LECCIÓN 6
Ndeé ndiva̱ʼa ni̱ sio ini David
¿Ndíki̱án kéeún tá yu̱ʼún?... ¿Á ko̱ ndaa̱ ña̱ kandeé iniún tatá xíʼín, naná? Jo ió iin ga̱ ná kuu chindeé yoʼo̱. Ta ió ga̱ ví ndeé rá nuu̱ ndiʼi na̱yivi. ¿Á síni̱ún yoo kúú rá?... Jaa̱n, Jeová. Ña̱káa jaá kuití káni káʼa̱ún xíʼín rá ná chindeé rá yoʼo̱. Jaá ni̱ kee David. Ni̱ kandeé ini ra Jeová, ta ndeé ndiva̱ʼa ni̱ sio ini ta̱lóʼo̱ yóʼo. Tu̱ʼun Ndio̱s na̱kanian saʼa̱ rá.
Nda̱á lóʼo̱ David, ni̱ jánaʼa̱ tatá rá, naná rá nuu̱ rá ña̱ ná kúni̱ rá Jeová. Ta ña̱káa ko̱ yuʼú rá. Va̱árá ni̱ ndóʼo ra tu̱ndóʼó ña̱ keean ña̱ ndiʼi yó yu̱ʼú. Néʼe táʼan va̱ʼa ra xíʼín Jeová ña̱káa síni̱ rá ña̱ chindeé ñaʼá rá. Iin kivi̱ jee, tá na̱kaa̱ David ndaa̱ rá ndi̱kachi̱ rá, ¡ni̱ saa̱ iin ndikaʼa ta ni̱ tiin rí iin ndi̱kachi̱ rá néʼe rí kuaʼa̱n rí! ¿Á síni̱ún ndíki̱án ni̱ kee David? Ndi̱ko ra rí kuaʼa̱n rá, ta ni̱ saʼní rá rí xíʼín ndáʼa̱ rá. Ta jaá ní iinka̱ kivi̱ iin oso ni̱ tiin rí ndi̱kachi̱ rá, ta jaá ní ni̱ saʼní ra rí. ¿Yoo ni̱ chindeé David ña̱ ndeé vá ini rá?... Ndaa̱ káʼa̱ún, Jeová.
Jaá ní sio iinka̱ ta̱ʼndá ña̱ ndeé ndiva̱ʼa ni̱ sio ini David. Ña̱yóʼo ni̱ si̱kuán tá kanitáʼan na̱ ñuu Israel xíʼín na̱ ñuu Filistea. Iin ta soldado na̱ ñuu Filistea ni̱ si̱naní rá Goliat ta jikó ndiva̱ʼa rá, ¡ni̱ si̱kúú rá iin ta̱ chi̱káʼnu! Goliat ni̱ si̱saku̱ndaa rá Jeová xíʼín na̱ soldado na̱ ñuu Israel. Kachi ra xíʼín na̱ soldado ñuu Israel: “¡Yoo ndo̱ kúni̱ kanitáʼan xíʼíi̱n!”. Jo ni̱ iin na ko̱ kúni̱ kanitáʼan xíʼín ra, ndiʼi na yuʼú. Jo tá ni̱ sinijo̱ʼo David ña̱ ni̱ ka̱ʼa̱n Goliat, ni̱ kachi ra xíʼín ra: “¡Yuʼu̱ kanitáʼan xíʼíún! ¡Jeová chindeé rá yuʼu̱ ta váti̱ kandeéi̱n xíʼíún!”. ¿Á ko̱ ndaa̱ ña̱ ndeé ndiva̱ʼa ni̱ sio ini David?... Jaa̱n, ndeé ni̱ sio ini ra. Ta ni̱ ndiʼi. ¿Ndíki̱án ni̱ kee ra?
David ni̱ kiʼin ra uʼu̱n yuu̱ válí, xíʼín ju̱tú yuu̱ tá ni̱ kiʼin ra kuaʼa̱n ra naá rá xíʼín ta̱ chi̱káʼnu yóʼo. Tá ni̱ si̱ni̱ Goliat ña̱ David kúú ra iin ta̱lóʼo̱, ni̱ saku̱ndaa ñaʼá rá. Jo David ni̱ kachi ra: “Miíún néʼeún iin espada ta va̱siún kanitáʼaún xíʼíi̱n, ¡jo yuʼu̱ kanitáʼai̱n xíʼíún saʼa̱ kivi̱ Jeová va!”. Ta David ni̱ kana̱kunu ra kuaʼa̱n ra nuu̱ na̱kaa̱ ta̱ chi̱káʼnu yóʼo. Si̱va̱ʼa jútu̱ yuu̱ vá néʼe ra kuaʼa̱n rá kanitáʼan ra xíʼín ta̱yóʼo. Ta ni̱ káni ra iin yuu̱ mií taan ra, ¡ta iin java ni̱ kiʼin ra ta ni̱ na̱kava rá, ta ni̱ siʼi̱ vá rá! Tá ni̱ si̱ni̱ na̱ soldado ñuu Filistea ña̱ ni̱ siʼi̱ Goliat, ni̱ yu̱ʼú ndiva̱ʼa na ta ni̱ si̱nu na kuaʼa̱n ná. ¡Va̱árá kúú David iin ta̱lóʼo̱ váti̱ ni̱ kandeé rá xíʼín ta̱ chi̱káʼnu Goliat! ¿Ndiva̱ʼa káʼáún ña̱ ni̱ kandeé rá xíʼín rá?... Jáchi̱ Jeová ni̱ chindeé David, ¡tá ió ga̱ ví ndeé Jeová nuu̱ ta̱ chi̱káʼnu yóʼo!
Ndeé ndiva̱ʼa ni̱ sio ini David jáchi̱ síni̱ ra ña̱ Jeová chindeé ñaʼá rá
¿Ndíki̱án jánaʼa̱ nuu̱ yó ña̱ ni̱ ndóʼo David?... Ña̱ ió ga̱ ví ndeé Jeová nuu̱ ndiʼi na̱yivi. Ña̱káa, tá java tein yu̱ʼún, naku̱ʼun iniún ña̱yóʼo: Jeová néʼe táʼan va̱ʼa ra xíʼíún ta chindeé rá yoʼo̱ já ná koo ndeé iniún.
