LECCIÓN 2
Rebeca kúni̱ ña̱ Jeová ná kujii̱ ini rá xíʼín ñá
Ni̱ si̱io iin ñáʼa̱ ña̱ ni̱ si̱naní Rebeca ta ni̱ kúni̱ ndiva̱ʼa ñá Jeová. Ta jaá ní yi̱í ña, Isaac, kúni̱ ndiva̱ʼa rá Jeová. Nuu̱ lección yóʼo kunde̱ʼé yó ndixi ni̱ sini̱ táʼan na̱yóʼo, ta jaá ní kutu̱ʼva yó ndiva̱ʼa ni̱ kujii̱ ini Jeová xíʼín Rebeca.
Tatá Isaac ni̱ si̱naní Abrahán ta naná rá Sara. Abrahán kúni̱ rá ña̱ ná tandaʼa̱ de̱ʼe rá xíʼín iin na̱ kúni̱ Jeová. Jo ña̱ ndóʼo ná kíán ña̱ ni̱ si̱ndoyi na ñuu Canaán, ta na̱yivi ikáa ko̱ kekáʼnu na Jeová. Ña̱káa ni̱ tandaʼá rá iin ta kachúun nuu̱ rá (nda Eliezer vá) já ná kuʼu̱n rá ñuu Harán. ¿Ndiva̱ʼa ni̱ tandaʼá ñaʼá rá ñuu Harán? Jáchi̱ ñuu Harán ni̱ si̱io java na̱ táʼan Abrahán, ta káa kuu nuu̱ kuu nani̱ʼi̱ Eliezer iin ñáʼa̱ va̱ʼa ña̱ tandaʼa̱ xíʼín Isaac.
Rebeca ni̱ kachúun ndiva̱ʼa ñá já ni̱ saʼa̱n ñá ti̱kui̱í ni̱ siʼi camello
Si̱ká ndiva̱ʼa ñuu kuaʼa̱n Eliezer xíʼín java ga̱ na̱ kachúun xíʼín Abrahán. Ta ndáka na 10 camello ta ndijo rí ña̱ kásáʼá na xíʼín kuaʼa̱ regalo. Jo ¿ndixi kée Eliezer já naniʼi̱ rá ña̱ kukuu ñajiʼí Isaac? Síni̱ rá ña̱ na̱ ñáʼa̱ ñuu saʼa̱n ná si̱kéʼen na ti̱kui̱í pozo. Ta ña̱káa tá ni̱ saa̱ ná ñuu Harán ni̱ kiʼin ná kuaʼa̱n ná yúʼu̱ pozo. Ta ni̱ si̱ka̱taʼvi̱ rá nuu̱ Jeová ta ni̱ kachi rá: “Kaka̱i̱ nuu̱ iin ñá tákú ná kua̱ʼan ña̱ ti̱kui̱í nuu̱i̱. Tá ná kua̱ʼan ña̱ ti̱kui̱í nuui̱ ta jaá ní nuu̱ camelloi̱ já kandaa̱ ini ña̱ miíún ni̱ kasí ñá”.
Míí hora jaá ni̱ saa̱ Rebeca yúʼu̱ pozo. Kachi Tu̱ʼun Ndio̱s ña̱ núchí ndiva̱ʼa ni̱ si̱kaa ñá. Eliezer ni̱ si̱ka̱ rá ti̱kui̱í nuu̱ ñá, ta jaá ní kachi ñá xíʼín rá: “Va̱ʼa, jo o̱ju̱ú si̱va̱ʼa nuu̱ miíún ná kua̱ʼai̱ ti̱kui̱í jaá ní nuu̱ camelloún”. Kuaʼa̱ ndiva̱ʼa ti̱kui̱í siʼi camello, ña̱káa Rebeca ni̱ tava ñá kuaʼa̱ ti̱kui̱í. ¡Kavá ta kavá ñá! Kunde̱ʼé naʼná ña̱ va̱si nuu̱ página ni̱ ya̱ʼa. ¿Ndíki̱án kée Rebeca?... Tá ni̱ sini̱ Eliezer ña̱ kachúun ndiva̱ʼa ñá, chí ni̱ naá vá ini rá: ¡ni̱ sinijo̱ʼo Jeová tá ni̱ si̱ka̱taʼvi̱ rá nuu̱ rá!
Núchí ndiva̱ʼa ni̱ si̱kaa regalo ni̱ sia̱ʼan Eliezer nuu̱ Rebeca, ta kachi ñá xíʼín na̱ ná kuʼu̱n ná veʼe nuu̱ ndóyi táʼan ñá. Eliezer ni̱ nakani rá nuu̱ ná ndiva̱ʼa ni̱ tandaʼá Abrahán á rá ná kuʼu̱n rá Harán. Jaá ní ni̱ nakani rá nuu̱ ná ña̱ ni̱ sinijo̱ʼo Jeová ña̱ ni̱ si̱ka̱taʼvi̱ rá. Tá ni̱ sinijo̱ʼo na̱ veʼe Rebeca ña̱yóʼo ni̱ kujii̱ ndiva̱ʼa ini na. Ta ni̱ kachi na xíʼín Eliezer: “Sini ndu̱ ña̱ va̱ʼa vá ná tandaʼa̱ ñá xíʼín Isaac”.
Rebeca kuaʼa̱n ñá xíʼín Eliezer ñuu Canaán ta ni̱ tandaʼa̱ ñá xíʼín Isaac
¿Á káʼáún ña̱ kúni̱ Rebeca tandaʼa̱ ñá xíʼín Isaac?... Tá ni̱ ndaka̱tu̱ʼún ná ña̱ á kúni̱ ñá tandaʼa̱ ña̱ xíʼín Isaac, va̱ʼa vá kachi ñá. ¿Ndiva̱ʼa rí? Jáchi̱ síni̱ ñá ña̱ Jeová ni̱ tandaʼá rá Eliezer. Ña̱káa kuaʼa̱n ñá xíʼín rá ñuu Canaán, tá ni̱ saa̱ ná, ni̱ tandaʼa̱ vá ñá xíʼín Isaac.
Ni̱ sinijo̱ʼo Rebeca ña̱ ni̱ ka̱ʼa̱n Jeová, ta ña̱káa vií ni̱ si̱ndaa rá ñá. Jo o̱ju̱ú si̱va̱ʼa ña̱káa: jaá ní ni̱ si̱kuu ñá táʼan Jesús. Jaá ní Jeová kandaa rá yóʼo tá ná kunijo̱ʼoún ña̱ káʼa̱n rá tátu̱ʼun ni̱ kee Rebeca. Ta kujii̱ ini rá xíʼíún.
