LECCIÓN 13
Timoteo kúni̱ ra chindeé ra na̱yivi
Nda̱á ta̱lóʼo̱ Timoteo ni̱ si̱kujii̱ ini ra chindeé ra na̱yivi. Kuaʼa̱ ñuu ni̱ si̱ka̱nuu ra já chindeé ra na̱yivi. Ni̱ kujii̱ ndiva̱ʼa ini ra xíʼín ña̱ ni̱ kee ra. ¿Á kúni̱ún ná nakani cháá ga̱i̱ nuu̱n saʼa̱ ña̱ ni̱ kee ra?...
Naná Timoteo xíʼín naná sáʼnu ra ni̱ si̱ka̱ʼa̱n na xíʼín ra saʼa̱ Jeová
Timoteo ni̱ saʼnu̱ ra iin ñuu ni̱ si̱naní Listra. Naná ra ni̱ si̱naní Eunice, ta naná sáʼnu ra, Loida. Nda̱á ta̱lóʼo̱ Timoteo, ni̱ si̱ka̱ʼa̱n na xíʼín rá saʼa̱ Jeová. Ña̱káa, nda̱á lóʼo̱ Timoteo, ni̱ si̱kúni̱ rá chindeé rá na̱yivi já ná kundaa̱ ini na̱ saʼa̱ Jeová.
Tá si̱kúú Timoteo iin ta̱ tákú, iin kivi̱ jee, Pablo ni̱ kachi ra xíʼín rá: “Kuʼu̱i̱n káʼa̱i̱n saʼa̱ Tu̱ʼun Ndio̱s java ga̱ ñuu. ¿Á kúni̱ún kuʼu̱n xíʼíi̱n?”. Ni̱ kujii̱ ndiva̱ʼa ini Timoteo ta ni̱ kachi ra: “¡Kúni̱ kuʼu̱i̱n!”. Jáchi̱ kúni̱ ra chindeé ra na̱yivi.
Timoteo ni̱ saʼa̱n rá xíʼín Pablo nuu̱ ñuu naní Tesalónica, iin ñuu ña̱ na̱kaa̱ Grecia. Kuaʼa̱ ndiva̱ʼa ni̱ si̱ka̱ sa̱ʼá na jaá ni̱ tiin na barco. Nda̱á jaá ví ni̱ saa̱ ná, ni̱ chindeé ná kuaʼa̱ na̱yivi já ná kundaa̱ ini na saʼa̱ Jeová. Jo java na̱yivi ni̱ ndukueʼe ndiva̱ʼa ná ta kúni̱ ná kée nda̱va̱ʼa ná xíʼín ná. Ta ña̱káa, Pablo xíʼín Timoteo ni̱ kiʼin rá kuaʼa̱n ra java ga̱ ñuu káʼa̱n ra xíʼín na̱yivi saʼa̱ Tu̱ʼun Ndio̱s.
Timoteo ni̱ kujii̱ ndiva̱ʼa ini ra xíʼín ña̱ ni̱ kee ra
Cháá vá yoo̱ ni̱ ya̱ʼa, tá Pablo ni̱ ka̱ʼa̱n ra xíʼín Timoteo ná na̱ndióko̱o tuku ra ñuu Tesalónica. Jáchi̱ kúni̱ rá kundaa̱ ini ra ndixi kúu na̱ ñani ra na̱ ndóyi ikáa. Jo ñuu ikáa java na̱yivi ni̱ si̱kee nda̱va̱ʼa na xíʼín na̱ kuéntá Jesús. ¡Ndeé ndiva̱ʼa káni koo ini Timoteo já na̱ndióko̱o tuku ra! ¿Ndíki̱án ni̱ kee ra? Ni̱ saʼa̱n rá, jáchi̱ ndi̱ʼi ndiva̱ʼa ini ra saʼa̱ na̱ ñani ra. Tá ni̱ na̱ndióko̱o rá nuu̱ na̱kaa̱ Pablo ndinuʼu ña̱ va̱ʼa ni̱ nakani ra nuu̱ rá. ¡Na̱ ñani na ñuu Tesalónica sínukuáchí ivá ná nuu̱ Jeová!
Kuaʼa̱ kuia̱, ni̱ si̱nukuáchí Timoteo nuu̱ Jeová xíʼín Pablo. Ña̱káa, Pablo ni̱ taa ra ña̱yóʼo saʼa̱ Timoteo: “Na̱ chindaʼái̱ ñani Timoteo na kuʼu̱n rá, chindeé rá na̱ ñani yó. Ko̱ó ga̱ iinka̱ ra tátu̱ʼun ta̱yóʼo. Jáchi̱ kúni̱ rá Jeová ta jaá ní kúni̱ rá na̱yivi”.
Jaá ní miíún kúni̱ún na̱yivi, ¿á ko̱ ndaa̱? ¿Á kúni̱ún chindeéún na̱ já ná kundaa̱ ini na saʼa̱ Jeová?... Tá ná kéeún ñá, kujii̱ ndiva̱ʼa iniun tátu̱ʼun Timoteo.
