Si̱ ni̱ kachi va Tu̱ʼun Ndio̱s ña̱ tá ná ki̱ví Cristo jaá kía̱n kana na̱ profeta túʼún tein míí na̱ míínu̱ú ni̱ si̱kuu kuéntá ra, ta najama na̱yóʼo ña̱ ndaa̱ jánaʼa̱ Tu̱ʼun Ndio̱s (Hechos 20:29, 30). Ta tá ni̱ ya̱ʼa tiempo miía̱ndaa̱ ndisa jaá ni̱ kuu: jáchi̱ ta̱ profeta túʼún ni̱ na̱jaká rá ña̱ ni̱ ja̱náʼa̱ Jesús xíʼín ña̱ jánaʼa̱ java ka̱ religión, ta ni̱ nduu na na̱ kachí ndíko̱ Jesús jo, ni ko̱ kée na ña̱ ni̱ kaʼa̱n ra (2 Timoteo 4:3, 4). Saʼa̱ ña̱yóʼo, ¿ndiva̱ʼa kándeé ini nduʼu̱ ña̱ miía̱ndaa̱ ndisa kúndaa̱ va̱ʼa ini ndu ña̱ ja̱náʼa̱ Tu̱ʼun Ndio̱s kivi̱ víti?

Ni̱ saa̱ kivi̱ ña̱ ni̱ ka̱stu̱ʼun Jeová Ndio̱s ña̱ ndaa̱. Si̱ ni̱ kachi va Ndio̱s ña̱ kivi̱ nu̱jandíʼí “ndukuaʼa̱ ndiva̱ʼo ña̱ ndaa̱ káʼa̱n Ndio̱s” (Daniel 12:4). Ta kuia̱ 1870 iin nduʼú na̱yivi na̱ ni̱ si̱ na̱ndukú ña̱ ndaa̱ jánaʼa̱ Tu̱ʼun Ndio̱s, ni̱ ku̱ndaa̱ ini na ña̱ kuaʼa̱ religión ko̱ ni̱ si̱ jánaʼa̱ na̱ ña̱ va̱si nuu̱ Tu̱ʼun Ndio̱s. Sa̱ʼá ña̱yóʼo ni̱ ka̱sáʼá jákuáʼa va̱ʼa na ña̱ jánaʼa̱ Tu̱ʼun Ndio̱s nda̱ míí saʼa̱, ta ni̱ kemáni̱ Jeová Ndio̱s na̱yóʼo, jáchi̱ ni̱ saa̱ na̱ ni̱ ku̱ndaa̱ ini na kuaʼa̱ ña̱ ndaa̱ saʼa̱ Ndio̱s.

Xíʼín ndinuʼu ini java na̱ ta̱a ni̱ ja̱kuáʼa va̱ʼa na Tu̱ʼun Ndio̱s. Xinañúʼú ka̱ Na̱ jákuáʼa Tu̱ʼun Ndio̱s ni̱ ndi̱ʼi ini ni̱ ja̱kuáʼa na, ta tátu̱ʼun jákuáʼa va yó Tu̱ʼun Ndio̱s kivi̱ víti ki̱ʼa jaá ni ni̱ ja̱kuáʼa na̱yóʼo ña̱: ni̱ si̱ ja̱kuáʼa na̱yóʼo saʼa̱ iin va ña̱ jánaʼa̱ Tu̱ʼun Ndio̱s, ta tá ni̱ ndiʼi já ni̱ si̱ ja̱kuáʼa na̱yóʼo sa̱ʼá inga̱ ña̱. Ta tá ni̱ si̱ kaʼvi na̱yóʼo Tu̱ʼun Ndio̱s ta tá ió iin ña̱ ko̱ ní si̱ kúndaa̱ va̱ʼa ini na, jaá kía̱n ni̱ si̱ na̱ndukú ná java ka̱ versículo ña̱ káʼa̱n ndixi kúni̱ kachi ña̱yóʼo, ta tá ni̱ si̱ kundaa̱ va̱ʼa ini na̱yóʼo, ta miía̱ndaa̱ ña̱yóʼo kía̱n káʼa̱n Tu̱ʼun Ndio̱s jaá kía̱n ni̱ si̱ na̱taa na̱yóʼo ndixi kúni̱ kachian. Ta xíʼín ña̱yóʼo ni̱ si̱ kee na ña̱ míí Tu̱ʼun Ndio̱s ni̱ si̱ na̱kanian ndixi kúni̱ kachian, ta ni̱ nda̱níʼi̱ tuku na̱yóʼo ña̱ ndaa̱ sa̱ʼá kivi̱ Ndio̱s xíʼín saʼa̱ Gobierno si, ta ndá chúun ni̱ kava̱ʼa si na̱yivi, ta ndixi kúni̱ si ña̱ ná kandoyi na nuu̱ Ñúʼu̱ yóʼo, ta ndíki̱án ndóʼo na̱ ni̱ siʼi̱, ta ña̱ nataku na̱ ni̱ siʼi̱. Ta sa̱ʼá ña̱ ni̱ ja̱kuáʼa va̱ʼa na̱yóʼo Tu̱ʼun Ndio̱s ña̱yóʼo ni̱ chi̱ndeéán na̱, já ni̱ ja̱ndákoo na kuaʼa̱ ña̱ ko̱ váʼa ni̱ si̱ kee na, ta ña̱ ni̱ si̱ ka̱ndísa na (San Juan 8:31, 32).

Kuia̱ 1879 jaá ni̱ ku̱ndaa̱ ini na̱yóʼo ña̱ si̱ ni̱ saa̱ va kivi̱ ña̱ kakanuu na kástu̱ʼun na ña̱ ndaa̱ saʼa̱ Ndio̱s nuu̱ ndijaá táʼa̱n na̱yivi. Ta míí kuia̱ yóʼo ni̱ ka̱sáʼá ná tavá na̱ tutu ña̱ naní: La Atalaya. Anunciando el Reino de Jehová, ta kána i̱í váa̱n yóʼo nda̱ kivi̱ víti va. Ta kivi̱ víti nuu̱ 239 ñuu náʼno nu̱ú síkanuu nduʼu̱ kástu̱ʼun ndu saʼa̱ Tu̱ʼun Ndio̱s nuu̱ na̱yivi, ta jánaʼa̱ ndu̱ nu̱ú na̱yivi nuu̱ 700 yúʼu̱. ¡Ni ko̱ úun míí vá koo kuaʼa̱ ña̱ ndaa̱ káʼa̱n Ndio̱s tátu̱ʼun ki̱ʼa ió ña̱ kivi̱ víti!

• ¿Ndíki̱án ni̱ kuu xíʼín ña̱ ndaa̱ jánaʼa̱ Tu̱ʼun Ndio̱s tá ni̱ siʼi̱ Cristo?

• ¿Ndixi ni̱ kuu já ni̱ nda̱níʼi̱ tuku nduʼu̱ ña̱ ndaa̱ jánaʼa̱ Tu̱ʼun Ndio̱s?