Kunde̱ʼé na̱ ta̱a na̱ va̱si nuu̱ naʼná yóʼo. Kivi̱ ná kúú Mateo, Marcos, Lucas, Juan, Pedro, Santiago, Judas xíʼín Pablo. Ndiʼi na̱yóʼo ni̱ si̱io ná tein ni̱ si̱io Jesús ta ni̱ taa na ña̱ ni̱ kee ra ta ña̱ ni̱ ndóʼo rá. Ndiʼi historia tá carta ña̱ ni̱ taa rá va̱si ñá nuu̱ Tu̱ʼun Ndio̱s. ¿Á kúni̱ún kundaa̱ cháá ga̱ iniún yoo ni̱ si̱kúú ta̱yóʼo?...

Uni̱ ta̱ ta̱a yóʼo ni̱ si̱néʼe táʼan va̱ʼa ndiva̱ʼa rá xíʼín Jesús ta ni̱ si̱ka̱nuu̱ rá kástu̱ʼun rá saʼa̱ Tu̱ʼun Ndio̱s xíʼín rá. Na̱yóʼo ni̱ si̱kúú apóstol Mateo, Juan xíʼín Pedro. ¿Ndá chí na̱kaa̱ ná  nuu̱ naʼná yóʼo?... Mateo xíʼín Juan, ni̱ taa ra iin iin livro ña̱ káʼa̱n saʼa̱ Jesús. Ta jaá ní Juan, ni̱ taa rá livro Revelación (á Apocalipsis) xíʼín uni̱ carta, carta yóʼo naní ñá Xinañúʼú carta Juan, Kúú uvi̱ ta Kúú uni̱ carta Juan. Apóstol Pedro ni̱ taa ra uvi̱ carta: Xinañúʼú ta ña̱ Kúú uvi̱ carta Pedro. Nuu̱ kúú uvi̱ carta ra, Pedro nakani ra saʼa̱ iin ña̱ ni̱ ndóʼo ra, ta ni̱ ndíi̱ ndiva̱ʼa ini ra. Ni̱ sinijo̱ʼo ra ña̱ ni̱ ka̱ʼa̱n Jeová nda̱á indiví saʼa̱ Jesús, ta ni̱ kachi ra ña̱yóʼo: “Ta̱yóʼo kúú de̱ʼe ma̱níi̱. Ta kujii̱ ndiva̱ʼa ini xíʼín ña̱ kée ra”.

Java ga̱ ta̱ ta̱a, va̱si nuu̱ naʼná yóʼo jaá ní ni̱ taa na saʼa̱ Jesús. Iin ra ni̱ si̱naní Marcos. Nda, ni̱ síni̱ rá tá ni̱ tiin na Jesús ta néʼe na ra kuaʼa̱n ná. Iinka̱ rá ni̱ si̱naní Lucas. Kúú rá iin doctor, nda̱ tá ni̱ siʼi̱ Jesús já ni̱ ka̱sáʼá ra ni̱ na̱ndiko̱ ñaʼá rá, ni̱ nduu ra na̱ kuéntá rá.

Ni̱ si̱io uvi̱ ñani Jesús ta kuálí cháá ga̱ nuu̱ rá ta jaá ní ni̱ taa ra saʼa̱ ña̱ ni̱ kee Jesús. ¿Á síni̱ún yoo kúú rá?... Kuu kunde̱ʼeún rá nuu̱ naʼná yóʼo, iin ra ni̱ si̱naní Santiago ta iinka̱ ra Judas. Ta míí saʼa̱ ko̱ ni̱ si̱kandísa rá ña̱ jánaʼa̱ Jesús. ¡Káʼán rá ña̱ nda na̱jana vá Jesús! Jo ta ni̱ ndiʼi ni̱ kandísa ra Jesús ta ni̱ nandiko̱ vá ñaʼá rá.

Víti ná káʼa̱n yó saʼa̱ Pablo. ¿Á si̱nde̱ʼéún rá nuu̱ naʼná yóʼo? Ta kúmani̱ nduu ra na̱ kuéntá Jesús ni̱ si̱ka̱ʼa̱n ná xíʼín rá Saulo. Kandají rá na̱ kuéntá Jesús ta ni̱ si̱kee nda̱va̱ʼa rá xíʼín ná. ¿Á kúni̱ún kundaa̱ iniún ndixi ni̱ kuu já ni̱ nduu ra na̱ kuéntá Jesús?... Iin kivi̱ jee, síka̱ rá kuaʼa̱n rá íchi̱ ta iin kuití vá ni̱ sinijo̱ʼo rá iin tachi̱ nda̱á indiví. ¿Yoo ni̱ ka̱ʼa̱n xíʼín rá? ¡Míí Jesús ni̱ ka̱ʼa̱n xíʼín rá! Ta ni̱ kachi ra xíʼín rá: “¿Ndiva̱ʼa kee nda̱va̱ʼaún xíʼín na̱ kandísa yuʼu̱?”. Ni̱ kandaa̱ ini Pablo ña̱ ko̱ va̱ʼa kée ra, ña̱káa ni̱ nduu ra na̱ kuéntá Jesús. Pablo ni̱ taa ra 14 livro ña̱ va̱si nuu̱ Tu̱ʼun Ndio̱s, ni̱ taa ra carta Romanos nda̱ carta Hebreos.

¿Á ko̱ ndaa̱ ña̱ kutoó yó kaʼvi yó Tu̱ʼun Ndio̱s ndíní kivi̱?... Nuu̱ Tu̱ʼun Ndio̱s va̱si kuaʼa̱ ña̱ ni̱ kee Jesús. ¿Á ko̱ ndaa̱ ña̱ kúni̱ún kutu̱ʼvaún cháá ga̱ saʼa̱ Jesús?...