¿Á síni̱ún ndíki̱án kúni̱ kachi tu̱ʼun secreto?... * Kíán iin ña̱ʼa ña̱ cháá ndiva̱ʼa na̱yivi síni̱ ña̱. Nuu̱ Tu̱ʼun Ndio̱s va̱si iin “secreto ii̱” ña̱ kúni̱ʼi ndiva̱ʼa. Ta ña̱ ii̱ kíán jáchi̱ míí Ndio̱s vá ni̱ ka̱ʼa̱n ñá. Nda̱á míí saʼa̱ ni̱ iin na ko̱ síni̱ saʼa̱ ña̱yóʼo. Nda̱ na̱ ángel kúni̱ ná kundaa̱ ini na̱ saʼa̱ ña̱yóʼo. ¿Á jaá ní kúni̱ún kundaa̱ iniún ndíki̱án kúú secreto yóʼo?...

Si̱naʼá, jo si̱naʼá ndiva̱ʼa, ni̱ ka̱va̱ʼa Ndio̱s míí ta̱a xíʼín ñáʼa̱ míínu̱ú. ¿Ndixi ni̱ si̱naní na̱yóʼo?... Adán xíʼín Eva. Ni̱ si̱ndoyi na nuu̱ iin jardín núchí ña̱ ni̱ si̱naní Edén. Míí Ndio̱s ni̱ saʼa̱n ña̱yóʼo nuu̱ ná jáchi̱ kúni̱ rá ña̱ miíná xíʼín de̱ʼe na ná nda̱já núchí ná iníí nuu̱ Ñúʼu̱, tátu̱ʼun ni̱ si̱kaa jardín Edén. Kúni̱ rá ña̱ ná kutaku ná ndijaá táʼa̱n kivi̱ nuu̱ Ñúʼu̱ núchí. Jo ko̱ ni̱ kuu ña̱yóʼo. ¿Ndiva̱ʼa rí?

Jáchi̱ Adán xíʼín Eva ko̱ ni̱ sinijo̱ʼo ná ña̱ ni̱ ka̱ʼa̱n Ndio̱s, ta ña̱káa víti ko̱ ndóyi yó nuu̱ Ñúʼu̱ núchí. Jo Ndio̱s kachi ra ña̱ saa̱ iin kivi̱ ña̱ iníí kúú nuu̱ Ñúʼu̱, nduu núchí ña̱. Ndiʼi na̱yivi kandoyi núchí ná ta kutaku na ndijaá táʼan kivi̱. ¿Ndixi sinukoo ña̱yóʼo? Kuaʼa̱ ndiva̱ʼa tiempo ni̱ ya̱ʼa já ni̱ kandaa̱ ini na ña̱yóʼo. ¡Jáchi̱ kíán iin secreto!

Jo kueé kueé jaá ni̱ kandaa̱ ini na ña̱. Tá ni̱ kisi Jesús nuu̱ Ñúʼu̱ yóʼo, já ni̱ jánaʼa̱ rá ña̱yóʼo nuu̱ na̱yivi. Ni̱ nakani rá nuu̱ ná ña̱ kíán Gobierno Ndio̱s. Ña̱káa tá síka̱taʼvi̱ yó nuu̱ Ndio̱s síká yó ña̱: “Ná tandaa kíi̱ kivi̱ kisi gobierno ra”. ¿Ndiva̱ʼa rí? Jáchi̱ Gobierno yóʼo kée ñá ná nduu núchí nuu̱ Ñúʼu̱ yóʼo.

¿Á kutoóún kanakaa̱ún nuu̱ ñúʼu̱ núchí yóʼo?... Jo si̱va̱ʼa na̱yivi na̱ sinijo̱ʼo ña̱ káʼa̱n Ndio̱s kúú na kanakaa̱ nuu̱ Ñúʼu̱ núchí yóʼo. Tu̱ʼun Ndio̱s nákanian saʼa̱ kuaʼa̱ na̱ ta̱a xíʼín na̱ ñáʼa̱ na̱ ni̱ sinijo̱ʼo ña̱ ni̱ ka̱ʼa̱n Jeová Ndio̱s. Nuu̱ tutu yóʼo kutu̱ʼva yó ndá na̱ kúú na̱yóʼo ta ndixi kée yó já na̱ kée yó ña̱ ni̱ kee na. ¿Á kúni̱ún kundaa̱ iniún yoo kúú ná?...