WATSKEA, museo iistasam jeam nuwejai yaunchu najankamu jakuru, chinkiara tura mamurush waininmetai. Tura chikichkia yaunchu najanamuitkiusha timiatrusan mamurcha wainiakum “yamarmakait?” tu aniasainme museon iniakma. “Ti yaunchuk najanamuiti tumaitiat timiatrusan awai” turaminti. “Juka penker ikiusmakait?” tu aniasainme. “Atsa, nase ajamunmash tura yumi ajamunmash nankaamasuiti nuya aentscha ijiakrattsa wakerukaruiti” turameakui “Nuyanka, warijiai najanamuit?” tu enentaimsainme.

Nuwejai yaunchu najanamuitkiusha jakutsuk timiatrusan ana aintsaiti Yuus papii jintinkratmasha. Yaunchuk aarmaitkiusha tuke yainkratniuiti. Antsu chikich papii yaunchuk aarma irunna nuka aintsachuiti. Ti unuimiararu yamaikia chikichan nekaawaru asar yaunchuk aararmiania nunaka jintinkratainiatsui. Tura yaunchuk aarmaka yamaikia janarush tura menkakasha nunia arutmarush ainiawai.

Yuus papii aarmaka 3500 uwi nankaamasuitkiusha tuke yainkratniuiti. Yaunchukka Yuus papiin aujsarain tusar aeskarmiayi. Tumaitkiusha nui jintinkratmaka menkakachuiti. Ti unuimiaru ainia nuka Yuus papiikia yaunchuk aentsnaiti tiaruiti. Tumaitkiush Yuus papiinmanka aentska nekainiatsain nekasa nu aarma amiayi.

Yuusa chichame nekas yainkiamniashit tu enentaimsamniaitme. Watskea, yamaiya juinkia mesetsha katsunkartamusha waitramusha anankartamusha iruneawai. Nuya entsasha, nunkasha, mayaisha ti emeskamuiti. Yuusa chichame jintinkratma aujkum juisha enentaimsata; aents Yuus papii tana nuna uminiakka, nunka urukunman pujusarminiait?

KAKARAR NAWAMNAIKIARTAI

“Itiurchat ámanum chícham iwiararum aṉkant awajkartintirmesha tí shiir enentáimsamniaitrume” (Matéu 5:9). “Ame jeamna nuja̱i̱ ashí shuarja̱i̱ nawamnaikiam wekasata” (Rúmanam 12:18).

WAITNENNAIRARTAI TURA TSANKURNAIRARTAI

“Waitneṉkratniutirmesha tí shiir enentáimsamniaitrume. Warí nekaska átum waitnennartatrume” (Matéu 5:7). “Antsu shiir awajkartin ajasrum waitnennairarum Kristu jakamuja̱i̱ Yus atumí tunaari̱n tsaṉkurtampra nútiksarmek tsaṉkurnáiratarum” (Ipisiunam [Efesios] 4:32).

ASHI AENTSJAI METEKRAK INIAISARTAI

“Ashí nuṉkanam matsamsarat tusa nú numpanmaya̱nak ashí aentsun najanamiayi” (Túramuri̱ [Hechos] 17:26). “Yus íimmianum ashí aents métekrak áiniawai nekas nékajai. Antsu ashí nuṉkanam náṉkamas aents Yusan umirak péṉker tura nuna Yus nú aentsun shiir enentáimtawai” (Túramuri̱ [Hechos] 10:34, 35).

NUNKA PENKER IISARTAI

“Kame takakmak wainkiat tusa Uunt Yus áishmaṉkan Eten ajanam” apujsamiayi (Náṉkammari̱ [Génesis] 2:15). Ju nunkan emesniunka Yuus amuktatui (Apukarípsis 11:18).

