“Ta níí kúú ñuyíví ndikui̱ta nuu tu̱ʼun va̱ʼa káʼa̱n sa̱ʼá ye̱ʼe̱ já ná kanda̱a̱ ini ña̱yivi ndá kia̱ʼva kakomí Ndióxi̱ kuéntá sa̱ʼa̱ ná. Ánda̱ jáví ndiʼi sa̱ʼa̱ ñuyíví.” Tu̱ʼun yóʼo ni̱ káʼa̱n Jesús ta si̱ yati ki̱ví ra (San Mateo 24:14). Jo, ¿ndixi kúú já kuu kástu̱ʼun yo̱ ña̱yóʼo nuu̱ na̱yivi na iníí kúú ñuyíví? Kuu kee yó ña̱yóʼo, tátu̱ʼun ni̱ si̱kee Jesús ta ni̱ si̱io ra nuu̱ Ñúʼu̱ yóʼo (San Lucas 8:1).

Kuaʼa̱n yó káʼa̱n yo̱ xíʼín na̱yivi ndá veʼe na. Ni̱ jánaʼa̱ Jesús nuu̱ na ni̱ si̱ndíko̱ ñaʼá ña̱ ná kuʼu̱n na veʼe ta veʼe jánaʼa̱ ná nuu̱ na̱yivi saʼa̱ Tu̱ʼun Ndio̱s (San Mateo 10:11-13; Hechos 5:42; 20:20). Ñani táʼan yó na̱ ni̱ si̱ndoyi tá si̱naʼá yóʼo, ni̱ si̱ʼa Jesús chúun nu̱ú na̱ nuu̱ kani kástu̱ʼun ná saʼa̱ Tu̱ʼun Ndio̱s (San Mateo 10:5, 6; 2 Corintios 10:13). Kivi víti jaá ní miíyó kee yíko̱ va̱ʼa ná iin iin congregación ndá kúú nu̱ú kanian káʼa̱n yó saʼa̱ Tu̱ʼun Ndio̱s. Tá kée ná jaá, já sinijo̱ʼo ná ña̱ ni̱ saʼnda Jesús nu̱ú ná ña̱ na ‘ka̱stu̱ʼun ná xíʼín ndidaá kúú ña̱yiviʼ (Hechos 10:42).

Ndukundeé nduʼu̱ kástu̱ʼun ndu̱ saʼa̱ Tu̱ʼun Ndio̱s nuu̱ na̱yivi ndá kúú mií vá nuu̱ ndóyi ná á nuu̱ ió ná. Tátu̱ʼun ni̱ kee Jesús tá ni̱ si̱káʼa̱n ra xíʼín na̱yivi ndá kúú mií va nuu̱ ni̱ si̱kanuu rá, yúʼu̱ ta̱ñúʼú, á yúʼu̱ pozo ñuú (San Marcos 4:1; San Juan 4:5-15). Tá jaá ní miíyó káʼa̱n yo̱ Tu̱ʼun Ndio̱s nuu̱ ndiʼi na̱yivi tá kuaʼa̱n yo̱ íchi̱, á ta kuaʼa̱n yó nu̱ú yaʼvi, á tá kuaʼa̱n yó parque á káʼa̱n yó xíʼín ná teléfono. Tá jaá ní káʼa̱n yo̱ saʼa̱ Tu̱ʼun Ndio̱s xíʼín na̱ ndóyi yati xíʼín yó, na̱ kachúun nuu̱ kachúun yó na̱ kuaʼa̱n escuela iin xíʼín yó, tá kuu já káʼa̱n yó xíʼín na̱ táʼan yó. Ndiʼi ña̱ yóʼo keean ña̱ kuaʼa̱ millón na̱yivi na̱ iníí kúú ñuyíví ná kunijo̱ʼo ná “tu̱ʼun va̱ʼa ña̱ jáka̱ku miíyó” (Salmo 96:2).

Kuu nákani ini yó yoo si kuu káʼa̱n yó tu̱ʼun va̱ʼa saʼa̱ Gobierno Ndio̱s tá ndixi kuu chindeéán yóʼo miíná chááka̱ ní chinuú. Káʼa̱n ní Tu̱ʼun va̱ʼa yóʼo nuu̱ java ka̱ na̱yivi.

• ¿Ndá ña̱ kúú “tu̱ʼun va̱ʼa” ña̱ kanian kástu̱ʼun yó nuu̱ na̱yivi?

• ¿Ndixi kée na̱ testigo Jeová tátu̱ʼun ni̱ kee Jesús já ni̱ káʼa̱n ra saʼa̱ Tu̱ʼun Ndio̱s nuu̱ na̱yivi?