Tu̱ʼun Betel kunian kachian “Veʼe Ndio̱s” nuu̱ tu̱ʼun hebreo (Génesis 28:17, 19). Veʼe káʼnu ña̱ kúmí na̱ testigo Jeová nuu̱ iníí kúú ñuyíví va̱ʼa kindoo kivi̱an kunanian Betel, ta ndá yóʼo néʼe ná kuéntá saʼa̱ ña̱ kástu̱ʼun ná Tu̱ʼun Ndio̱s nuu̱ na̱yivi. Na̱ Iin nduʼú na̱yivi na̱ Néʼe chúun ndóyi na veʼe nuu̱ néʼe ná kuéntá saʼa̱ ndijaá táʼan ña̱ʼa ió ña̱ ñuu Nueva York (Estados Unidos), ta ndá yóʼo néʼe ná kuéntá saʼa̱ chúun ña̱ kée ndijaá veʼe Betel ndijaá táʼan ñuu náʼnu. Ndijaá táʼan ñani táʼan yó na̱ kachúun yóʼo kúú ná na̱ veʼe Betel. Na̱ yóʼo kúú ná tátu̱ʼun iin na̱ veʼe nuu̱ si̱siaʼan ná, nuu̱ ndóyi na, nuu̱ kachúun ná ta nuu̱ nátaka na jákuáʼa ná saʼa̱ Tu̱ʼun Ndio̱s (Salmo 133:1).

Ko̱ó ga̱ iinka̱ nuu̱ káa tátu̱ʼun yóʼo ña̱ kachúun ná já chindeé ná java ka̱ na. Nuu̱ iin iin veʼe Betel ió na̱ ta̱a na̱ ñáʼa̱ na̱ kúú kuéntá Jesús na̱yóʼo si̱ʼa ná miíná kée ná ña̱ káʼa̱n Ndio̱s tá ndiʼi ini ná káchúun na nditáʼa̱n tiempo saʼa̱ Gobierno Ndio̱s (San Mateo 6:33). Ni̱ iin na̱yóʼo ko̱ó kiʼin yaʼvi ná, jo, ndiʼi vá ña̱ʼa saʼa̱ ná nuu̱ ná, nuu̱ koo̱ na̱, ña̱ kasíaʼan na, ta̱ chindeé ñaʼá ná xíʼín cháá xu̱ʼún já ná kuiin na ña síniñúʼú ná. Ndiʼi vá na ió veʼe Betel si̱ ió si̱ ió vá chúun kée ná, java ná káchúun ná oficina vá, iinka̱ na ka̱va̱ʼa ná ña̱ si̱siaʼan ná, ta iinka̱ ná chikaa̱ ná ña̱ kasíaʼan míí na̱ ndóyi ikáa. Java ka̱ ná kachúun ná nuu̱ kána tutu, iinka̱ na kachúun na nuu̱ kána livro iinka̱ ná kée ná chúun ña̱ jándúvií ná veʼe nuu̱ ndóyi java ka̱ ná, iinka̱ ná kachúun ná nuu̱ nakata ná jáʼma̱, tá java ka̱ ná ndaá ná veʼe Betel já ná koo̱ va̱ʼa ndiʼi ñaʼá, ió ka̱ java ka̱ chúun kée ná.

Ió kuaʼa̱ chúun yóʼo, já chindeé ná na̱ kástu̱ʼun ná saʼa̱ Gobierno Ndio̱s. Ndiʼi chúun ña̱ kúú iin iin veʼe Betel ió jáchi̱ kúni̱ ná ña̱ ndiʼi na̱yivi na̱ ku̱ndaa̱ ini ña̱ ndaa̱ saʼa̱ Ndio̱s. Tutu yóʼo kúú iin ña̱ yóʼo. Na̱ ni̱ taa ña̱yóʼo ni̱ si̱kuu na̱ Iin nduʼú na̱yivi na̱ Néʼe chúun, já ni̱ tandaʼá ná ña̱ nuu̱ Internet nuu̱ ciento na̱ na̱taa yuʼú káʼa̱n miíná nuu̱ iníí kúú ñuyíví, tá nuu̱ java veʼe Betel ió makina náʼnu ña̱ kama kachúun yóʼo kúú nuu̱ kána tutu yóʼo ta ni̱ tandaʼá ná ña̱ yóʼo nuu̱ yáʼa ka̱ 110.000 congregación. Ta cháá ta cháá na̱ veʼe Betel chindeé ná ña̱ ndiʼi ná na̱ ku̱ndaa̱ ini ná saʼa̱ tu̱ʼun ña̱ kúni̱ʼi chááka̱ yóʼo saʼa̱ ña̱ kástu̱ʼun ná saʼa̱ Tu̱ʼun Ndio̱s nuu̱ na̱yivi (San Marcos 13:10).

• ¿Ndá yoo káchúun veʼe Betel ta ndixi sito ñaʼá ná?

• ¿Ndá chúun ña̱ kúni̱ʼi kuu iin iin veʼe Betel?