Yuusa chichame Yuuska awai tu jintintramji. Tura aintsan Yuuska awai chikich tuiniakui nekaschashit tu enentaimsashtinian antsu iik amamkesar unuimiatratniun Yuus papiisha ikiakatmaji (1 Juaṉ 5:20; Rúmanam 12:1). Yuus nekas awai urukamtai tu taji nu nekaatai.

•   Nayaimpiniam tura nunka irunna nusha tui pujuartiniait nui timiatrusan pujuiniawai. Tura Yuus ninkiti mashi iwiaakma amaaka tuma asamtai Yuuska awai taji. Yuus papiinium junis tawai: “Kame ashí je̱a̱n shuar je̱a̱mtsuk. Tura Yus ashí írunna nuna najanaiti” (Israernum [Hebreos] 3:4). Yuusa chichame tana nu nekasaiti. Ti unuimiaru ainia nusha aintsan tuiniawai. a

•   Aentstikia urukamtai iwiakaj nu nekattsar wakerutainti. Yuusa chichame tawai: Aentska aya apatkujain warasar pujuscharminiaiti antsu Yuusa nekaawar umirainiak warasar pujusarminiaiti (Mateo 5:3, TNM; Apukarípsis 4:11). Aentstikia aya apatkujain pujuschamnia asar Yuus awai taji. Yuuska anenkratin asa aents winia enentaimtursar warasar pujusarat tusa najakrataiti (Mateu 4:4).

•   Yuusa chichamen urum turunatin yaunchu aarma timiatrusan uminkiaiti. Itiur uminkiatniuit nusha timiatrusan uminkia asamtai Yuusa chichamenka aentsu enentainchuiti taji (2 Pedro 1:21, TNM).

•   Nunka urukuit nuka aentska nekainiatsain Yuusa chichamenka timiatrusan aarma amiayi. Yaunchuka nunkaka yajasmanam turutskesha warinmansha patateawai tu enentaimin armiayi antsu Yuusa chichamenka nunkaka aya nanateawai tu aarmauyayi (Job 26:7, TNM). Nuyasha nunkaka pelota anin tenteyaiti tawai (Isayas 40:22). Yuusa chichamenka aentska nekainiatsain timiatrusan aarma asamtai Yuus timia asa aararuiti tiniusha iruneawai.

•   Yuus atsawai tiniu ainiana nuka junis enentaimniush iruneawai: Yuus ti waitnenkratin aisha urukamtai waitiamu nuya ti yajauchish irunna? Yuus umireaji tuiniayat urukamtai aentsun yajauch awajin ainia? (Titiun 1:16). Amesha aintsan enentaimkiumka Yuusa chichame unuimiatram nekaamniaitme.