Uchi asanak kampunniun wakeriniuyajai. Finlandianam irutkamu Jyväskylä pujusan, kampuntin irunmanum wi shuarjai wekainiuyajai. Uchi asanka yawan tura michikin wainkianka miniakattsan wakeriniuyajai. Uunt ajasnaka yajasman tura takun yajauch amajainiakui itiurchat enentaimmiajai. Yajasma tura tanku ainia ayampruktai tusar iruntraru armia nui wisha pachinkiamiajai.

Laboratorionmasha tura nuapjai pushin najanawar suruktasar yajasman waitkiainiawai tu etserniuyaji. Tura aintsan yajasman yajauch najanawarain tusar chikich iruntramusha najanamiaji. Yajasma tura tanku ainia ayampruktai tusar aents kajerakrin policía nukape achirkarmiayi tura jueznumsha jurukiarmiayi.

Chikich itiurchatcha amukat tusan wakerimiajai. Nu asan Amnistía Internacional nuya Greenpeace nu iruntramunam pachinkiamiajai. Nui pachinkian ti yaimniuyajai. Nuyasha yurumkan achiakainiachun tura kuitrinchan ayampriniuyajai.

Tsawan nankaamaki weakui itiurchat irunna nuka amukchamniaiti tu enentaimsamiajai. Chicham iwiarakrincha chikich itiurchatka nurant ajaki wemiayi. Ashi nunkanam yajauch aimnakua nunisan enentaimsamiajai tura aentscha yaimkiatniun nakitiainia nunisan iiyakun majat enentaimpramiajai.

Yaunchu Yuusa chichame testigos de Jehová jintintruawarmiayi. Ninkia ti penker armiayi, tumaitkiusha wi wakeramun najanman iniaichamiajai. Kuntuts enentaimiakun ataksha Yuusa chichamen aujat juarkimiajai.

Yuus papii aujsan shiir enentaimpramiajai. Tanku itiur iistiniait nuna aujsamiajai. Nekatai̱n Jintinkiartin [Proverbios] 12:10 tawai: “Shuar ni taṉkuri̱n waitnenniua nuka winia taṉkur yurumá ejemar pujusat tusa waitnentas wainiui”. Tura aintsan Yuuska aents waitsarain tusa nakitiamun nekaamiajai. Aentska Yuusa umirainiachu asa waitiainiawai. Jehovaka waitanenkratniun tura warik kajechun nekaan warasmiajai (Yus Kanta [Salmo] 103:​8-14).

Papii ¿Qué enseña realmente la Biblia? tana nu akupturkatarum tusan papiichin aaran akupkamiajai. Tura atak testigos de Jehová tarutiarmiayi. Nui ataksha Yuusa chichame unuimiat juarkimiajai. Testigos de Jehová iruntairi tuke wea asan Yuusa chichame jintinkratma enentairui ejeturamiayi tura umiktinian wakerukmiajai.

Yuusa chichamen unuimiatran tsaank mukunatniun, nampektinniash, yajauch chichatairnash iniaisamiajai. Penker iwiarmamtan juarkimiajai tura anairamun ainiancha arantutan nankaamamiajai (Rúmanam 13:​1). Yaunchukka tsanirmatniun yajauchichua nunisan enentaimtiniuyajai. Yamaikia ainis enentaimtsujai.

Aents waitiainia nuya yajasma ayampruktai tusar iruntraru ainia nunia jiinkitin yupichuchichuyayi. Nuna ikiuaknaka anankartinia ainis atatjai tu enentaimmiajai. Tumaitkiusha Yuusa chichame unuimiatkun itiurchatnaka Yuusa anaikiamuri amuktinian nekaamiajai. Yuus anaikiamu aents nekaawarat tusa jintiatjai tu enentaimsamiajai (Matéu 6:33).

Yaunchukka aentsun metekrak iichuyajai. Ninkia penkeraiti tura auka yajauchiti tu enentaimtiniuyajai. Tuma asan yajauch najanainian ti kajerniuyajai. Yamaikia Yuusa chichame unuimiaru asan aentsnaka kajerainiatsjai antsu aneasartasan ti kakaajai (Matéu 5:44). Aentsu anena asan Yuusa chichamen ujainiajai. Aents Yuusa chichame unuimiatrar uruma nuinkia itiurchat atsuttawai tu enentaimiainiawai. Tura yamaikia nawamnaikiatniun tura warasar pujustinian unuimiatainiawai.

Itiurchat iwiaratniunka Jehová iisti tusan iniaisaitjai, tuma asan shiir enentaimiajai. Jehová mash najanka asa yajasmasha tura aentscha waitsarain tusa nakitiawai, nuya ju nunkancha emeskarain tusa nakitiawai. Tuma asamtai ni anaikiamuri aents ju nunkan yajauch amajainia nunaka amuktatui (Isayas 11:1​-9). Yuus turattana nuna chikich aentscha nekaawarat tusa jintintiainiakun waraajai. Yaunchukka itiurchat irunna nuna amuktaj tu enentaimniuyajai antsu yamaikia tuuka enentaimtsujai.