LECCIÓN 3
Ni̱ kandeé ini Rahab Jeová
Ná kachi ini yó ña̱ nakaa̱ yó ñuu Jericó, iin ñuu ñúʼu̱ Canaán. Na̱yivi na̱ ndóyi káa ko̱ kandísa na̱ ña̱ Jeová kúú Ndio̱s ndaa̱. Jo káa ió iin ñáʼa̱ ñá kandísa ñá Jeová. Naní ñá Rahab.
Nda̱á lóʼo̱, Rahab sísi̱nijo̱ʼo ñá ña̱ nakani na̱ saʼa̱ ndiʼi ña̱ ni̱ kee Jeová. Ni̱ sinijo̱ʼo ñá ndixi ni̱ chindeé Jeová na̱ ñuu rá jaá ni̱ kandeé ná kanitáʼan ná xíʼín na̱ kándají ñaʼá. Jaá ní, ña̱ Jeová ni̱ chindeé rá Moisés já ta̱vá rá na̱ ñuu rá ñuu Egipto. ¡Nda̱ ni̱ saʼnda java Ndio̱s ta̱ñuʼu̱ kuaʼá, jaá ni̱ kuu ni̱ ya̱ʼa na̱ ñuu rá iinka̱ sio! Ta víti, sinijo̱ʼo Rahab ña̱ káʼa̱n na̱ ña̱: ¡na̱ ñuu Israel si̱ kuyati na̱ nuu ñuu Jericó, nuu̱ ió ñá!
Ni̱ chindeé Rahab na̱ ni̱ si̱na̱ní yóʼo jáchi̱ ni̱ kandeé ini ñá Jeová
Iin si̱kuaá jee, ni̱ saa̱ je̱ʼé uvi̱ ta̱a ñuu Israel kana̱ní rá nuu̱ ñuu Jericó. Tá ni̱ saa̱ ná veʼe Rahab, ni̱ sia̱ʼa ñá íchi̱ na̱ kándo̱o na̱ veʼe ñá. Tá ni̱ kundaa̱ ini rey Jericó ña̱ ni̱ saa̱ uvi̱ na̱ na̱ní ñuu Jericó ta ndóyi ná veʼe Rahab. Ña̱káa ni̱ saʼndá rá chúun nuu̱ na̱ ná kuʼu̱n ná nandukú ná rá. ¿Ndixi ni̱ kee Rahab? Ni̱ chije̱ʼé ñá ná xini̱ veʼe ñá ta kachi ñá xíʼín na̱ ta̱a ni̱ tandaʼá rey Jericó: “Na̱ uvi̱ ná na̱ní yóʼo si̱ kuaʼa̱n vá ná jo tá ná kunú ndó sata̱ ná, niʼi̱ vá ndó ná”. ¡Jaá Rahab ni̱ ja̱ka̱ku ñá na̱ ñuu Israel yóʼo! ¿Á kúni̱ún kundaa̱ iniún ndiva̱ʼa ni̱ chindeé ñá rá?... Jáchi̱ kandísa ñá Jeová. Síni̱ ñá ña̱ Jeová chindeé rá na̱ ñuu Israel já ná ki̱ʼvi na ñuu Jericó tá ñúʼu Canaán.
Na̱ uvi̱ na̱ na̱ní yóʼo ni̱ sia̱ʼa ná tu̱ʼun ná nuu̱ Rahab, ta ni̱ kachi ná xíʼín ñá: tá ná jánaá Ndio̱s ñuu Jericó, jáka̱ku na miíñá xíʼín na̱ veʼe ñá. Jo ió iin ña̱ʼa ña̱ kánian kée ñá já ka̱ku ñá. ¿Ndíki̱án?... Ni̱ kachi ná xíʼín ñá: “Katakaaún yóʼo̱ kuaʼá yóʼo ventanaún, tá káʼa̱ún xíʼín ndiʼi na̱ veʼeún na̱ nátaka na xíʼíún ini veʼeún yóʼo”. Tátu̱ʼun ni̱ ka̱ʼa̱n ná xíʼín ñá jaá ni̱ kee ñá. ¿Á kúni̱ún ña̱ ná nakani nuu̱n ndíki̱án ni̱ kúu ta ni̱ ndiʼi?...
Ni̱ ja̱ka̱ku Jeová Rahab xíʼín na̱ veʼe ñá
Cháá vá kivi̱ ni̱ ya̱ʼa, tá na̱ ñuu Israel ni̱ ka̱sáʼá ná kavanuú ná yúʼu̱ ñuu Jericó. Iñu̱ kivi̱ ni̱ kavanuú ná yúʼu̱ ñuu, iin taʼnda̱ iin iin kivi̱, taxi uun kuaʼa̱n ná. Jo tá ni̱ saa̱ kivi̱ usa̱ ni̱ kavanuú ná usa̱ taʼnda̱, ta jaá ndiʼi na ni̱ ka̱sáʼá ná káyuʼú ná xíʼín ndiʼi ndeé ná. Ta ni̱ ndiʼi, ni̱ naá vá ini ná ni̱ síni̱ ná iin ña̱ ko̱ síni̱ míí vá ná: ¡ni̱ kee Jeová ña ni̱ nakaa̱vá náma̱ ñuu Jericó! Jo ¿ndíki̱án ni̱ ndóʼo veʼe Rahab? Ña̱ ni̱ katakaa̱ ñá iin yóʼo̱ kuaʼá ventana ñá ña̱káa ko̱ ni̱ nakaa̱vá veʼe ñá. ¿Á sinde̱ʼéún yóʼo̱ nuu̱ naʼná yóʼo?... ¡Jaá ni̱ kúu tá ni̱ ka̱ku Rahab xíʼín na̱ veʼe ñá!
¿Á ni̱ síni̱ún, ni̱ ka̱ku Rahab jáchi̱ ni̱ si̱nijo̱ʼo ñá ndiʼi ña̱ káʼa̱n Jeová?... Síni̱ ñá ña̱ Ndio̱s kandaa rá ñá, ta ña̱káa ni̱ kandeé ini ña rá. Tá ni̱ nakani ná nuu̱ ñá ndiʼi ña̱ ni̱ kee Ndio̱s, ni̱ kundaa̱ ini ñá ña̱ kánian kundeé ini ña̱ Jeová. Jaá ní miíún kutu̱ʼvaún kuaʼa̱ ña̱ʼa saʼa̱ Jeová. ¿Á kunijo̱ʼoún ña̱ káʼa̱n Jeová, tátu̱ʼun ni̱ kee Rahab?... ¡Síni̱ ña̱ kuu kéeún ña̱!
