NDIJAÁ na̱ ju̱ú ni̱ nduu kuendá Jesús, ni̱ kanian ni̱ kee na kuaʼa̱ ndiva̱ʼo ña̱ʼa, já ná koo tátu̱ʼun ki̱ʼa kúni̱ Jeová Ndio̱s. Jo ni̱ kee nda̱va̱ʼa na̱yivi xíʼín ná, ta ni̱ ndoʼo taʼni na tu̱ndóʼó ii̱ ndiva̱ʼo xíʼín mií java ka̱ na̱ kuendá Jesús. ¿Á ni̱ ka̱ndeé na̱yóʼo ni̱ si̱kuu na na̱yivi ndaa̱ nuu̱ Ndio̱s va̱árá ni̱ kee nda̱va̱ʼa na̱yivi xíʼín ná? Ni̱ ka̱ndeé vá ná jáchi̱ ndin oko̱ iin tutu ña̱ va̱si nuu̱ Tu̱ʼun Ndio̱s ña̱ kúú tu̱ʼun Griegó, ni̱ si̱ʼa to̱ndeé iní xíʼín konsejó nuu̱ ná.

Pabló ni̱ taa uxi̱ kumi̱ tutu yóʼo, nda̱ tutu Romanos ta nda̱ tutu Hebreos. Ta ndijaá tutu yóʼo néʼan kivi̱ yoo ni̱ ta̱ndaʼá ná ña nuu̱, á mií ná kúú ná iin na̱yivi á nuu̱ na̱ kuendá Jesús. Ná kande̱ʼé yó saʼa̱ java ña̱ ni̱ kaʼan na̱ apóstol yóʼo.

Ná o̱kée yó ña̱ ko̱ váʼa, ná kukuu yó na̱yivi ndísáʼno nuu̱ Ndio̱s. Ndijaá na̱ kée kua̱chi kini nuu̱ Ndio̱s, ta na̱ kíxi̱ xíʼín na̱ ko̱ kúú yíi̱ ná á ñajiʼí na̱, á na̱ kée java ka̱ kua̱chi náʼno, ta ko̱ nándióko̱o ini na sa̱ʼá ña̱ kée na “o̱ ndúʼu noo̱ dándáki Ndio̱s” (Gálatas 5:19-21; 1 Corintios 6:9-11). Ko̱ kánian kande̱ʼé núu na̱ káchúun nuu̱ Ndio̱s, na̱yivi na̱ java ka̱ ñuu, iin kánian kukuu va na (Romanos 2:11; Efesios 4:1-6). Va̱ʼa kánian koo ini yó, ta kánian chindeé yó ñani táʼan yó, na̱ iin kándísa xíʼín yó (2 Corintios 9:7). Káʼa̱n Pabló yóʼo xíʼín yó ña̱ xíʼín ndinuʼu ini yó, ná kaʼa̱n yo̱ xíʼín Jeová Ndio̱s, ta diʼa kachí ra̱: “Ka̱ka̱ta̱ʼví ndó nu̱ Ndióxi̱ níí tiempo” (1 Tesalonicenses 5:17; 2 Tesalonicenses 3:1; Filipenses 4:6, 7). Jo tá kúni̱ ndisa yó ña̱ ná kunijo̱ʼo ñaʼá Ndio̱s tá xíka̱taʼvi̱ yó, kánian kandeé ndisa ini yó si (Hebreos 11:6).

¿Ndá ku̱ú konsejó ni̱ si̱ʼa Pabló nu̱ú ndijaá na̱ veʼe? Kánian kiʼvi̱ ini ta̱ kúú yíi̱ ñajiʼí ra̱ tátu̱ʼun ki̱ʼa kíʼvi̱ ini ra mií rá. Ta na̱ kúú ñajiʼí kánian koo ndiva̱ʼo ña̱ñúʼú ná nuu̱ yíi̱ ná. Ta kánian kunijo̱ʼo na̱ ku̱alí ña̱ káʼa̱n tatá ná á naná na̱ xíʼín ná, jáchi̱ ña̱yóʼo kía̱n kúni̱ Ndio̱s. Ta jaá ní kánian jákuáʼano va̱ʼa na̱ kúú tatá xíʼín naná, de̱ʼe na, ta kánian kuni̱ na na̱ tátu̱ʼun ki̱ʼa jánaʼa̱ Tu̱ʼun Ndio̱s (Efesios 5:22–6:4; Colosenses 3:18-21).