KUITRINTIN AJASTIN TURA TSANIRMATIN WAKERUKCHARTAI

“Péṉker enentáimsatarum. Ni takakna núja̱i̱ṉ shuar iwiaaku áchatniuiti. Tuma asamtai kuítrintin ajastin aya nuke enentáimsaip” (Rúkas [Lucas] 12:15). “Yusna asarum tsanirmatniusha yajauch túratniusha tura jú̱ nuṉkanmaya̱ṉ ikiauṉkatniusha ishichkisha enentáimtuschatniuitrume” (Ipisiunam [Efesios] 5:3).

ASHI PENKER TURAWARTAI TURA KAKARAM TAKAKMASARTAI

“Iisha ashí péṉker túratin wakeraji” (Israernum [Hebreos] 13:18). “Kasasha kasamtsuk kakaram takakmasti. Tura ni uwejé̱ja̱i̱ péṉker takaak atsumainia nú shuarnasha susati” (Ipisiunam [Efesios] 4:28).

UTSUMANA NU IKIAKARARTAI TURA YAINKIARTAI

“Tura yawe̱e̱na nusha ataksha enentáimtikrarum ikiaká̱rtarum. Kakarmachu ana nusha yaiṉtarum. Tura ashí shuarja̱i̱ kajetsuk katsuntrarum wekasatarum” (1 Tisarúnikianam [1 Tesalonicenses] 5:14). “Mitiaikiasha waje̱sha itiurchatnum pujuiniakuisha yáiṉtiniaiti” (Sántiak 1:27).

Yuusa chichamenka wari turatniuitiaj aya nunakka jintintramtsuji, antsu urukamtai kashi kashinin umiktiniaitiaj nunasha jintintramji. Aents Yuusa chichame tana nuna uminiakuinkia itiurchatka atsumniapitia. Yuusa chichame jintinkratmaka nekas tuke yainmaji. Amincha Yuusa chichame warinma yainmakminiait?

Aents ti neka junis timiayi: Aents turana nujai nekas nekanattawai (Matéu 11:19). Jintinkratma umia asam penker pujakum, nu jintinkratma nekasaiti tu enentaimsattame. Tura aintsan, Yuus papii jintinkratma itiurchat pujamun yainkiamniapitia. Yuusa chichame aentsun itiur yainkiaruit nu nekaatai.

Diana * penker pujayat neachma ni nawantri jakamiayi tura aishrisha ajapa ikiukmiayi nuya kuitchajai juakmiayi. “Jeartichu, aishrincha tura nawantrincha juakan, majat enentaimiakun, yamaisha urukattaja tu enentaimmiajai” timiayi.

Yuusa chichame junis tawai: “Ii iwiaaku pujustin tsawantka sataintia uwichikiti tura ti kakaram ainia nuka uchaintia uwí pujuiniawai. Tura ti iwiaaku pujamsha ti ititiaiti tura takataiti tura ii uwiri̱sha wari naṉkaamawai” (Yus Kanta [Salmo] 90:10). Diana, Yuus papiinium tana nuka nekasaiti tu enentaimsamiayi.

Itiurchatan katsuntrattsa Yuusa chichame tana nuna umiktasa kakarmiayi. Diana turamia aintsan nukap aents itiurchat pujuinia Yuusa chichamejai penker pujustinian unuimiatraruiti. Yuus papii yaunchu aarmaitkiusha, jintinkratmarinkia tuke yainkratniuiti tu enentaimiainiawai. Chikich papiinmanka yaunchu aarmaka yainkratkachmin ainiawai. Yuusa chichame chikich papiijiai urukamtai metekchait? Yuusa enentaiyashit? (1 Tisarúnikianam [1 Tesalonicenses] 2:13).

“Yamaikia ii iwiakmari warik nankaamawai, penker pujuschamniaiti” amesha tu enentaimtsumeash? Itiurchat wainkiakmin yaki yainmakminiait?

Yuus papii warinma yainmakminiait nu, menain nekaatai:

1. Yuusa chichame jintinkratma itiurchat kishmaktinian yainmakminiaiti.

2. Yuusa chichame jintinkratma itiurchat iwiaratniun yainmakminiaiti.

3. Yuusa chichame jintinkratma itiurchat katsuntratniun yainmakminiaiti.