Apa uchirin chicharuk “Nunkanka tura nayaimpinkia yaunchuk Yuus najanamiayi, tura entsancha nantuncha nuya yaancha najankaiti”. Takui uchi enentaimia ajasan “Nuyanka Yuusnasha ya najanait?” tinti.

Tutai ni apari chichaak “Yuusnak yaksha najanachuiti. Tuke pujuwiti” tinti. Uchikia aintsachuashit tusa atakka anintruschainti. Uchi tsakaki weak “Nayaimpiniam nuya nunka irunna nuka najankamuiti tura Yuussha tuyan tawit?” nuna nekattsa wakerinti.

Yuus papiinmasha wari tawa? Moisés Jehovan junis timiayi: “Náintiash najana apujtsuk nuṉkasha tura ashí nui̱ irunainia nusha najantsuk yama náṉkamtaikniumia̱sha yáunchusha yamaisha tuke pujú Yúsaitme” (Yus Kanta [Salmo] 90:1, 2, *). Tura Yuusna etserin Isaías junis timiayi: “Átumka nékatsrumek tura antukchakaitrum? Uunt Yuska tuke pujuwiti” (Isayas 40:28, *). Judas papiinmasha nunisan aujmateawai: Yuuska “Yáunchusha, yamaisha, tura tuke ashí akupin atí” (Jútas 24-25).

Tura aintsan Pablosha Yuuska “uwir uwir tuke” pujuwiti timiayi (1 Timiutéun 1:17). Kame Yuuska yaunchuksha tuke pujuyayi tura yamaisha tuke pujawai (Apukarípsis 1:8). Yuusnaka yaksha najanachuiti, tuke pujuwiti, tura tuke pujuttawai.

Yuuska tuke puju asa mil uwikia nijiainkia chikichik tsawanta nunisaiti (2 Pedro 3:8, TNM). Iikia ishichik tsawan puju asar Jehová enentaimniua nunisar enentaimsatin jeatsji. Manchikia 50 tsawanchik pujuwiti. Aentstikia 70 turutskesha 80 uwi pujuwitiaj nunaka manchikia penke nekachminiaiti. Aentstikia Yuus enentaimniua nunisar enentaimsashmin asar manchia nuniniaitji (Isayas 40:22; 55:8, 9). Tuma asar Yuus tuke pujuwa nuka timiatrusar nekaachminiaitji.

Tumaitkiusha watskea jui enentaimsatai: Yuusan yaksha najanaitkiuinkia, Yuusan najana mashiniun najana aminiaiti, nekaschak? Antsu Yuus papiinium Jehová ashi najankaiti tawai (Apukarípsis 4:11). Tura aintsan nayaimpiniam tura nunka irunna nuka yaunchuka atsumiayi (Génesis 1:1, 2, TNM). Yuuska ni uchirisha nuya ni suntarisha atsuiniai tuke pujumiayi (Juup 38:4, 6-7; Kurusenam [Colosenses] 1:15). Yuuska ashi irunna nuna najantsuk ninki puju asamtai Yuusnaka yaksha najanachuiti taji.

Nayaimpiniam tura nunka irunna nusha tui pujuartiniait nui timiatrusan pujuinia asamtai Yuuska tuke pujuwiti taji. Ninkiti mashi iwiaakma amaaka (Job 33:4, TNM).