³ Yuus papiinium sumamsatin tana nuka Yuusna asamtai akantukman tawai. Israel aentska Jehovai sumamsaru armiayi. Antsu warumchikkia Jehovanu ainiawai tusar juukmasha iruniarmiayi. Sacerdote uuntri ati tusa Jehová Aaronkan anaikiamiayi. Tuma asamtai ninkia muuknum etsenkrutainiam aarman takumiania nujai Yuusai sumamsauyania nuna nekaawarminiuyayi (Lev. 8:9 TNM). Nazareo armiania nuka Jehovai sumamsaru armiayi. Nazareo tamaka  hebreo chichamjai nazír tama nuniayaiti. Nu chichamka akantukma turutskesha sumamsa tu tamaiti. Nazareo aentscha warinia umikiartiniuya nusha aarma amiayi (Wek. 6:​2-8).

4. a) Urukamtai Yuusai sumamtain? b) Yuus umirkattsar wari iniaisatniuitiaj? (Nakumkamusha iista).

⁴ Yuusai sumameakrikia Jesusan nemarin ajakur tura Yuusna nu emka turatin asar ainis turutainti. Nunis asamtai wari turutain? Jesús junis timiayi: “Yaksha winia nemartustaj takunka ni wakeramurin iniais [...] winia tuke nemartusti” tu timiayi (Mat. 16:24 TNM). Aujeajnia aintsan ii wakeramuri iniaisatniuitji. Tuma asamtai Yuusai sumameakur Yuus nakitiana nu iniaisatniuitji (2 Kur. 5:​14, 15). Tsanirmatniusha tura ii ayashi wakeramusha nakitratniuitji (Kar. 5:​19-21; 1 Kur. 6:18). Ainis nakitratniuka itiurchatchaiti Jehová aneakmeka tura yajauchia nuna kishmaknaka penker pujuttajai tu enentaimkiumka yupichuch umiktatme (YKan. 119:97; Is. 48:​17, 18 TNM). Ii yachi Nicholas junis tawai: Yuus tana nu umiktincha amijiaisha uruksait? Sepunam apenmia pujamna ainis enentaimiamek? Turutskesha uunt yawa irunu asarmatai jirujai penkramunam ameka aa wajamna ainin enentaimtam?

5. a) Yuusai sumamsatai tusar wari itiurtain? b) Imiantin tura sumamsatniujai metekeashit? (Nakumkamusha iista).

⁵ Yuusai sumamsatai tusar wari itiurtain? Yuusai sumameakur Jehová amin tuke enentaimtin atatjai nuya ame wakeramna nu imiankaska umirkatjai  tusar Yuus seatainti. Ashi ii enentaijiai, ashi ii ayashijiai, ashi ii enentaimtairijiaisha nuya ashi ii kakarmarijiaisha tuke anettajme tusar ainis Yuus seatainti (Ruk. 10:27). Iik pujusar Yuusai sumameakur ainis seatainti. Yuusai sumamsa asar nukap aents pujuiniamunam imiantainti. Yuusai sumamsatniuka nankamsachuiti. Aminiu atajai tajinia nuna Jehová umikiarat tusa wakerawai (Ecl. 5:​4, 5 TNM).

JEHOVAI SUMAMSATNIUSHA WARI UTSUKMAKMINIAIT?

6. Urukamtai Jehovai sumamtain?

⁶ Jehová anea asar sumamsatniuitji. Chikich turuinia asarmatai amesha sumamsachuitme antsu Yuusa chichame paant unuimiatki weakum Jehová anea asam sumamsaitme (Kurs. 1:9). Yuusa chichame unuimiatkum Jehovaka nekas iwiaku Yuusana nuna tura ni chichamencha ni kakarmarijiai aamtikramiania nunasha nekaitme. Tura aintsan ni iruntramurijiai ni wakeramun umiana nunasha nekaitme.

7. Yaksha Yuusai sumamsattsa wakerakka wari itiurkatniuit?

⁷ Yaksha Yuusai sumamsattsa wakerakka Yuusa chichame tana nuna neka atiniaiti tura nui tana nusha umirkatniuiti. Aintsan chikich aentsnasha nuna etserkartiniaiti (Mat. 28:​19, 20). Nuyasha Jehovan anea asa nin umirkattsa  wakeruktiniaiti. Amin Yuusa chichame unuitiameana nu ame apa turutskesha nuku nuyanchuka ame amikrumkesha warasat tusam imianchatniuitme antsu nekaska Jehová waramtiksattsam imiantiniaitme.

