Já ná ku̱ndaa̱ ini ndiʼi na̱yivi saʼa̱ “to̱ʼon va̱ʼa [...] noo̱ ndidaá nación, noo ndidaá ñoo kuálí, no̱ó na̱ káʼa̱n iin rá iin yúʼu̱, xíʼín no̱ó na̱ ndéi iin rá iin ñoo náʼano”, tavá ná tutu nuu̱ usa̱ ciento yúʼu̱ (Apocalipsis 14:6). Jo, ¿ndixi kee ná chúun káʼnu yóʼo? Kee ná jáchi̱ na̱ chindeé ñaʼá kúú iin nduʼú na̱yivi na ndijaá ñuu naʼnu na̱yóʼo kúú na̱ taa tutu ta iin kuaʼá uni̱ mil uni̱ ciento káa kúú na̱yivi na̱ jáyaʼa̱ ña nuu̱ iinka̱ yuʼú, ta testigo Jeová kúú ndiʼi na̱yóʼo.

Tu̱ʼun ña̱ míí nuu̱ taa ná kúú tu̱ʼun inglés. Na̱ Iin nduʼú na̱yivi na̱ Néʼe chúun na̱yóʼo néʼe ná kuéntá saʼa̱ chúun ña̱ kúu nuu̱ Oficina nuu̱ Taa ná tutu, ña̱yóʼo ió ñá veʼe nuu̱ néʼe ná kuéntá saʼa̱ ndijaá táʼan ña̱ʼa ió. Na̱yóʼo keyíko̱ ná chúun kée na̱ taa tutu na̱ ió nuu̱ míí yóʼo ta java ka̱ na̱ ió nuu̱ ndijaá veʼe Betel. Ña̱ ná koo ndijaá na̱yivi na̱ ndijaá ñuu chindeéán ná jáchi̱ taa tutu ña̱ chindeé na̱yivi na̱ ndijaá ñuu, ña̱káa kuaʼá vá na̱yivi na̱ ndijaá ñuu naʼnu nataʼan ini ná ña̱ káʼa̱n tutu yóʼo.

Ña̱ taa ná chindaʼá ná ña̱ nuu̱ na̱ jáyaʼa̱ ña̱ nuu̱ iinka̱ yúʼu̱. Ta si̱ ni̱ taa ná tutu ta tá si̱ ió ti̱ʼa ña, chindaʼá ná ña̱ xíʼín Internet nuu̱ na̱ iníí kúú ñuyíví já ná jáyaʼa̱ ná ña̱ nuu̱ iinka̱ yu̱ʼú, ta si̱nde̱ʼé va̱ʼa ná ña̱ já ná o̱yaʼa ni̱ iin ña̱ʼa, ta tá ió iin ña̱ ko̱ va̱ʼa káa ta ndajava̱ʼa ná ña. Na̱ jáyaʼa̱ iin tu̱ʼun nuu̱ iinka̱ yúʼu̱ nduku ná “tu̱ʼun ña̱ míía̱n ndaa̱ ndisa” kundaa̱ va̱ʼa ini na̱yivi nuu̱ míí tu̱ʼun ña̱ káʼa̱n ná ta tiin ná ña̱yóʼo nuu̱ tu̱ʼun inglés (Eclesiastés 12:10).

Ta kachúun ná xíʼín computadora kamá ka̱ kée ña̱yóʼo chúun. Iin computadora o̱kúu kukuuan tátu̱ʼun iin na̱yivi na̱ jáyaʼa̱ ña̱ va̱si nuu̱ iin tu̱ʼun nuu̱ iinka̱ yúʼu̱. Ta kama chááka̱ káchúun ná ta si̱chúun ná computadora já kée na chúun yóʼo. Míí na̱ testigo Jeová ni̱ kava̱ʼa ná iin programa ña̱ naní Sistema Electrónico de Edición Plurilingüe (MEPS, tu̱ʼun inglés), ña̱yóʼo chindeéán ná já chikaa̱ ná ini computadora ciento ví tu̱ʼun, ta yóʼo kúú nuu̱ chitáʼan ná texto xíʼín naʼná ña̱ ió nuu̱ tutu já kuu tavá na ña nuu̱ makina ña̱ tavá tutu.

¿Ndiva̱ʼa ndukundeé ná kée ná ndiʼi ña̱yóʼo va̱árá cháá vá mil na̱yivi káʼa̱n iin yúʼu̱? Kée ná jáchi̱ ña̱ kúni̱ Ndio̱s Jeová kíán na̱ “kaku toko ndiʼi ña̱yivi ña̱ ná kandaa̱ ini ná ña̱ ndaa̱ sa̱ʼá mé á” (1 Timoteo 2:3, 4).

• ¿Ndíki̱án kée ná já taa ná tutu ña̱ káʼa̱n saʼa̱ Tu̱ʼun Ndio̱s?

• ¿Ndiva̱ʼa tavá ná tutu nuu̱ ndijaá táʼan yúʼu̱ ?