¿Ndijaá na̱ testigo Jeová síni̱ miíní? Ndá na̱ ndóyi yati xíʼín va ndó kúú java nduʼu̱, ta java nduʼu̱ káchúun nduʼu̱ nu̱ú káchúun ní, a iin escuela va sáʼa̱n ndu̱ xíʼín ní; ta ndá si̱ ni̱ nda̱túʼún vá nduʼu̱ xíʼín ní saʼa̱ Tu̱ʼun Ndio̱s. ¿Ndá yoo ndaa̱ ndisa kúú nduʼu̱? Ta, ¿ndiva̱ʼa káʼa̱n nduʼu̱ xíʼín na̱yivi saʼa̱ ña kándísa ndu̱?

Tátu̱ʼun ki̱ʼa kúú vá java ka̱ na̱yivi kúú nduʼu̱ na̱ testigo Jeová. Tein nduʼu̱ ñúʼu na̱yivi na̱ ndijaá táʼa̱n ñuu, java na kuíká ná, ta java na kúndaʼví na. Inga̱ va religión ni̱ si̱ndíko̱ java nduʼu̱, ta java nduʼu̱ ko̱ ní síkándísa nduʼu̱ Ndio̱s; jo tá kúmani̱ nduu nduʼu̱ iin na̱ testigo Jeová, ndijaá vá nduʼu̱ ni̱ ja̱kuáʼa va̱ʼa ndu̱ ña jánaʼa̱ Tu̱ʼun Ndio̱s (Hechos 17:11). Ni̱ na̱tiin va̱ʼa nduʼu̱ ña ni̱ ka̱ti̱ʼa ndu̱ nu̱ú Tu̱ʼun Ndio̱s, ta ni̱ xinu̱ ini nduʼu̱ ña̱: kandañu̱ʼu ndu̱ Jeová Ndio̱s.

Sa̱ʼá ña̱ jákuáʼa ndu̱ Tu̱ʼun Ndio̱s ña̱káa va̱ʼa ka̱ ndóyi nduʼu̱. Tátu̱ʼun ki̱ʼa ndóʼo va java ka̱ na̱yivi jaá ní ndóʼo nduʼu̱ tu̱ndóʼó ta jaá ní ió ñaʼá ña̱ tu̱ndóʼó já kee ndu̱ ña̱; jo sa̱ʼá ña̱ ndini kivi̱ ndúkúndeé nduʼu̱ kée ndu̱ ña̱ káʼa̱n Tu̱ʼun Ndio̱s, ña̱yóʼo chíndeéán nduʼu̱ já ndóyi va̱ʼa nduʼu̱ (Salmo 128:1, 2). Saʼa̱ ña̱yóʼo káʼa̱n nduʼu̱ xíʼín na̱yivi saʼa̱ ndijaá ña̱ va̱ʼa ni̱ kati̱ʼa ndu̱ nu̱ú Tu̱ʼun Ndio̱s.

Ndóyi nduʼu̱ tátu̱ʼun ki̱ʼa káʼa̱n Ndio̱s ña̱ kandoyi ndu̱. Ndijaá ña̱ va̱si nu̱ú Tu̱ʼun Ndio̱s chíndeéán nduʼu̱ já ndóyi va̱ʼa ndu̱, ta chíndeéán nduʼu̱ já ió ña̱ñúʼú ndú nu̱ú na̱yivi, ta kúú ndú na̱yivi ndaa̱, ta va̱ʼa ini ndu̱ xíʼín java ka̱ na. Ta sa̱ʼá ña kée nduʼu̱ ña va̱si nu̱ú Tu̱ʼun Ndio̱s ña̱yóʼo chíndeéán nduʼu̱ já cháá ní kíʼvi̱ ndu̱, ta kúú ndú na̱yivi na̱ káchúun ndeé, ta jaá ní chíndeéán nduʼu̱ já ndóyi va̱ʼa ndu̱ xíʼín na̱ veʼe ndu̱, ta kúú ndú na̱yivi na̱ ndísáʼno ini. Saʼa̱ ña̱yóʼo kandísa nduʼu̱ ña̱ “ko̱ káxi taʼon Ndio̱s ña̱yuu”. Sa̱ʼá ña̱yóʼo, nuu̱ ndijaá vá ñuu ñuyíví ndóyi na̱ ñani táʼan nduʼu̱, ta na̱ ndijaá táʼa̱n ñuu kúú nduʼu̱, jo néʼe táʼan va̱ʼa va ndu̱, ta ko̱ kíʼvi nuu nduʼu̱ tein política. Ta va̱árá tátu̱ʼun ki̱ʼa kúú vá java ka̱ na̱yivi kúú nduʼu̱, jo ni ko̱ó mií vá iinka̱ ñuu na̱ kúú tátu̱ʼun ki̱ʼa kúú nduʼu̱ (Hechos 4:13; 10:34, 35).

• ¿Á iin kúú vá nduʼu̱ na̱ testigo Jeová tátu̱ʼun ki̱ʼa kúú java ka̱ na̱yivi?

• ¿Ndá kúú ña̱ va̱ʼa ni̱ ka̱ti̱ʼa nduʼu̱ sa̱ʼá ña̱ jákuáʼa ndu̱ Tu̱ʼun Ndio̱s?