KUIA̱ 33 tá tein kivi̱ kúu víko̱ Pentecostés nu̱ú na̱ ñuu Judá, tá ni̱ xi̱no uxi̱ kivi̱ ña̱ ni̱ nana Jesús kuaʼa̱n si indiví, jaá ni̱ na̱taka tátu̱ʼun 120 ká na̱ ndíko̱ si ndóyi na ini iin veʼe nuu̱ ñuu Jerusalén. Ta kúú iin kuití vá, ni̱ sinajo̱ʼo na ni̱ ni̱ʼi iníí kúú veʼe nu̱ú ndóyi na ni̱ kee iin ña̱ʼa ni̱ si̱kuu tátu̱ʼun iin tachi̱ xée̱n, jaá ni̱ ka̱sáʼá ná káʼa̱n na̱ java ka̱ yúʼu̱ ña̱ ko̱ ní sí kaʼa̱n na̱. ¿Ndíki̱án kúu yóʼo? Ña̱ kúu kía̱n ni̱ si̱ʼa Ndio̱s ndée̱ ii̱ sí nu̱ú na̱yóʼo.

Ta kuaʼa̱ na̱yivi na̱ ni̱ kixi ndijaá ñuu náʼno ñuyíví yóʼo ni̱ ka̱sáa̱ na̱ ndóyi na ñuu yóʼo já kee káʼno na víko̱, tá ni̱ si̱io ña̱yóʼo. Ta kúú ni̱ naá vá ini ndijaá na̱yóʼo tá ni̱ sinajo̱ʼo na, ña̱ ni̱ ka̱sáʼá na̱ ndíko̱ Jesús yóʼo káʼa̱n na̱ yúʼu̱ ña̱ káʼa̱n mií ná. Jaá ni̱ na̱kani Pedro xíʼín ná ndixi kúni̱ kachi ña̱yóʼo, já ni̱ kachi ra ña̱ ña̱yóʼo kúú ña̱ si̱ ni̱ kaʼa̱n profetá Joel, ña̱ jákóon Ndio̱s espíritu sí nu̱ú na̱yivi xínokuáchí nuu sí jaá kuu kee na milagró (Joel 2:28, 29). Ta ni̱ naʼa̱ kásí vá ndijaá milagró yóʼo ña̱ na̱ ndíko̱ Jesucristó va kúú na̱ ni̱ ka̱sáʼá Ndio̱s kémáni̱ sí, o̱ju̱ú na̱ ñuu Israel. Sa̱ʼá ña̱yóʼo, nda̱ kivi̱ jaá, ndijaá na̱yivi na̱ kúni̱ kunikuáchí nuu̱ Ndio̱s tátu̱ʼun ki̱ʼa kúni̱ ndisa si kánian kundiko̱ na̱ Cristó.

Jo ta̱ xiní iʼvi̱ Jesucristó, ni̱ ka̱sáʼá rá kée nda̱va̱ʼa ra xíʼín na̱ ndíko̱ mií sí. Ta ni̱ tiin ra java na̱yóʼo já ni̱ saji ñaʼá rá ini veka̱a, jo tá si̱kuaá ñúʼu na ini veka̱a yóʼo jaá ni̱ ka̱sáa̱ iin ángel ni̱ suná rá yéʼán já ni̱ tavá rá na̱, já ni̱ kachi ra̱ xíʼín ná ña̱ ná kuʼu̱n na̱ kastu̱ʼun na saʼa̱ Ndio̱s xíʼín na̱yivi. Tá ni̱ ti̱vinuu̱ inga̱ kivi̱, ni̱ kiʼvi na ini veʼe nu̱ú kéekáʼno na Ndio̱s, ta ni̱ ka̱sáʼá ná jánaʼa̱ na̱ saʼa̱ Jesús. Ta sa̱ʼá ña̱yóʼo ni̱ xijo̱ ndiva̱ʼo ini ta̱ ni̱ si̱ ja̱náʼa̱ saʼa̱ ley Ndio̱s, ta ni̱ saʼnda ra chuun nu̱ú na̱ ni̱ xika̱ tuun xíʼín Jesús ña̱ ná o̱kákanuu ka̱ na̱ jánaʼa̱ na̱ saʼa̱ Jesús. Jo ko̱ ní yi̱ʼví na̱yóʼo ta ni̱ kachi na xíʼín rá: “Káni cháá ka̱a̱n kueídóʼo ndu choon saʼándá Ndio̱s, ndiʼi, dá kee ndu choon saʼándá ta̱a” (Hechos 5:28, 29).

