LECCIÓN 12
Ndeé ndiva̱ʼa ni̱ sio ini ja̱si̱ Pablo
Ná nakani nuu̱n ndíki̱án ni̱ kee iin ta̱lóʼo̱ já ni̱ jáka̱ku rá apóstol Pablo. Tu̱ʼun Ndio̱s ko̱ káʼa̱n ñá ndixi ni̱ si̱naní rá, jo kachi ñá ña̱ ni̱ si̱kúú rá ja̱si̱ Pablo. Ndeé ndiva̱ʼa ni̱ sio ini ta̱lóʼo̱ yóʼo. ¿Á kúni̱ún ná nakani nuu̱n ndíki̱án ni̱ kee ra?...
Apostól Pablo, na̱kaa̱ rá veʼe̱ ka̱a ñuu Jerusalén. Ni̱ tiin na rá ta néʼe ná rá kuaʼa̱n rá jáchi̱ káʼa̱n rá saʼa̱ Jesús xíʼín na̱yivi. Jo ni̱ si̱io java na̱yivi ña̱ ni̱ si̱kandají ná Pablo ta sáku̱ ini na kée na ña̱ ko̱ va̱ʼa xíʼín rá. Kúni̱ ná kuʼu̱n ná káʼa̱n ná xíʼín míí ta soldado kuaʼa̱n nuu̱ ña̱yóʼo: “Kaneʼe tuku ndo̱ Pablo na̱ kuʼu̱n rá nuu̱ na̱ juez”. Ña̱ kúni̱ ná kée na kíán, ña̱ chije̱ʼé ná íchi̱ já, tá ná yáʼa Pablo, ¡kaʼni̱ ná rá!
Ja̱si̱ Pablo xinañúʼú ni̱ nakani rá ña̱ ni̱ sinijo̱ʼo rá nuu xi̱to rá, ta ni̱ ndiʼi nuu̱ ta soldado kuaʼa̱n nuu̱
Ni̱ kandaa̱ ini ja̱si̱ Pablo ña̱ kúni̱ ná kée ná. Jo ¿ndíki̱án kuu kée rá? Ni̱ saʼa̱n rá nakani rá nuu̱ xi̱to rá. Ta jaá Pablo ni̱ kachi ra xíʼín rá: “Vitiñúʼu kuaʼa̱n káʼa̱ún xíʼín ta soldado kuaʼa̱n nuu̱ ta nakaniún ndiʼi ña̱yóʼo nuu̱ rá”. Tu̱ndóʼó ndiva̱ʼa káʼa̱n rá xíʼín ta̱yóʼo, jáchi̱ kúú rá iin ta soldado kuaʼa̱n nuu̱. ¿Á kua̱ʼa ndeé ini ja̱si̱ Pablo káʼa̱n rá xíʼín ta̱yóʼo?... Jaa̱n, ndeé ndiva̱ʼa ni̱ sio ini rá tá ni̱ nakani ra ndiʼi ña̱ ni̱ sinijo̱ʼo rá.
Ta soldado kuaʼa̱n nuu̱ yóʼo ni̱ sinijo̱ʼo rá ña̱ ni̱ ka̱ʼa̱n ja̱si̱ Pablo. Ña̱ kúni̱ rá chindeé rá Pablo, ña̱káa ni̱ tandaʼá ñaʼá rá iinka̱ ñuu, ña̱ naní Cesarea. Ta jaá ní, ni̱ chindaʼá rá 500 soldado na̱ kuʼu̱n ná xíʼín rá. Ni̱ kachi ra xíʼín ná: “Míí si̱kuaá víti kaneʼe ndo̱ ra kuʼu̱n ndo̱”. Ta ta̱a kini yóʼo ¿á ni̱ saʼni̱ ná Pablo? ¿Á ni̱ ka̱ku rá? ¿Ndíki̱án káʼáún?... ¡Ni̱ ka̱ku vá rá! Ko̱ña̱ʼa ni̱ kuu kée ta ta̱a yóʼo xíʼín rá.
¿Á ni̱ kutoóún ña̱ ni̱ kaʼvi yó yóʼo?... ¿Á ni̱ síni̱ún ña̱ ndeé ndiva̱ʼa ni̱ sio ini ja̱si̱ Pablo? ¡Jaá ní yoʼo̱ kuu koo ndeé iniún tátu̱ʼun ta̱yóʼo! Síniñúʼú ndeé koo ini yó já káʼa̱n yó xíʼín na̱yivi saʼa̱ Jeová. ¿Á jaá ní yoʼo̱ ndeé koo iniún tá o̱jándákooún káʼa̱ún xíʼín na̱yivi saʼa̱ Jeová?... Kúni̱ʼi ndiva̱ʼa ña̱ si̱jaá kuití ná káʼa̱n yó xíʼín na̱yivi saʼa̱ Ndio̱s. Jaá kuaʼa̱ na̱yivi kuu ka̱ku na.