¿NDÁ chuun ni̱ kisi Jesús nuu̱ Ñúʼu̱ yóʼo? Mií sí ni̱ kachi: “Kánian koʼo̱n taʼani yuʼu̱ dánaʼi̱ sa̱ʼá to̱ʼon va̱ʼa ña̱ káʼa̱n saʼa̱ ndi koo ndu̱ʼu na ti̱xi ndáʼa̱ Ndio̱s, dá chi̱ saʼa̱ choon yóʼo ve̱i yuʼu̱” (San Lucas 4:43). Ná kande̱ʼé yó kumi̱ ña̱ ni̱ ja̱náʼa̱ Jesús saʼa̱ Gobiernó yóʼo, ña̱ ni̱ si̱kuu ña̱ kúnu̱ú chááka̱ ni̱ kaʼa̱n si xíʼín na̱yivi.

1. Jesús kukuu Rey. Ni̱ kaʼa̱n kásí Jesús ña̱ mií sí kúú Mesías (San Juan 4:25, 26). Jaá ní ni̱ naʼa̱ si ña̱ mií sí kúú ta̱ Rey ni̱ xini Daniel nuu̱ iin ña̱ ni̱ naʼa̱ Ndio̱s nuu̱ rá. Ta ni̱ kachi si xíʼín na̱ ni̱ xika tuun xíʼín sí ña̱ iin kivi̱ saa̱ si koo si “téi̱ noo̱ [...] [kaʼnda si chuun] noo̱ ndato téí náyeʼe̱ ndaa induú.” Ta ni̱ kachi si xíʼín ná ña̱ mií ná kukuu na kuendá iin nduʼú na̱yivi na̱ kaʼnda chuun xíʼín si (San Mateo 19:28). Ta ni̱ kachi si xíʼín iin nduʼú na̱yivi yóʼo ña̱ kúú ná tátu̱ʼun “ndikachi válí” si kirí kúú cháá. Ta jaá ní ni̱ kaʼa̱n si saʼa̱ “java ga̱ [ndikachi]” na̱ ko̱ kúú kuendá ndikachi válí yóʼo (San Lucas 12:32; San Juan 10:16).

2. Ndinuʼu ña̱ ndaa̱ koo tá ná kaʼnda Gobiernó Ndio̱s chuun nuu̱ Ñúʼu̱ yóʼo. Ni̱ kachi Jesús ña̱ ndajava̱ʼa Gobiernó yóʼo ndijaá ña̱ ko̱ váʼa: ña̱ ni̱ ka̱ʼa̱n kua̱chi Satanás sa̱ʼá kivi̱ Ndio̱s. ¿Ndixi? Jáchi̱ kaja káʼnoan kivi̱ Ndio̱s á ndajaviíán ña̱ saʼa̱ ndijaá ña̱ ko̱ váʼa káʼa̱n na̱ sa̱ʼá kivi̱ sí, Nda̱ kivi̱ ko̱ ní sinajo̱ʼo na ña̱ ni̱ kaʼa̱n Ndio̱s nuu̱ ñúʼu̱ ñúchí Edén (San Mateo 6:9, 10). Jaá ní ni̱ naʼa̱ Jesús ña̱ tá ná kaʼnda si chuun nuu̱ Ñúʼu̱ yóʼo, ni iin ka̱ na̱yivi o̱kánde̱ʼé núu na inga̱ na̱, jáchi̱ ko̱ ní ka̱xi si na̱yivi na̱ ni̱ ja̱náʼa̱ si nuu̱, ni̱ ja̱náʼa̱ si nu̱ú ta̱ ta̱a xíʼín na̱ ñáʼa̱, nu̱ú na̱ kui̱ká xíʼín na̱ kúndaʼví. Ta va̱árá ni̱ ta̱ndaʼá ñaʼá Ndio̱s já ná jánaʼa̱ si nu̱ú na̱ Israel uun va, jo jaá ní ni̱ ndi̱ʼi ini si ni̱ chi̱ndeé sí na̱ ñuu Samariá xíʼín na̱ java ka̱ ñuu. Ko̱ ní síio taʼon ini Jesús tátu̱ʼun ni̱ si̱io ini ta̱ ni̱ si̱ja̱náʼa̱ saʼa̱ ley Ndio̱s kivi̱ ni̱ si̱io si, jáchi̱ ni̱ si̱ka̱xi va ta̱ yóʼo na̱yivi ta ni̱ si̱kaja núu ndiva̱ʼo ra na.

