LECCIÓN 4
Kujii̱ ndiva̱ʼa ini Jeová ta jaá ní tatá ñá xíʼín ñá
¿Ndíki̱án síka̱taʼvi̱ Jefté nuu̱ Jeová?
Va̱árá tu̱ndóʼó ni̱ si̱kuán, jo de̱ʼe Jefté ni̱ kee ñá ña̱ ni̱ ka̱ʼa̱n tatá ñá
¿Á síni̱ún yoo kúú ña̱lóʼo̱ ñá va̱si nuu̱ naʼná yóʼo?... Nuu̱ Tu̱ʼun Ndio̱s ko̱ vási kivi̱ ñá, jo kachian ña̱ tatá ñá ni̱ si̱naní Jefté. Jeová xíʼín Jefté ni̱ kujii̱ ndiva̱ʼa ini na saʼa̱ ña̱ ni̱ kee ña̱lóʼo̱ yóʼo. ¿Á kúni̱ún kundaa̱ cháá ga̱ iniún saʼa̱ Jefté xíʼín saʼa̱ de̱ʼe diʼíi̱ ra?
Iin ta̱a va̱ʼa ndiva̱ʼa ini ni̱ si̱kuu Jefté. Jaá kuití ni̱ si̱ka̱ʼa̱n rá xíʼín de̱ʼe rá saʼa̱ Jeová. Jaá ní ndeé ni̱ sio ini ra ta síni̱ rá ndixi kaneʼe ra na̱ ñuu. Saʼa̱ ña̱yóʼo na̱ ñuu Israel ni̱ kachi na xíʼín ra: “¿Á kúni̱ún kundichiún nuu̱ ndu̱ tá kuʼu̱n ndu̱ kanitáʼan ndu̱?”.
Ni̱ si̱ka̱taʼvi̱ Jefté nuu̱ Jeová ta ni̱ si̱ka̱ rá nuu̱ rá ná chindeé rá ná já na̱ keva̱ʼa na tá kuʼu̱n na kanitáʼan na. Ni̱ sia̱ʼa ra tu̱ʼun ra nuu̱ Jeová ta ni̱ kachi rá xíʼín rá ña̱ tá ná keva̱ʼa ná, kée ra ña̱yóʼo: tá ná nandióko̱o ra veʼe ra, na̱ xinañúʼú na̱yivi ná kuʼu̱n kaniʼín rá kua̱ʼan rá ná nuu̱ Jeová. ¿Ndíki̱án kúni̱ rá kachi ra? Ña̱ na̱yivi yóʼo kuʼu̱n na tabernáculo kunikua̱chi ná nuu̱ Jeová ndiʼi tiempo. Tabernáculo yóʼo ni̱ si̱kuu iin veʼe nuu̱ ni̱ si̱kekáʼnu na Ndio̱s. Tá ni̱ saʼa̱n na kanitáʼan na ¿á ni̱ keva̱ʼa Jefté? Jaa̱n ni̱ keva̱ʼa ra. Tá ni̱ nandióko̱o ra veʼe ra, ¿á síni̱ún yoo kúú na̱ xinañúʼú ni̱ kana kaniʼín ra?...
¡Ni̱ kana de̱ʼe diʼíi̱ rá! Iin túʼún java kúú de̱ʼe diʼíi̱ rá, ta víti kánian kua̱ʼan ra ñá na̱ kuʼu̱n ñá koo ña̱ tabernáculo. Ni̱ ku̱ndaʼví ndiva̱ʼa ini rá saʼa̱ ña̱yóʼo, jo si̱ ni̱ sia̱ʼa vá ra tu̱ʼun ra nuu̱ Jeová, ¿á ñu̱ʼu iniún ndíki̱án ni̱ ka̱ʼa̱n ra? Ña̱káa, ni̱ kachi de̱ʼe rá xíʼín ra: “Ta̱ai̱, ni̱ sia̱ʼa ní tu̱ʼun ní nuu̱ Jeová ta kánian kée ní ña̱ ni̱ ka̱ʼa̱n ní”.
Na̱ néʼe táʼan va̱ʼa xíʼín de̱ʼe Jefté kuia̱ ta kuia̱ kuaʼa̱n na kaniʼni na ñá
Jaá ní de̱ʼe ra ni̱ ku̱ndaʼví ini ñá míí saʼa̱. ¿Ndiva̱ʼa rí? Jáchi̱ tá ná kuʼu̱n ñá koo ñá tabernáculo, o̱kúu tandaʼa̱ ñá tá ni̱ o̱kúu koo de̱ʼe ñá. Jo kúni̱ ñá kée ñá tátu̱ʼun ni̱ ka̱ʼa̱n tatá ñá. Jaá ní kúni̱ ñá ná kujii̱ ini Jeová xíʼín ñá. Ña̱yóʼo kúú ña̱ kúni̱ʼi cháá ga̱ nuu̱ ñá o̱ju̱ú ña̱ tandaʼa̱ ñá tá koo de̱ʼe ñá. Ña̱káa kuaʼa̱n ñá koo ñá tabernáculo tá káa ni̱ si̱io ñá ndiʼi tiempo.
¿Ndixi káʼáún? ¿Á ni̱ kujii̱ ini Jeová xíʼín Jefté xíʼín ña̱lóʼo̱ yóʼo?... ¡Jaa̱n, ni̱ kujii̱ ini na! Ta jaá ní yoʼo̱ kuu kéeún tátu̱ʼun ni̱ kee de̱ʼe diʼi̱í Jefté. Tá ndinuʼu iniún kúni̱ún Jeová ta jaá kuití sínijo̱ʼoún ña̱ káʼa̱n rá, kujii̱ ndiva̱ʼa ini Jeová xíʼíún. Tá jaá ní tatá xíʼín naná kujii̱ ini na xíʼíún.