Jo chááka̱ diʼa va ni̱ ka̱sáʼá na̱ xiní iʼvi̱ ñaʼá yóʼo kée nda̱va̱ʼa na xíʼín na̱ ni̱ si̱ndíko̱ Jesús. Ta ni̱ chi̱núu kua̱chi java na̱ ñuu Judá iin na̱ ndíko̱ Jesús naní Esteban ña̱ ni̱ kaʼa̱n nda̱va̱ʼa na saʼa̱ Ndio̱s, ta ni̱ kuun ñaʼá ná yuu̱. Ta ni̱ sina̱káa̱ iin ta̱ lóʼo̱ ni̱ si̱naní Saulo ta̱ ñuu Tarso tein na̱ ni̱ xini ndixi ni̱ saʼní ná Esteban, ta ni̱ si̱xini iʼvi̱ ndiva̱ʼo ta̱ yóʼo na̱ ndíko̱ Cristó. Tá ni̱ ndiʼi ni̱ si̱io ña̱yóʼo jaá ni̱ kiʼin Saulo kuaʼa̱n ra̱ ñuu Damasco já tiin ra ndijaá na̱ ndíko̱ Jesús. Jo tá xíka ra kuaʼa̱n ra̱ íchi̱, iin kuití vá ni̱ na̱yeʼe̱ ndaa nu̱ú kuaʼa̱n ra̱ ni̱ kee iin ñúʼu̱ ni̱ kixi indiví, ta ni̱ kuaá rá ni̱ kee ñúʼu̱ yóʼo. Jaá ni̱ sinajo̱ʼo ra ni̱ kaʼa̱n iin na xíʼín rá: “Saulo, Saulo. ¿Ndiva̱ʼa xíonoo yoʼó kédava̱ʼón xíʼín yuʼu̱?”. Jaá ni̱ ndaka̱tu̱ʼún rá: “¿Yo kúú ndó, na̱ káʼa̱n?”. Jaá ni̱ kachi na̱ xíʼín rá: “Yuʼu̱ kúú Jesús” (Hechos 9:3-5).

Tá ni̱ ya̱ʼa uni̱ kivi̱ ña̱ ni̱ si̱io ña̱yóʼo, jaá ni̱ ta̱ndaʼá Jesús iin na̱ ndíko̱ si naní Ananías já ni̱ ja̱náti̱vi ra nuu̱ Saulo. Ni̱ ku̱ndúta̱ Sauló ta ni̱ ka̱sáʼá rá xíkanuu ndiva̱ʼo ra jánaʼa̱ ra̱ saʼa̱ Jesús, ta ko̱ ní yi̱ʼví ra̱ kaʼa̱n ra̱ saʼa̱ Ndio̱s. Ta ni̱ saa̱ ta̱ yóʼo ni̱ si̱kuu ra apóstol Pablo, ta ni̱ ka̱chúun ndeé ndiva̱ʼo ra nuu̱ Ndio̱s tein na̱ kuendá Jesús.

Si̱ va̱ʼa nu̱ú na̱ ñuu Judá xíʼín na̱ ñuu Samaria uun va ni̱ si̱xika̱nuu na̱ ndíko̱ Jesús yóʼo ni̱ si̱ ja̱náʼa̱ na̱ saʼa̱ Gobiernó Ndio̱s. Jo iin kivi̱, jaá ni̱ naʼa̱ iin ángel mií rá nuu̱ iin ta̱ néʼe chuun ñuu Romá naní Cornelió ta̱ ni̱ si̱ka̱ndísa Ndio̱s ndaa̱ ndisa, jaá ni̱ kachi ángel yóʼo xíʼín rá ña̱ ná tandaʼá rá java ta̱ taa̱ já ná kuʼu̱n ra̱ kuaka ra iin na̱ naní Pedro na̱, ni̱ xika tuun xíʼín Jesús. Jaá ni̱ saa̱ Pedro xíʼín java ka̱ na̱ ndíko̱ Cristó, ta ni̱ ja̱náʼa̱ ra nuu̱ Cornelió xíʼín na̱ veʼe ra. Tá íin ndichi i̱í vá Pedro káʼa̱n na̱, jaá ni̱ niʼi̱ ndijaá na̱ kándísá Jesús ndóyi yóʼo ndée̱ ii̱ Ndio̱s, ta ni̱ saʼnda Pedro chuun ña̱ ná kundúta̱ na̱ xíʼín kivi̱ Jesús. Nda̱ kivi̱ jaá ndi ndáa mií vá na̱yivi na̱ ndijaá ñuu, kuu niʼi̱ ná ña̱ kutaku na ndijaá táʼa̱n kivi̱. Sa̱ʼá ña̱yóʼo nuu̱ iníí kúú ñuyíví kakanuu na̱ ndíko̱ Cristó kaʼa̱n na̱ tu̱ʼun va̱ʼa saʼa̱ Ndio̱s.

(Ña̱yóʼo va̱sian nuu̱ tutu Hechos 1:1–11:21.)