República Democrática Alemana, Sajonianam, irutkamu uchichiniam akiniamiajai. Winia aparka anentainiak penker turatniun jintintruawarmiayi. República Democrática Alemana uunt naamka armia nu, comunista asarmatai, Sajonianmaya aentska religión ainia yainkratcha ainiawai tu enentaimin armiayi. Uchichik comunismo penkeraiti, tura Yuus atsawai tu enentaimsan tsakarmiajai.

Aents metekrak arat tu enentaimniuyajai, tuma asan comunismo penkeraiti timiajai. Tura aintsan aents warinkish metekrak takuartiniaiti tu enentaimniuyajai. Ti kuitrinniusha tura ti kuitrinchasha atsut tusan wakerimiajai. Natsamaru comunista ainia iruntramurin pachintan juarkimiajai. 14 uwi takumiaj nui papii juukman warinsha najanawarat tusan ti nukap takakmasmiajai. Nuna tura asamtai uunt anaikiamu irutkamunam yaimkaitme tusa diploma surusarmiayi. Uchi asanak uunt anaikiamu naatka ainian nekaawarmiajai. Ti penker takakma asan penker pujuttajai tu enentaimsamiajai.

Tumaitkiusha 1989 uwitin Berlinnum tentakma aan purarmiayi. Uunt naamkaru comunista ainian aentska nakittan juarkiarmiayi. Comunista ainiachunka kajeru pujurin ainian nekaamiajai. “Comunistatikia ashi aents metekrak enentaimtustiniaitji. Urukamtai nunasha turawaruit?” tu enentaimsan ti itiurchat enentaimpramiajai.

Nuyanka tuntuisamun tura nakumkatniun unuimiartajai tu enentaimsamiajai. Uunt unuimiatainiam wemij tu enentaimiu asan, tuntuisamu unuimiatainiam enkemamiajai. Winia apar penker turatniun jintintruawarmia nunasha kajinmatkimiajai. Aya warastinniak enentaimtumamiajai, tura nukap nuwajai wekaimiajai. Tuntuiyaknasha tura nakumeaknasha tura wi wakeramun najankuncha shiir enentaimchamiajai. Ukunmataish urukatniukitiaj tura urukamtai iwiakaj tu enentaimsan ti itiurchat enentaimmiajai. Wi itiur enentaimmiaj nunak nakummiajai.

Unuimiatainiam pujusan winia air ukunmataish urukuk ati tu aujmatainian antukmiajai. Nui chikichik testigo de Jehová, Mandy * naartin pujumiayi. Ni chichartak: “Andreasa, aruma nui uruku atata nu nekaataj takumka Yuusa chichame unuimiatrata” turutmiayi.

Yuusa chichame tana nu nekasashit tu enentaimiatnak nekatasan wakerimiajai. Mandy, Daniel akankamu 2 iniaktursamai. Yaunchuksha uunt naamkaru ti kakaram, tura naatkaru irunniuya nuna aujsan ti enentaimsamiajai. Nuyasha yamai tsawan uunt naamka kakaram ainia Yuusa chichame aujmateamun nekaamiajai. Tura chikichniasha aruma nui wari nankaamastata nuna Yuus papiinmanian iniaktursamtai wi nekatasan wakeramun nekaamiajai. Tumaitkiusha aruma nui timiatrusan nankaamastinniasha yaki aaruit? Yuus aamtikrachuashit? Nekas Yuus atsuash, tu enentaimsamiajai.

Mandy amikri, Horst ni nuari Angelikajai, Yuusa chichamen unuitiutan juarkiarmiayi. Testigo de Jehová ainiaka Yuusa naari tuke pachisar etserin ainian nekaamiajai (Yus Kanta [Salmo] 83:18; Matéu 6:9). Jehová aents tuke pujusarat tusa ju nunkan shiiram amajsattana nunasha nekaamiajai. Yus Kanta [Salmo] 37:9 tawai: “Nin umirkaru ainia núnaka Uunt Yus nuṉkan súsartatui”. Yuusa umirkattsar kakainiaka tuke iwiaku pujusartinian nekaan shiir enentaimsamiajai.

Yuusa chichame umiktin yupichuchichuyayi. Tuntuiniatniun tura nakumkatniun neka asan nankaamantu enentaimniuyajai. Nankaamantu enentaimsaij tusan ti kakarmiajai. Tura aintsan tsanirmamu ikiuktin itiurchatauyayi. Jehovaka ni chichame umiktasa kakana nunaka waitnentas katsuntin asamtai ti yuminkiajai.

Comunismo penkeraiti tura Yuus atsawai uchichik tu enentaimsan tsakarmiajai. Tumaitkiusha urukamtai iwiakaj tura uruma nuisha urukatniukitiaj nunaka Yuusa chichamen nekaamiajai. 1993 uwitin imiannin testigo de Jehová ajasmiajai, tura 2000 uwitin Tabithan nuatkamiajai. Ninkia asumprus Yuusa chichamen etserniuiti. Aents Yuusa chichamen nekaawarat tusar jintiniaji. Comunismo penkeraiti tu enentaimiainian tura Yuuska atsawai tiniu ainian, Jehovan nekaawarat tusan jintiakun ti warajai.

Testigo de Jehovajai Yuusa chichamen unuimiat juarkimtai winia aparka yajauch enentaimturiarmiayi. Tumaitkiusha Yuusa chichame unuimia asan yapajniaki weakui nuna iisar nisha Yuusa chichamen unuimiatan juarkiarmiayi. Yamaikia nisha testigos de Jehová iruntramurin tuke wena asamtai ti warajai.

Yuusa chichame nuatnaikiaru itiur pujusartiniait nu Tabithajai unuimiatraitji. Nuatnaikiaruka chikichan eakchartiniaiti tana nu umia asar shiir pujaji (Israernum [Hebreos] 13:​4).

Yamaikia uruma nuisha urukatniukitiaj tu enentaimtsujai. Yaunchuksha ashi aents metekrak arat tu enentaimniuyajai. Testigos de Jehová ashi nunkanmania ainiayat shiir nawamnairar matsatainiamunam pachitkia asan warajai.