LECCIÓN 10
Jaá kuití ni̱ si̱sinijo̱ʼo Jesús ña̱ ni̱ ka̱ʼa̱n tatá rá
¿Á jaá kuití kúni̱ yó kée yó ña̱ káʼa̱n tatá xíʼín naná?... Ió tein ña̱ tu̱ndóʼó vá kíán, ¿á ko̱ ndaa̱? Jo ¿á síni̱ún ndíki̱án kuu chindeé yoʼo̱ já ná kunijo̱ʼoún ña̱ káʼa̱n tatá xíʼín naná? Ná kunde̱ʼéún ña̱ ni̱ kee Jesús. ¿Á síni̱ún ña̱ jaá kuití ni̱ si̱sinijo̱ʼo rá ña̱ ni̱ ka̱ʼa̱n Jeová tá jaá ní tatá rá xíʼín naná rá?... Yóʼo kutu̱ʼva yó cháá ga̱ saʼa̱ Jesús.
Si̱jaá ni̱ si̱io vá Jesús indiví xíʼín Tatá rá, Jeová, jaa ni̱ kisi ra nuu̱ Ñúʼu̱ yóʼo. Jo tá ni̱ si̱io rá nuu̱ Ñúʼu̱ yóʼo, jaá ní ni̱ sio tatá rá xíʼín naná rá. Tatá rá ni̱ si̱naní José ta naná rá María. ¿Á kúni̱ún kundaa̱ iniún ndixi ni̱ kuu já ni̱ kúu tatá rá na̱yóʼo?...
Já ná kuu ka̱ku Jesús nuu̱ Ñúʼu̱ yóʼo, ni̱ kee Jeová iin milagro. Ni̱ kee ra ña̱ Jesús na̱ kuaʼnu rá ti̱si María, tátu̱ʼun ndiʼi leé. Tá ni̱ ya̱ʼa ii̱n yoo̱ ni̱ ka̱ku vá rá. Ta jaá María xíʼín José ni̱ jákuáʼnu na̱ Jesús.
Tá na̱kaa̱ Jesús uxi̱ uvi̱ kuia̱, ni̱ naʼa̱ rá ña̱ kúni̱ ndiva̱ʼa rá Tatá rá ta na̱kaa̱ indiví, Jeová. Ña̱yóʼo ni̱ si̱kuuan ta ni̱ saʼa̱n rá xíʼín na̱ veʼe rá iin ñuu si̱ká naní Jerusalén. Kuaʼa̱n ná kekáʼnu na Jeová. Jo ta si̱ kuaʼa̱n ná íchi̱ ña̱ nandióko̱o ná veʼe, José xíʼín María ni̱ ka̱sáʼá ná nandukú ná Jesús, ta ko̱ña̱ʼa rá kuaʼa̱n xíʼín ná. ¡Chí ko̱ míí vá rá nani̱ʼi̱ ná! ¿Ndíki̱án ni̱ kee María xíʼín José?...
¿Ndiva̱ʼa na̱kaa̱ Jesús veʼe nuu̱ kekáʼnu ná Ndio̱s?
Chí vitiñúʼú ni̱ nandióko̱o na Jerusalén nandukú ná Jesús. Uni̱ ví kivi̱ ni̱ nataʼán ná nandukú ná Jesús iníí kúú ñuu. ¡Nakani ndiva̱ʼa ini na saʼa̱ rá! Nda̱ jaá ví já nani̱ʼi̱ ná rá. ¿Á síni̱ún ndá chí ni̱ nani̱ʼi̱ ná rá?... Na̱kaa̱ rá veʼe nuu̱ kekáʼnu ná Ndio̱s. Ta ¿ndiva̱ʼa na̱kaa̱ rá káa? Jáchi̱ yóʼo kuu nuu̱ kutu̱ʼva ra kuaʼa̱ ña̱ʼa saʼa̱ Jeová. Jesús ni̱ si̱kúni̱ ndiva̱ʼa rá Tatá rá tá kúni̱ rá ná kujii̱ ini rá ña̱káa ni̱ sinijo̱ʼo rá ña̱ káʼa̱n rá. Tá ni̱ kusi̱va̱ʼa rá, ko̱ ni̱ jándákoo rá ña̱ kunijo̱ʼo rá ña̱ káʼa̱n Jeová. Si̱jaá kuití ni̱ si̱sinijo̱ʼo rá va̱árá ni̱ sio tein ña̱ tu̱ndóʼó ni̱ si̱keean xíʼín rá jáchi̱ ni̱ si̱kee nda̱va̱ʼa na̱ xíʼín rá. Ta ¿á jaá ní ni̱ si̱sinijo̱ʼo Jesús ña̱ káʼa̱n José xíʼín María?... Tu̱ʼun Ndio̱s kachi ñá, ña̱ ni̱ sinijo̱ʼo rá.
¿Á ni̱ sini̱ún ña̱ si̱jaá kuití ni̱ si̱sinijo̱ʼo Jesús ña̱ ni̱ ka̱ʼa̱n tatá rá?... Ña̱yóʼo jánaʼa̱ iin ña̱ va̱ʼa nuu̱ yó: ña̱ ió tein ña̱ tu̱ndóʼó kíán, jo jaá kuití káni kunijo̱ʼo yó ña̱ káʼa̱n tatá xíʼín naná. ¿Á jaá ní kunijo̱ʼo miíún?...
