SA̱ KUAʼA̱ vá kuia̱ va̱ʼa ni̱ si̱ndoyi na̱ ñuu Israel nuu̱ ñuu Egipto, ta ni̱ nduu kuaʼa̱ ndiva̱ʼo na. Jaá ni̱ ka̱sáʼá inga̱ ta̱ faraón néʼe ra chuun, ta kini ndiva̱ʼo ni̱ ka̱sáʼá kée ra xíʼín na̱ ñuu Israel, ta ko̱ ní sísini̱ ta̱ yóʼo José. Tá ni̱ si̱nde̱ʼé ta̱ yóʼo ña̱ si̱ ni̱ nduu kuaʼa̱ ndiva̱ʼo na̱ ñuu Israel, já ni̱ saʼnda ra̱ chuun ña̱ ná nduu na̱ ñuu Israel yóʼo mozó nu̱ú na̱ yóʼo, ta ni̱ kendúsa̱ ra̱ xíʼín ná ña̱ ná jákána na ini yu̱ta Nilo ndijaá de̱ʼe na ta̱ ta̱a válí ta̱ se̱é ni̱ kaku. Ta ni̱ si̱ʼa ndeé ini iin ñá israelita ni chikaa̱ ñá taleé ña̱ ini iin ti̱yika̱ ta ni̱ chi̱je̱ʼé ñá na̱ tein yuku̱ káa yuʼú yu̱ta Nilo. Já ni̱ na̱níʼi̱ ñá de̱ʼe jiʼí faraón ta ni̱ chi̱naní ñá ra̱ Moisés ta ni̱ ja̱kúaʼno ñá ra̱ tein na̱ veʼe faraón.

Tá nákaa̱ Moisés uvi̱ xiko kuia̱ já ni̱ kanian ni̱ sino ra ni saʼa̱n ra̱ iin ñuu xi̱ká jáchi̱ ni̱ ndoʼo ra̱ iin tu̱ndóʼó sa̱ʼá ña̱ ni̱ chi̱ndeé rá iin ta̱ ñuu Israel nuu̱ iin ta̱ Egiptó ta̱ saʼndá chuun. Kumi̱ xíko kuia̱ Moisés tá ni̱ ka̱ʼa̱n Ndio̱s xíʼín rá ña̱ ná nandióko̱o ra kuʼu̱n ra̱ ñuu Egiptó já ná kaʼa̱n ra̱ xíʼín ta̱ faraón ña̱ ná ki̱ʼa ra íchi̱ kana na̱ ñuu Israel kuʼu̱n na̱.

Jo ko̱ ní xíin mií vá ta̱ faraón yóʼo ki̱ʼa ra íchi̱ ña̱ kana na̱ ñuu Israel kuʼu̱n na̱, sa̱ʼá ña̱yóʼo ni̱ chi̱ndaʼá Ndio̱s uxi̱ tu̱ndóʼó ni̱ ndoʼo na̱ ñuu Egipto. Tá ni̱ si̱ndiʼi iin tá iin tu̱ndóʼó yóʼo ni̱ si̱sáʼan Moisés ni̱ si̱káʼa̱n ra̱ xíʼín ta̱ faraón ña̱ ná ki̱ʼo ra íchi̱ ña̱ ná kana na̱ ñuu Israel kuʼu̱n na̱ já ná o̱ndóʼo ka̱ na̱ ñuu Egipto inga̱ tu̱ndóʼó. Jo lándo̱ ndiva̱ʼo ni̱ si̱io ini ta̱ yóʼo, si̱jaá ko̱ ní síxiin ra kunijo̱ʼo ra ña̱ ni̱ si̱káʼa̱n Jeová Ndio̱s xíʼín Moisés xi̱ʼín rá. Tu̱ndóʼó nu̱jandíʼí ni̱ chi̱ndaʼá Ndio̱s nu̱ú na̱ Egipto, yóʼo kúú nu̱ú ni̱ ta̱ndaʼá sí iin ángel já ná kaʼní rá ndijaá de̱ʼe nu̱ú na̱ ñuu Egipto. Jo si̱va̱ʼa de̱ʼe na̱ ni̱ sinajo̱ʼo ña̱ ni̱ kaʼa̱n Jeová Ndio̱s ta ni̱ na̱keʼi na̱ yuʼú yéʼé ná xíʼín nii̱ ndikachi kirí ni̱ joko̱ ná nuu̱ Ndio̱s. Si̱va̱ʼa veʼe na̱yóʼo va ko̱ ní ya̱ʼa ángel kaʼní rá de̱ʼe na. Sa̱ʼá ña̱yóʼo kuia̱ tá kuia̱ ni̱ ka̱sáʼá na̱ ñuu Israel kée káʼno na víko̱ Pascuá já náku̱ʼun ini na̱ kivi ni̱ ja̱káku ñaʼá Ndio̱s.

