Yuuska nin umirainia jainiakuinkia kajinmatchaiti. Yuusa chichame junis tawai: “Kame jaak najaimiá tepamunmaya̱sha Uunt Yus ikiaká̱rtatui” (Yus Kanta [Salmo] 41:3). Tsuamarchamnia sunkur achiakkumka itiurkatniukitiam nu nekaatai:

1.   Sunkuran katsuntramij tusam Yuus seata. Majat pujakminkia kakarat tusa ame enentaimin “aṉkant átinian, aentstikia peṉké nekaachminia nuna Yus amastatui” (Jiripiusnum [Filipenses] 4:6, 7).

2.   Wara warat enentaimsata. Yuusa chichame junis tawai: “Enentai warakuiṉkia péṉker tsuaka núnisaiti tura kúntuts enentáimmiaka aya̱shniasha jaa awajniuiti” (Nekatai̱n Jintinkiartin [Proverbios] 17:22). Kuntuts enentaimtsuk wishirta, turakmeka ayap enentaimprattame.

3.   Penker atatna nu enentaimsata. Jaakmesha Yuus papii tana nu enentaimsam warasminiaitme (Rúmanam 12:12). Yuusa chichame tawai: “Yaksha nui pujaka ʻjaajai’ tichattawai” (Isaías 33:24, TNM). Tsuamarchamnia sunkuran achiakainia nunasha Yuuska tsuarartatui. Tura aents weampra natsa ajastatui tawai Yuus papiinium: “Ni iniashinkia natsauyania nunasha iniankas penker atatui; natsa asa kakarmauyania anin atatui” (Job 33:25, TNM).

 Jusha aujsata: Testigos de Jehovatikia Yuus yainmaktatji tu enentaimniuitji. Tumaitkiusha jaakrikia tsuamatainiam weaji (Márkus 2:17). Antsu ju tsuakjai tsuamarta, nuka tichaitji. Ninki warijiai tsuamartiniait nunaka iimiasartiniaiti.