Iin ta iin Veʼe nuu̱ nátaka na̱ testigo Jeová niian kivi̱ ii̱ Ndio̱s. Ña̱káa kanian javií yó ña já ná kutuvi nuchian ta ná kundaa̱ yó ña, iin chúun ña̱ káʼnu ndiva̱ʼa kúú ña̱yóʼo xíʼín ña̱yóʼo jaá ní kandañu̱ʼu yó Ndio̱s. Ta ndiʼi yó kuu kée ña̱yóʼo.

Ta ndiʼi ña̱ nátaka yó kuu chindeé yó javií yó. Ta ndiʼi nátaka yó kujii̱ ini yó javií yó veʼe nuu̱ nátaka yó; já va̱ʼa tuvi ña̱ si̱jaá kuití javií va̱ʼa ná ña̱ iin na kuaʼa̱n nuu̱ tein congregación a na̱ chindeé congregación néʼe rá kuéntá saʼa̱ chúun néʼe rá iin lista saʼa̱ ndiʼi ña̱ kée ná. Ña̱ kée ná kíán tiʼvi ná, nakata ná piso, javií ná alfombra, jakusiio ná yaka, javií na téi̱, nakata ná vaño, nakata ná ventana xíʼín espejo, tavá na xeʼe̱, javií na yéʼé sata̱ veʼe. Iin kivi̱ nuu kuia̱ javií va̱ʼa yó veʼe yóʼo. Tá na va̱lí chindeé ná javií ná ña̱yóʼo jánaʼa̱ ná nuu̱ na ña̱ kanian koo ña̱ ñúʼú ná saʼa̱ veʼe nuu̱ kandañu̱ʼu ná Ndio̱s (Eclesiastés 5:1).

Chíndeé yó jáva̱ʼa yó ndiʼi ña̱ o̱vaʼa káa. Kuia̱ ta kuia̱ si̱nde̱ʼé va̱ʼa yó ini tá sata̱ veʼe yóʼo a ndiʼi ña̱ʼa ió va̱ʼa. Si̱jaá kachúun yó já ndaa̱ yó veʼe yóʼo já ná o̱nakuʼu̱n yaʼvian nuu̱ yó (2 Crónicas 24:13; 34:10). Kanian kee káʼnu yó Ndio̱s iin nuu̱ vií káa tátu̱ʼun Veʼe nuu̱ nátaka na̱ testigo Jeová. Tá ndiʼi yó chindeé yó javií yó veʼe yóʼo naʼa̱ na ña̱ kúni̱ʼi ndiva̱ʼa kúú veʼe yóʼo nuu̱ yó ta ña̱ kúni̱ yó Jeová Ndio̱s (Salmo 122:1). Ta ña̱yóʼo keean ña̱ na̱ káʼa̱n va̱ʼa na̱ ñuu saʼa̱ na̱ testigo Jeová (2 Corintios 6:3).

• ¿Ndiva̱ʼa kanian kundaa̱ va̱ʼa ná nuu̱ kandañu̱ʼu ná Ndio̱s?

• ¿Ndá chúun kuu kée yó já ná koo vií Veʼe nuu̱ nátaka na̱ testigo Jeová?