3. O̱kúkuu Gobiernó Ndio̱s kuendá ñuyíví yóʼo. Kivi̱ tu̱ndóʼó ndiva̱ʼo ni̱ kanian ni̱ si̱io Jesús, jáchi̱ inga̱ va ñuu ni̱ si̱saʼnda chuun nu̱ú na̱ ñuu Judá yóʼo. Jo tá ni̱ kuni̱ na̱yivi ña̱ ná ki̱ʼvinuu si tein polítika̱ ko̱ ní kée sia̱n (San Juan 6:14, 15). Tá ni̱ nda̱túʼún sí xíʼín iin ta̱ néʼe chuun jaá ni̱ kachi si: “Ko̱ ní nátiin taʼoin choon néʼi ñayuú yóʼo” (San Juan 18:36). Ta ni̱ kachi si xíʼín na̱ ni̱ si̱ndíko̱ si: “Ko̱ kúú ka̱ ndo̱ kuendá ñayuú yóʼo” (San Juan15:19). Ta jaá ní ko̱ ní si̱ʼa si íchi̱ ña̱ kachúun na ña̱ káchúun na naá na̱ já chindeé ná si (San Mateo 26:51, 52).

4. Tá ná kaʼnda Cristó chuun nuu̱ Ñúʼu̱ yóʼo kiʼvi̱ ini si na̱yivi. Ni̱ kaʼa̱n Jesús ña̱ chindeé sí na̱yivi na̱ ndíko̱ si xíʼín tu̱ndóʼó ña̱ ndóʼo na (San Mateo 11:28-30). Ta ki̱ʼa jaá ndisa ni̱ kee si. Jáchi̱ kuaʼa̱ konsejó ni̱ si̱ʼa si sa̱ʼá ña̱ kuu kee na̱yivi já ná o̱nákani kuaʼa̱ ini na sa̱ʼá tu̱ndóʼó ndóʼo na, sa̱ʼá ña̱ ndíʼi ndiva̱ʼo ini na koo xu̱ʼún na̱, ndixi kuu kaneʼe táʼan va̱ʼa chááka̱ na̱ xíʼín java ka̱ na̱, ta ndixi kuu kaja na já ñúchí kandoyi na (San Mateo, capítulo 5 nda̱ 7). Ni̱ kuni̱ ndiva̱ʼo si na̱yivi ta vií ndiva̱ʼo ni̱ si̱kuu si xíʼín ná. Ndi káa mií vá na̱yivi ni̱ si̱síno̱ ini ni̱ si̱sáʼa̱n na̱ ni̱ si̱nde̱ʼé ná si, jáchi̱ ni̱ si̱ka̱ndeé ini na ña̱ vií ndiva̱ʼo kukuu si xíʼín ná, ta koo ndiva̱ʼo ña̱ñúʼú sí nuu̱ ná. ¿Ndá yoo ví ná o̱kúni̱ ri ña̱ koo iin ta̱ kaʼnda chuun nuu̱ ná tátu̱ʼun ta yóʼo?

Jaá ní kuaʼa̱ ndiva̱ʼo milagró ni̱ kee Jesús já ni̱ naʼa̱ si ña̱ kee si tá ná kaʼnda si chuun ti̱xi Gobiernó Ndio̱s. ¿Ndíki̱án ni̱ ka̱ndeé sí xíʼín ña̱yóʼo? Ná kande̱ʼé yó.

(Ña̱yóʼo va̱sian nuu̱ tutu San Mateo, San Marcos, San Lucas xíʼín San Juan.)