8. Urukamtai Yuusai sumamsatniusha wakerutain? (Yus Kanta 116:​12-14).

⁸ Jehová ti yainmaku asakrin ni yuminkiakur Jehovai sumamsatniun wakerutainti (Yus Kanta 116:​12-14 aujsata). Yuus papii tawai: “Ashí péṉker ana nu, ashí shiir ana nusha nayaimpinmaya̱ Yusak amasuiti” tu tawai (San. 1:17). Iin anenkrata asa Yuuska ni uchiri Jesusan iini jakat tusa akupturmakmiaji tuma asamtai Jehová amikri aminiaitji. Nuya uruma nuisha tuke iwiaku pujumniaitji (1 Juaṉ 4:​9, 10, 19). Jehová anea asar tura ni yainmakuitiajnia nuisha enentaimsar nini sumamsatniuitji (Muis. 16:17; 2 Kur. 5:15). Tuke iwiaku tana nu papiinium akankamu 46, número 4 nuinkia nunanu aujmatui nuyasha Yuussha wari susamniaitiaj? tana nu videosha awai.

JEHOVAI SUMAMSATTSAM TURA IMIANTIASAM IWIARNARUKAITIAM

9. Jehovai sumamsat tusar urukamtai utsukchartiniaitiaj?

⁹ Jehovai sumamsattsan tura imiantiasan iwiarnaran pujatsjai tu enentaimtsumeash? Jehová umiktasam ame iwiakmaram yapajniaki wetiniashitiam turutskesh Yuusna nu nukap unuimiatratin utsumatsmeash? (Kurs. 2:​6, 7). Yuusa chichame unuimiainiana nu metekrak Yuusan enentaimtustin juarainiatsui tura natsamaru ainiana nu warik Yuusan enentaimtustin wakerichush iruneawai. Chikich turuiniana nu iirtsuk ame jeamuk turata (Kar. 6:​4, 5).

10. Jehovai sumamsattsam tura imiantiasam iwiarnaram pujachkumka wari turamniaitiam? ( Ame apa ame nukusha testigo de Jehová ainiakui tana nuisha iista).

¹⁰ Jehovai sumamsattsan iwiarnaran pujatsjai tu enentaimiakmeka nu umiktasam kakaki weta. Jehová yainkiata tu seamniaitme (Jir. 2:​12, 13; 3:16). Ame seamna nuna Jehová anturtamkattawai tura yainmaktatui (1 Juaṉ 5:​14, 15).

URUKAMTAI CHIKICHKIA JEHOVAI SUMAMSATNIUN TURA IMIANTINNIASHA ASHAMAINIA

11. Jehovasha umirtukarat tusa itiur yainkratniuit?

¹¹ Yuusai sumamsatniun tura imiantinniasha ashamainiasha irunui. Ti tunaamkamtai jiki ajapruawartatui tu enentaimiarminiaiti. Jehová timiatrusan umirtukarat tusa ni aentsrin yainiaiti Yuus papii ainis tawai (Kurs. 1:10). Tuma asamtai penkera nu turatniun Jehová ni kakarmarijiai yainmaktatui. Jehová chikich aentsnasha nu turatniun yainkiaruiti (1 Kur. 10:13). Jehová yayamu asar testigos de Jehová ajasaruka Jehovaiya aran ajainiatsui. Jehová yainmakrin tuke umirkamniaitji.

12. Tunaa katsuntrattsar wari itiurkatniuitiaj?

¹² Tunaarintin asar ashi aentsti yajauchia nu turamnia enentaimsamniaitji  (San. 1:14). Tumaitkiusha ii katsuntrataj takurkia katsuntramniaitji. Chikichkia wikia katsuntratniunka jeatsjai ainis tiniu ainiawai. Tumaitkiusha warinkisha katsuntratniuka jeaji. Warinkisha ii enentaimmia tura ii najanattsar wakeramusha katsuntratin unuimiatramniaitji. Tuke tsawan Jehová seatniuitji, Yuusa chichame tuke atsakamutin unuimiatratniuitji, iruntramunmasha wetiniaitji tura Yuusa chichamesha etserkatniuitji. Nu turakrikia tunaa najanamnia nekapeakrisha katsuntrattaji. Jehovaka katsuntratniun tuke yainmaktatji (Kar. 5:16).

