Jehovaka nekas Yuusaiti. Ashi irunna nuna najankaiti. (Yus Kanta [Salmo] 134:3). Abrahansha, Moisessha nuya Jesussha nu Yuusnak enentaimtin armiayi. (Náṉkammari̱ [Génesis] 22:14 junin * ana nui aujsata; Neemías 10:29; Juaṉ 20:17). Aya Israel aentsu Yuusrinchuiti antsu “ashí nuṉkanmaya̱n Úunt Akupniuri̱nti” (Yus Kanta [Salmo] 47:2).

 Yuusa chichame tawai: Yuusa naarinkia Jehovaiti. (Isayas 41:13; Yus Kanta [Salmo] 83:18). Ni naarinkia hebreo chichamjainti. Yaunchu hebreo chichamjai chichainia Yuusa naarin pachiniak ni urukuit nuisha enentaimin armiayi. Unuimiaruka junis tiniusha iruneawai: Yuusa naarinkia, wi wakeramun uminiaitjiai turutskesha wi wakeramun umiktasan chikichan utsuajai, tamaiti. Yuuska ni wakeramun umin asa tura mashi najanka asa Jehová naartiniaiti. (Isayas 55:10, 11). Yuusa chichamesha Yuus urukuit nuna jintintramji. Ninkia anenkratniuiti. (Yus Kanta [Salmo] 116:5; Rúkas [Lucas] 6:35; 1 Juaṉ 4:8).

 Yuusa naari hebreo chichamjainkia juni aatainti יהוה (YHWH). Yaunchuk itiur tutaiya nuka imian nekatsji. Tumaitkiusha apach chichamjaisha “Jehová” turutskesh “Yavé” tutainti, tura chikich chichamjaisha aintiaku tuiniawai. Yuusa chichame Reina-Valera, 1862 uwitinia, junis aarmaiti: “Jehová”. Tura La Biblia Latinoamérica nui Yuusa naari junis aarmaiti: “Yavé”. Yus Papí Yusa Chichame̱ Aarma, 2018 uwitinia, nuisha Yuusa naari shuar chichamjai junis aarmaiti: ʻJiuwa’. a

Yaunchuk hebreo chichamjai Yuusa naari itiur tiniu armia nuka timiatrusan nekatsji

 Yaunchuk hebreo chichamjainkia A, E, I, U ainiajai aashtaiyayi. Tumaitkiusha aujainiakka nuna apujtin armiayi. Yuusa chichame Antiguo Testamento aarar amukarmatai judío aentska Yuusa naari pachikchatniuiti tuiniasha irunmiayi. Yuusa chichamen kakantrar aujainiak Yuusa naari akuinkia nunaka tutsuk aya “ii Uuntri” turutskesha “Uunt Yuus” tiniu armiayi. Ainis tuinia asa tsawan nankaamaki weakui Yuusa naari yaunchuk itiur tiniu armia nunaka kajinmatkiarmiayi. b

 Yuusa naarinkia “Yahweh” turutskesha “Yahvé” tu titiniaitji tiniusha iruneawai. Yuusa papiiri yaunchukia Los Rollos del mar Muerto tana nui, Levítico papiinium griego chichamjai Yuusa naari junis aarmaiti: “Iao”. Tura aintsan chikichkia yaunchu griego chichamjai “Iaé”, “Iabé” turutskesha “Iaoué” aararmiayi. Tumaitkiusha yaunchuk hebreo chichamjai itiur tiniu armia nu timiatrusrik nekatsji. c

Yuusa chichamen Yuusa naarinkia atsutniuiti tuiniawai

 Aentska junis tuiniawai: Yuusa naari yaunchu hebreo chichamjai itiur tiniu armia nu timiatrusrik nekatsji. Tuma asamtai ni naarinkia Yuus papiinmayanka japirtiniaiti.

 Antsu juka nekasaiti: Yuuska winia naar hebreo chichamjai itiur tutain timiatrusrumek titiniaitrume turamtsuji. Yaunchuksha Yuusa umirin armia nu aentsu naarin ni chichamejain tiarmiayi. Nusha itiur nekaaj?

 Yaunchu Kristu aents hebreo chichaman chichainiaka Josué tuiniak ni chichamejain “Yeshúa” tiniu armiayi. Tura griego chichaman chichainiaka “Iesous” tiniu armiayi. Nuyasha Yuusa chichame Nuevo Testamento aainiak griego chichamjai “Iesous” aararmiayi (Túramuri̱ [Hechos] 7:45; Israernum [Hebreos] 4:8).

 Yaunchuk hebreo chichamjai Yuusa naarin itiur tiniu armia nu nekachkursha ii chichamejain timiniaitji. Nekaska Yuusa naari Yuusa chichamen aarma atiniaiti.