SI̱NAʼÁ ndiva̱ʼo tá tu̱ñáʼa̱ ka̱ kandoyi na̱yivi nuu̱ ñúʼu̱ yóʼo, jaá ni̱ ka̱va̱ʼa Ndio̱s, na̱ ángel kúú espíritu ta o̱kúu kuni yó na̱yóʼo. Iin ángel yóʼo —ña̱ naní Satanás á Ti̱míaʼá— ko̱ ní sínajo̱ʼan ña̱ ni̱ kaʼa̱n Ndio̱s xíʼán, ta ni̱ ja̱ndáʼvia̱n Evá já ná kasíán kui̱ʼi iin yitó kuiʼí ña̱ ni̱ kachi Ndio̱s xíʼán ña̱ ko̱ kánian kasía̱n.

Iin koo̱ ni̱ ka̱chúun Satanás já ni̱ kuni̱a̱n kachian xíʼín Evá ña̱ ko̱ kúni̱ Ndio̱s ña̱ ná niʼi̱ mií ñá xíʼín yíi̱a̱n ña̱ va̱ʼa. Jaá ní ni̱ kachian xíʼín Evá ña̱ tá ná kasí ná kui̱ʼi ña̱ ni̱ kachi Ndio̱s ña̱ ko̱ kánian kasí ná o̱ki̱ví na; sa̱ʼá ña̱yóʼo, ni̱ kuni̱a̱n kachian xíʼín Evá ña̱ ni̱ ja̱ndaʼví va ñaʼá Ndio̱s. Ñúchí ndiva̱ʼo ni̱ kaʼa̱n Ti̱míaʼá xíʼín ná, ña̱ tá ná o̱kúnijo̱ʼo na ña̱ ni̱ kaʼa̱n Ndio̱s, kundaa̱ ini na ndíki̱án va̱ʼa ta ndíki̱án ko̱ váʼa ta kuu kee na ndíki̱án kúni̱ mií vá ná. Jo ña̱tuʼún káʼno ni̱ si̱kuu ña̱yóʼo: nda̱ ni̱ ka̱sáʼá ñuyíví ña̱yóʼo ni̱ si̱kuu ña̱tuʼún miínu̱ú. Jo ña̱ ni̱ kuni̱ Ti̱míaʼá yóʼo kachian kía̱n: ¿Á kánian kaʼnda Ndio̱s chuun Nuu̱ ñúʼu̱ yóʼo xíʼín indiví? ¿Á ña̱ va̱ʼa kúú chuun saʼndá si? ¿Á va̱ʼa ña̱ kunijo̱ʼo yó chuun saʼndá Ndio̱s?

Ni̱ ka̱ndísa Evá ña̱ ni̱ kaʼa̱n koo̱ xíʼán ta ni̱ ka̱sáʼá kúu ini ñá kasíán kui̱ʼi yóʼo, ta ni̱ sasí vá ñáa̱n. Tá ni̱ ndiʼi já ni̱ si̱ʼa ñá kui̱ʼi yóʼo nuu̱ yíi̱ ñá ta ni̱ sasí taʼon ra kui̱ʼi yóʼo. Vaárá o̱ju̱ú ña̱ káʼno náʼa̱n kíán, jo ña̱ ko̱ ní sinájo̱ʼo na ña̱ ni̱ kaʼa̱n Ndio̱s xíʼín ná, kua̱chi káʼno ndiva̱ʼo ni̱ si̱kuuan. Jáchi̱ sa̱ síni̱ va̱ʼa va na sa̱ʼá ña̱yóʼo: ta ko̱ ní kuni̱ na̱ kee na ña̱ ni̱ saʼnda Ta ni̱ ka̱va̱ʼa nditáʼa̱n ña̱ʼa, va̱árá ni̱ si̱ʼa si ndijaá ña̱ʼa nuu̱ ná ta ni̱ ka̱va̱ʼa va̱ʼa si na̱.

Ni̱ ndaka̱ Ndio̱s kuendá nu̱ú na̱yóʼo sa̱ʼá ña̱ ni kee na. Xinañúʼú ni̱ kachi si ña̱ chááka̱ chínuu̱ tandaʼá sí iin na̱ kisi nuu̱ ñúʼu̱ yóʼo —Tata ni̱ kaʼa̱n Ndio̱s tandaʼá sí kixi— ta jánaá ta yóʼo nu̱ú koo̱ ña̱ kúú Satanás. Tá ni̱ ndiʼi jaá ni̱ ja̱tavi̱ chiʼan si Adán xíʼín Evá ña̱ kivi na, jo ni̱ kiʼvi̱ ini si saʼa̱ ndijaá de̱ʼe na̱yóʼo na̱ kandoyi chááka̱ chínuu̱, ta ko̱ ní jánaá si na̱ indeé. ¿Ndá ku̱ú ña̱ va̱ʼa ni̱ kee si saʼa̱ ná? Ni̱ kachi Jeová Ndio̱s ña̱ tandaʼá sí iin ta jándíʼi nuu̱ ndijaá ña̱ kini ni̱ ka̱sáʼá ió sa̱ʼá ña̱ ni̱ si̱io nuu̱ ñúʼu̱ Edén. Jo ¿ndá yoo kukuu ta kixi jáka̱ku na̱yóʼo? ta ¿ndixi kee si chuun sa̱ʼá ña̱ ni̱ ta̱ndaʼá ñá Ndio̱s ni̱ kixi si nuu̱ ñúʼu̱ yóʼo? Tá ki̱ʼa kueé kueé ni̱ ka̱sáʼá táa na Tu̱ʼun Ndio̱s já ni̱ ka̱sáʼá kándaa̱ ini na ña̱yóʼo.

Tá ni̱ ndiʼi, já ni̱ tavá Ndio̱s Adán xíʼín Evá nuu̱ Ñúʼu̱ ñúchí nu̱ú ni̱ si̱ndoyi na. Ta sa̱ʼá ña̱yóʼo ni̱ ka̱sáʼá ni̱ ndoʼo ndiva̱ʼo na ni̱ ka̱chúun na já ni̱ ni̱ʼi ná ña̱ kusáʼan na. Tein jaá já ni̱ kaku de̱ʼe nu̱ú Evá ta̱ ni̱ si̱naní Caín. Tá ni̱ ndiʼi já ni̱ si̱ndoyi chááka̱ de̱ʼe jiʼí xíʼín de̱ʼe yií Adán xín Evá ta tein na̱yóʼo ni̱ kaku Abél xíʼín Set, ta̱ ni̱ si̱kuu na̱ sa̱va̱ʼa nu̱ú na̱ veʼe Noé.

(Ña̱yóʼo va̱sian nuu̱ tutu Génesis capítulo 3 nda̱ 5 xíʼín Apocalipsis 12:9.)