Ña̱ kúni̱ Ndio̱s kee si. Ley ni̱ si̱ʼa Ndio̱s nuu̱ Moisés ni̱ si̱ndaka ña̱ ta ni̱ si̱ndaa ña na̱ ñuu Israel, nda̱ ki̱ví ni̱ ka̱sáa̱ Cristó uun va, jo ko̱ xiniñúʼú ka̱ na̱ ndíko̱ Cristó kundiko̱ na̱ ley yóʼo kivi̱ víti (Gálatas 3:24). Nuu̱ tutu ni̱ taa Pabló ni̱ ta̱ndaʼá rá nu̱ú na̱ Hebreos, na̱ kúú kuendá Jesús ni̱ si̱ndoyi ñuu Judea, yóʼo kúú nu̱ú ni̱ na̱kani káxí Pabló saʼa̱ ndá chuun ni̱ si̱ʼa Ndio̱s ley yóʼo nu̱ú na̱ ñuu si, ta sa̱ʼá ndixi sáa̱ ña̱ kúni̱ Ndio̱s ió ña̱ xíʼín ndijaá ña̱ kée Cristó. Ta jaá ní ni̱ na̱kani ra ña̱ kuaʼa̱ ña̱ ni̱ si̱káʼa̱n nuu̱ ley yóʼo, chááka̱ chínuu̱ va jaá saa̱ ña̱ koan. Tátu̱ʼun ña̱ ni̱ si̱ saʼní ná kíti̱ já ni̱ si̱joko̱ ná ri̱ nuu̱ Ndio̱s, ña̱yóʼo ni̱ naʼa̱a̱n ña̱ chááka̱ chínuu̱  kanian kivi Jesús sa̱ʼá na̱yivi tátu̱ʼun iin ña̱ jóko̱ ná nuu̱ Ndio̱s, ta sa̱ʼá ña̱yóʼo iin ndée̱ vá koo káʼno ini Ndio̱s saʼa̱ ndijaá kua̱chi yó (Hebreos 10:1-4). Ta sa̱ʼá ña̱ ni̱ siʼi̱ Jesús, ni̱ ja̱ndóo va Ndio̱s ña̱ ni̱ ka̱ndo̱o si xíʼín na̱ ñuu si nuu̱ ley ni̱ si̱ʼa si nuu̱ ná, ta ko̱ xiniñúʼú ka̱ na kundiko̱ na̱ ña̱yóʼo (Colosenses 2:13-17; Hebreos 8:13).

Ndixi kánian koo chuun tein na̱ kuendá Jesús. Ta̱yiví ta̱ kómí chuun náʼno tein na̱ kuendá Jesús, kánian kukuu ra ta̱a vií ndiva̱ʼo, ta kánian kuʼu̱n yíko̱ ra̱ xíʼín ña̱ káʼa̱n nu̱ú Tu̱ʼun Ndio̱s já kuu kakomí rá chuun yóʼo (1Timoteo 3:1-10, 12, 13; Tito 1:5-9). Ta ña̱ kúni̱ʼi ndiva̱ʼo kía̱n ña̱ ná o̱jándákoo na̱ ñuu Ndio̱s ña̱ nátaka na, jáchi̱ yóʼo kúú nu̱ú kati̱ʼa na ndijaá ña̱ va̱ʼa jánaʼa̱ Ndio̱s, ta yóʼo kúú nu̱ú naki̱ʼo táʼan na to̱ndeé ini (1 Corintios 14:26, 31; Hebreos 10:24, 25).

Nuu̱ ñuu Romá tuku va nákaa̱ Pabló, tá ni̱ taa ra tutu nu̱jandíʼí —ña̱ ni̱ si̱kuu tutu kúú uvi̱ ni̱ ta̱ndaʼá rá nuu̱ Timoteo— ta yóʼo nákaa̱ ra̱ veka̱a ndáti ra kivi̱ kee yíko̱ na̱ saʼa̱ rá. Si̱ va̱ʼa java na̱ kuendá Jesús na̱ ni̱ si̱io ndeé ndiva̱ʼo ini, na̱yóʼo va kúú na̱ ni̱ saʼa̱n ni̱ xito niʼni na ra̱ nu̱ú nákaa̱ ra̱ veka̱a. Ta si̱ síni̱ va apóstol yóʼo ña̱ si̱ ni̱ ku̱yati kivi ra, sa̱ʼá ña̱yóʼo ni̱ kachi ra: “Sa̱ ni̱ ke̱chóoin noo̱ Ndio̱s xíʼín ndidaá ndée̱í. Ni̱ ka̱nkono va̱ʼi, ta ni̱ xinko̱oi nda̱ noo̱ ni̱ chi̱náʼa̱ Ndio̱s, ta ni̱ sa̱á íi̱n ndaa̱i̱ xíʼín ña̱ ndaa̱ kándísa yó” (2 Timoteo 4:7). Ndá nda̱ cháá vá kivi̱ ni̱ ya̱ʼa ta ni̱ saʼní vá ná ta̱ yóʼo. Jo ndijaá tutu ña̱ ni̱ taa na̱ apóstol yóʼo chíndeé i̱í váán na̱ ndíko̱ ndisa Jesús ndóyi kivi̱ víti, já káchúun ndaa̱ na̱ nuu̱ Ndio̱s.

(Ña̱yóʼo va̱sian nuu̱ Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón xíʼín Hebreos.)