Tu̱ʼun ña̱ kúú prekursor kúnian kachian iin na̱yivi na yosó nuu̱ na kuaʼa̱n na, tá suná ná ichi̱ já kuu ndi̱ko inka̱ ná kuaʼa̱n na̱. Jesús ni̱ si̱kuu ra iin prekursor jáchi̱ ni̱ tandaʼá ñaʼá Ndio̱s kisi rá nuu̱ Ñúʼu̱ yóʼo já jánaʼa̱ ra nuu̱ na̱yivi saʼa̱ Tu̱ʼun Ndio̱s tá ni̱ suná rá ichi̱ já kuu ka̱ku miíyó (San Mateo 20:28). Kivi víti chindeé yó na̱yivi tátu̱ʼun ni̱ kee Jesús já ná ndi̱ko na rá (San Mateo 28:19, 20). Ió java na̱ ñani táʼan yó na kachúun tátu̱ʼun prekursor.

Prekursor kúú iin na̱yivi ná nditáʼán tiempo kástu̱ʼun na saʼa̱ Tu̱ʼun Ndio̱s nuu̱ na̱yivi. Ndiʼi na̱ testigo Jeová kástu̱ʼun ná saʼa̱ Tu̱ʼun Ndio̱s nuu̱ na̱yivi. Jo, ió java ná kee yíko̱ va̱ʼa ná ndiʼi chúun kee ná já ná kukuu na prekursor ta kástu̱ʼun ná yoo̱ ta yoo̱ 70 hora saʼa̱ Tu̱ʼun Ndio̱s nuu̱ na̱yivi. Saʼa̱ ña̱yóʼo kuaʼa̱ ná prekursor kachúun ná. Iinka̱ na̱ ñani táʼan yó ka̱si ñaʼá ná ña̱ kukuu na prekursor na̱ káchúun kuaʼa̱, ta̱ndáʼa̱ ná na̱ yóʼo já ná kuʼu̱n ná kástu̱ʼun na saʼa̱ Tu̱ʼun Ndio̱s nuu̱ ko̱ó kuaʼa̱ na̱ ñani táʼan yó, yoo̱ ta yoo̱ 130 hora kástu̱ʼun na̱ yóʼo saʼa̱ Tu̱ʼun Ndio̱s nuu̱ na̱yivi. Na̱ kúú prekursor kujii̱ ini ná xíʼín ñaʼá ña̱ kumi̱ na tá kandeé ini na ña̱ Jeová Ndio̱s kuaʼa̱ si ña̱ síniñúʼú ná (San Mateo 6:31-33; 1 Timoteo 6:6-8). Ná o̱kúu kukuu prekursor á prekursor na̱ kachúun kuaʼa̱, na̱ yóʼo kástu̱ʼun ná yoo̱ ta yoo̱ 30 hora á 50 hora saʼa̱ Tu̱ʼun Ndio̱s nuu̱ na̱yivi ta na̱ yóʼo kúú na̱ chindeé na prekursor.

Saʼa̱ ña̱ kiʼvi ini na̱yóʼo Ndio̱s ta saʼa̱ ña̱ kiʼvi ini ná na̱yivi ña̱káa kástu̱ʼun na saʼa̱ Tu̱ʼun Ndio̱s. Tátu̱ʼun Jesús, miíyó ndéʼé yó ndixi kía̱n kivi víti kuaʼa̱ na̱yivi ko̱ sini ná saʼa̱ Tu̱ʼun Ndio̱s (San Marcos 6:34). Jo, miíyó kuu jánaʼa̱ yó nuu̱ ná saʼa̱ Tu̱ʼun Ndio̱s ña̱yóʼo chindeéán ná ndá viti ta sinu̱ ini ná ña̱ chááka̱ ní chínuu̱ Ndio̱s kuaʼa̱ si kuaʼá ña̱ʼa ña̱ va̱ʼa nuu̱ ná. Saʼa̱ ña̱ kiʼvi ini na̱ prekursor ñani táʼan yó ña̱káa ndiʼi ini ná tavá ná tiempo ná já saʼa̱n ná kástu̱ʼun saʼa̱ Tu̱ʼun Ndio̱s nuu̱ na̱yivi (San Mateo 22:39; 1 Tesalonicenses 2:8). Tá ña̱yóʼo chindeéán ná já kandeé chááka̱ ini na Ndio̱s ta kuyati chááka̱ ná nuu̱ si, tá kujii̱ ka̱ ví ini ná ndóyi na (Hechos 20:35).

• ¿Ndákía̱n kée iin prekursor?

• ¿Ndiva̱ʼa kuaʼá ná ñani táʼan yó kúú ná prekursor?