13. Josesha Yuusan umirkattsa itiurkamia?

¹³ Tunaa najanamnia nekapeakun nuisha wari itiurkatjak tusar emka enentaimsatniuitji. Nu turar tunaa yupichuch nakitrattaji. Yaunchuksha aishman nuya nuwa Yuusan umirin armiania nusha tunaa kishmakarmiania nuna Yuus papiinium aujmatui. Potifara nuwenka iijiai pujustaiya Josen tuke tu wemiayi. Turamsha José nakit wemiayi. Tura junis tu wemiayi: “Maa, nú yajauchin túran Yúsrun umirtsuk ti tunaan túrawaintjiai. Nusha ¿itiurak aint?” ainis tu wemiayi (Náṉ. 39:​8-10). José Potifara nuwe iijiai pujustaiya amajeamsha warik kishmakmiayi. Ninkia warinia itiurkainjiak tusa iinkia enentaimsa asa ainis warik turamiayi.

14. Yajauchia nu kishmaktai tusar wari itiurkamniaitiaj?

¹⁴ José itiurkamia aitkiasrik iisha wari itiurkamniaitiaj? Tunaa turamnia nekapeakun aini najanattajai tusar emka enentaimsatniuitji, nu turakrikia aya neachma tunaanum enkemkamnia nekapeakrisha tunaa nakitratniusha yupichuch atatui. Yajauch turamnia enentaimiakrisha nuin enentaimiu pujuij tusar warik nakitratniuitji (YKan. 97:10; 119:165). Nu turakrikia tunaa najanashtatji.

15. Yuus nekas eaktaj takumka wari itiurkatniuitiam? (Israernum 11:6).

¹⁵ Yuusa chichame jintinkrateana nu paant neka asam testigo de Jehová ajastasam wakerakmesha urukamtai nu turatniun tujintiam? David ninkia junis timiayi: “Yusá, winiasha íirsata,  winia enentái̱rsha nekartuata. Tura winia enentáimsamurui̱sha yajauchia nusha péṉker nekamtikruata. Wi yajauch túrukarma áiniakuisha nusha paant awajtúrsata. Túram tuke iwiaaku átinia nuní̱ jintintruata” tu timiayi (YKan. 139:​23, 24). Yuus nekas eaktaj takurkia Yuusai sumamsar imiantiniaitji. Ainis turakrinkia Yuuska ti nukap penkeran amastatji (Israernum 11:6 aujsata).

JEHOVAI TUKE WEAMKATA

16, 17. Testigos de Jehová ajasaru ana nuna uchirincha Jehová winia nekartuawarat tusa itiur yainkratniuit? (Juan 6:44).

¹⁶ Niniu nekaawar ni iruntramurin pachitkia arat tusa Jehovaka aentsun yainiaiti Jesús tu timiayi (Juaṉ 6:44 aujsata). Nuka ti penkerapitia. Jehovaka aentsu enentai nekarea asa ni penkerin achiakeana nuna iis nu aents winia nekarat tusa yainiaiti. Yuuska winiaru arat tusa chikichkimias akantamkaitji (Muis. 7:6).

¹⁷ Ame apa, ame nuku Yuusna jintintramawaru asarmatai Jehová winia nekarat tusa winiaka nakak yainkiachuiti tu enentaimtsumeash. Turasha Yuusa chichame junis tawai: “Yusai̱ni̱ weamkata tura Ni atumín wearmáktatrume” tu tawai (San. 4:8; 1 Crón. 28:9 TNM). Ame Jehovai weameakminkia nisha amincha wearmaktatui. Ni iruntramurin pachitkiainiana nuna chikichkimsar winia nekaartuat tusa Jehová yainkiaruiti. Nuyasha testigos de Jehová nuna uchirincha chikichkimias ainis yainkiaruiti. Sántiak 4:8 tana aintsan yaksha Jehovai weameakuinkia Jehovaka nincha weamtuktatui (2 Tisarúnikianam 2:13 nui tana nujai iista).

18. Chikich akankamunmasha wari unuimiatrattaj? (Yus Kanta 40:​8, 9).

¹⁸ Aparu ame wakeramna nunak najanattajai tusa Jesús imianmiayi (Yus Kanta 40:​8, 9; Isr. 10:7). Amesha Jesusa aintsamek Yuusai sumamsam imianiakmeka ainis turattajai tusam imiantiatme. Chikich akankamunmanka imianim Jehová umirki wetasam wari itiurkatniuitiam nu unuimiatrattaji.