LECCIÓN 7
¿Ndíki̱án kéeún tá káʼáún ña̱ na̱kaa̱ mií túʼún tá yuʼún?
Kunde̱ʼé ta̱lóʼo̱ yóʼo. ¿Á ko̱ ndaa̱ ña̱ yuʼú rá ta mií túʼún rá na̱kaa̱? ¿Á jaá ní yoʼo̱ ió tein ña̱ yuʼún?... Ndiʼi vá yó ndóʼo jaá. Tu̱ʼun Ndio̱s na̱kanian saʼa̱ na̱ ni̱ si̱nukuáchí nuu̱ Ndio̱s, va̱árá kúni̱ ná Jeová, jo jaá ní ni̱ yu̱ʼú va ná tá káʼán ná ña̱ mií túʼún ná na̱kaa̱. Iin tá ni̱ ndóʼo ña̱yóʼo ni̱ si̱naní Elías. Ná kunde̱ʼé yó ña̱ ni̱ ndóʼo ra.
Jezabel kúni̱ ñá kaʼní ñá Elías
Tá si̱naʼá ndiva̱ʼa ni̱ si̱io Elías ñuu Israel, nda̱ kúmani̱ kaku Jesús. Ta tein yóʼo, rey ñuu Israel ta ñajiʼí rá ko̱ kúni̱ ná Jeová, Ndio̱s ndaa̱ ndisa. Rey yóʼo ni̱ si̱naní Acab ta ñajiʼí rá Jezabel, ta kekáʼnu na ndio̱s ko̱ó ndaa̱, naní Baal. Ña̱káa, kuaʼa̱ na̱yivi na̱ ñuu Israel kekáʼnu Baal. Reina Jezabel kini ndiva̱ʼa ini ñá ta kúni̱ ñá kaʼní ñá ndiʼi na̱ si̱nukuáchí nuu̱ Jeová. Elías sínukuáchí ra nuu̱ Jeová, ¡ta jaá ní kúni̱ ñá kaʼní ñá rá! ¿Ndíki̱án kée Elías víti? Ná kachi ini yó ña̱ ni̱ si̱na̱kaa̱ún káa ¿Ndíki̱án kéeún ni̱ kúu?...
¡Elías ni̱ kiʼin ra kuaʼa̱n si̱ká rá! Nuu̱ ñúʼu̱ ichí ni̱ chijéʼe̱ rá káva̱. ¿Ndiva̱ʼa ni̱ chijéʼe̱ rá?... Jáchi̱ yu̱ʼú rá. Jo ko̱ káni̱ yu̱ʼú rá. ¿Ndiva̱ʼa rí? Jáchi̱ síni̱ rá ña̱ kuu chindeé Ndio̱s rá. Si̱ ni̱ sio iin taʼnda̱ ña̱ ni̱ chindeé ñaʼá rá. Tátu̱ʼun, iin kivi̱ jee Elías ni̱ si̱ka̱taʼvi̱ rá nuu̱ Ndio̱s, ta ni̱ sinijo̱ʼo ra̱ ña̱ ni̱ ka̱ʼa̱n rá ta ni̱ chindaʼá ra ñuʼu̱ va̱si ña̱ nda̱á indiví. ¿Á ko̱ ndaa̱ ña̱ naʼa̱ ka̱si vá ña̱ ió ndiva̱ʼa ndeé Jeová? Miía̱ndaa̱ jaá kíán. ¡Kuu kandeé ini Elías Jeová!
¿Ndixi ni̱ chindeé Jeová Elías?
Tá ni̱ si̱na̱kaa̱ Elías káva̱, Jeová ni̱ kachi ra xíʼín rá: “¿Ndá chúun kéeún yóʼo?”. Elías ni̱ kachi ra: “Mií túʼún vai ni̱ kando̱o, ko̱ña̱ʼa ga̱ na̱yivi na̱ sínukuáchí nuu̱ ní. Ta yuʼúi̱ jáchi̱ jaá ní kaʼní ná yuʼu̱”. Káʼán rá ña̱ ni̱ saʼní ná ndiʼi na̱ sínukuáchí nuu̱ Ndio̱s. Jo Jeová ni̱ kachi ra xíʼín rá: “Ko̱, o̱ju̱ú iin túʼún ni̱ kando̱o. Usa̱ mil na̱yivi kekáʼnu ivá ná yuʼu̱. O̱yu̱ʼún, jáchi̱ ió iin chúun ña̱ kúni̱ ná kéeún”. Ta ni̱ ndiʼi ni̱ ka̱ʼa̱n Ndio̱s xíʼín rá, ¿ndixi ni̱ kúu ini Elías?... ¡Ni̱ kujii̱ ndiva̱ʼa ini rá!
Víti nakani iniún saʼa̱ ña̱ ni̱ ndóʼo Elías. ¿Ndíki̱án kutu̱ʼva yó?... Ña java tein kuu kukáʼáún ña̱ mií túʼún na̱kaa̱ ta yu̱ʼún. Jo tá ná ndóʼoún jaá, ¿á síni̱ún ndíki̱án naku̱ʼun iniún? Ña̱ ko̱ na̱kaa̱ mií túʼún, jáchi̱ ió kuaʼa̱ na̱ néʼe táʼan xíʼíún tá kúni̱ ná yoʼo̱, tá jaá ní kúni̱ ná Jeová. Tá o̱na̱ndojóún ña̱ Jeová ió ndiva̱ʼa ndeé rá tá jaá kuití chindeé rá yoʼo̱. ¿Á ko̱ kujii̱ iniún ña̱ jaá kuití na̱kaa̱ Jeová xíʼíún?...
