Guatemala naintrin irutkamu Acul naartinnium akiniamiajai. Winia apachruka mayas armiayi tura wikia ixiles aentsuitjiai. Apach chichamnasha tura winia chichampruncha nekaamiajai. Guatemalanam mesetka tuke aa wemiayi. Nui ixiles aents nukap jakarmiayi.

Aintiuk uwi takumiajna nui winia yatsur granadajai nakuru pujumiayi. Granada patimtai ninkia jakamiayi tura winiaka jiiru kusurturmiayi. Irutkamu Guatemalanam jii kusuru unuimiatainiam akuptukarmiayi. Nui takasan takasan aujsan unuimiarmiajai. Nuisha amikrunka takuchmiajai. Wichik wekainiuyajai. Nui takakmarmia nu chikich uchijiai chichasain tusa nakitriarmiayi. Tuke uwitin jearui jimiara nantu akuptin armiayi. Unuimiatainiam penker pujachu asan tura winia nukur anentin asamtai nuu tsawan jeat tusan wakeriniuyajai. 10 uwi takaku ai winia nukur jakamiayi. Nukur jakamtai anentin asamtai ti waitsamiajai.

11 uwi takumiajna nui winia irutkamurui waketkimiajai. Winia kana yatsur jurukmiayi. Wi utsumamunka suriarmiayi. Turasha wi enentaimmianka yaksha nekarticharmiayi. Tuma asan “Yuusa, urukamtai nukursha jakama tura urukamtai jiirush kusuruit” tusan uutniuyajai. Aentska ame nukunka Yuus juukiyi tura jii kusuruitmena nusha Yuus aitkiarmaiti turutiarmiayi. Nuna turutainiakui, Yuuska yajauchichuashit tu enentaimniuyajai. Maamatniuncha enentaimmiajai.

Jii kusuru asan ayamprumakchamniuyajai. Tura uchiyajna nui nukape violajattsarmiayi. Anturtukchartatuapi tusan violajattsarmataisha etserkachmiajai. Aentska ishichik aujtin armiayi. Itiurchat enentaimiu asan tura aents yajauch najatawarain tusan yajainsha chichastinian nakitniuyajai.

13 uwi takumiajna nui unuimiatainiam profesora waitnentra asa testigo de Jehovan ikiakartarum tiaruyayi. Tuma asamtai yatsuch ni nuarijiai unuimiatainiam jeartiarmiayi. Jii kusurusha iimsartatui tura jakarusha nantakiartatui Yuus papiijiai tu jintintruawarmiayi (Isayas 35:5; Juan 5:28, 29, TNM). Jintintruiniakui antuktasan wakeraknasha yajainsha aujmatcha asan chichachuyajai, tumakuisha testigo de Jehová waitnentriarmiayi tura shiir amajtiarmiayi. Nuya Yuusa chichamen jintintruawartasa ti arantaitkiusha wekasar nunia nainniasha warukar winia irutkamurui jeawarmiayi.

Jii kusuru asamtai winia kana yatsur chichartak “testigo de Jehovaka kuitrincha ainiawai tumaitkiusha penker iwiarmamprar tainiawai” turutmiayi. Warinkish suruinia asamtai nekas Kristu aents asar yaintiainiawai tu enentaimsamiajai.

Papii jii kusuru unuimiataijiai takasan takasan Yuusa chichamen unuimiatmiajai. Unuimiaki weakun mash nekaki wemiajai. Tumaitkiusha Yuus nekas anentawash tura chikich aentscha anentainiawash tu enentaimmiajai. Jehová urukamtai waitsarat tusa iniaitiamaj nuna nekancha Yuus winia aparu nunisash anenta tu enentaimmiajai. *

Yuusa chichame unuimiatki weakun nekas Yuus anentawash tu enentaimmianka iniaisamiajai tura aintsan ii waitiakrin Yuussha waitniua nuna nekaamiajai. Nin umirainia nu waitiainiakuinkia Yuus junis tawai: “Wáitiainiak tí kuntuts pujuinian nekas nekaajai” (Jíinkiarma [Éxodo] 3:7). Jehovaka anenkratniun nekaan ni wakeramun najanamiajai. 1998 uwitin imianin testigo de Jehová ajasmiajai.

Iruntramunam wetin ti arantauyayi. Naincha amiayi nuni waketniuyajai. Imianimiuka chikichik uwi nankaamasan irutkamu Escuintla naartinnium jii kusuru unuimiatainiam unuimiarmiajai. Iruntramunam weakun waitiamun uunt anaikiamu nekaartua chikich yatsuchin amijiai pujuschamniakait tusa aujsamiayi. Yamaisha nuin tuke pujajai. Ni shuara nunisan penker waitiainiawai.

Yatsuch umach waitnentruraru asarmatai testigo de Jehovatikia nekas Kristu aentsuitji tu enentaimiajai (Juaṉ 13:34, 35).

Yamaikia yanaksha ashamatsjai. Jii kusuruitjiapi tuuka enentaimiatsjai antsu chikich aentsun Yuusa chichame jintiniajai. Testigo de Jehová iruntramurin uuntri anaikiamuitjai. Chikich iruntramunmasha tura aents untsuri tuakmanmash jintinkratniuitjiai.

2010 uwitin Yuusa anaikiamurin nukap etserkarat tusa unuimiatainiam chikich nunkanam El Salvador naartinnium wemiajai. Yatsuch tura umach ikiakarartinian nui unuimiatramiajai nuya Jehová shiir enentaimturun tura anentamun nekaamiajai. Jehovaka niiniun takakmasarat tusa yanaksha yainminiaiti.

Jesús timiayi: “Achíana núja̱i̱ṉkia naṉkaamas, súana nuka shiir waraawai” (Túramuri̱ [Hechos] 20:35). Yamaikia aentsun yainmin asan ti warajai.