Tá sa̱ ni̱ siʼi̱ de̱ʼe nu̱ú ta̱ faraón nda̱ jaá ví já ni̱ saʼnda ra chuun nuu̱ Moisés xíʼín na̱ ñuu Israel ña̱ ná kanakuei na kuʼu̱n na̱ nuu̱ ñuu Egipto. Ta viti viti ni̱ sa̱kute̱ʼe na̱yóʼo ni̱ kanakuei na kuaʼa̱n na̱. Jo ni̱ nda̱ja̱ma ña̱ káʼán faraón ta ni̱ kiʼin ra kuaʼa̱n ra̱ xíʼín ta̱ soldadó ra̱ niʼi̱ rá na̱ ñuu Israel. Tá ni̱ saa̱ na̱ ñuu Israel yuʼú ta̱ñuʼú kuaʼá, ni̱ kaʼán ná ña̱ o̱kúu mií vá ka̱ku na jáchi̱ ko̱ó ka̱ íchi̱ nu̱ú kuʼu̱n na̱. Jo ni̱ saʼnda java Jeová Ndio̱s ta̱ñuʼú, já ni̱ kuu ni̱ ya̱ʼa na nuu̱ ñúʼu̱ ichí inga̱ sio. Tá si̱ ni̱ ku̱yati ta̱ Egipto kuaʼa̱n ra̱ sata̱ na̱ ñuu Israel, jaá kía̱n ni̱ saji tuku Jeová Ndio̱s ta̱ñuʼú já ni̱ siʼi̱ ta̱ faraón xíʼín ndijaá ta̱ ñuu Egipto.

Tá ni̱ ndiʼi já ni̱ saa̱ na̱ ñuu Israel ni̱ si̱ndoyi na saʼa̱ yúku̱ Sinaí, ta yóʼo kúú nu̱ú ni̱ ka̱ndo̱o Jeová Ndio̱s iin ña̱ʼa xíʼín na̱ ñuu Israel. Nuu̱ Moisés ni̱ si̱ʼa Ndio̱s ley si já ná kundiko̱ na ña̱ já ná chindeéán na̱. Tá ná kukuu na na̱yivi káchúun ndaa̱ nuu̱ Ndio̱s chindeé sí na̱ ta saʼa̱ míí ná kee máni̱ si java ka̱ ñuu.

Jo kua̱ʼá na̱yóʼo ko̱ ní kándeé ini na si. Ta sa̱ʼá ña̱yóʼo ni̱ kee Ndio̱s ña̱ ni̱ si̱kanuu na uvi̱ xiko kuia̱ nuu̱ ñúʼu̱ ichí. Jaá kía̱n ni̱ ja̱yáʼa Moisés chuun ni̱ si̱neʼe ra nuu̱ inga̱ ta̱ ñuu Israel ta̱ ni̱ si̱kuu iin ta̱yiví ndaa̱ ni̱ si̱naní Josué. Jaá ni̱ saa̱ kivi̱ ña̱ ni̱ ki̱ʼvi na̱ ñuu Israel nuu̱ ñúʼu̱ ni̱ kachi Ndio̱s xíʼín Abraham ña̱ ki̱ʼa si nuu̱ ná.

(Ña̱yóʼo va̱sian nuu̱ tutu Éxodo, Levítico, Números, Deuteronomio, Salmo 136:10-15 xíʼín Hechos 7:17-36.)