¿Á VA̱ʼA ka̱ kandoyi yó tá ná kaʼnda Jeová Ndio̱s chuun ñuyíví yóʼo? Ná kaʼvi yó konsejó ña̱ va̱si nu̱ú tu̱ʼun si já ná kundaa̱ ini yó ña̱yóʼo. ¿Á míía̱n ndaa̱ ndisa ña̱ va̱ʼa kíán? ¿Á míía̱n ndaa̱ ndisa va̱ʼa ka̱ kandoyi yó tá ná kunijo̱ʼo yó ña̱ káʼa̱n Ndio̱s? Nuu̱ tutu Proverbios ña̱ ni̱ taa rey Salomón yóʼo va̱si cientó konsejó ña̱ kúú chindeé miíó xíʼín ndijaá ña̱ ndóʼo yó. Ná kande̱ʼé yó java ña.

Ná kandeé ini yó Ndio̱s. Kánian kandeé ini yó Jeová Ndio̱s já kuu kaneʼe táʼan va̱ʼa yó xíʼín sí. Ni̱ kachi Salomón: “Xíʼín iin níí níma̱u̱n kandeé iniun Jeová Ndio̱s, ta o̱kándeé inún ña̱ nákani ini miíún. Naku̱ʼun iniun Ndio̱s nuu̱ ndijaá ña̱ kuaʼu̱n keeún, ta mií sí chindeé sí yóʼo ndeí kúú míí vá nu̱ú kuaʼu̱n” (Proverbios 3:5, 6). ¿Ndixi kuu naʼa̱ yó ña̱ kándeé ini yó Ndio̱s? Kuu naʼa̱ yó ña̱ kándeé ini yó Ndio̱s tá ná kunijo̱ʼo yó ña̱ káʼa̱n si ta tá ná kundiko̱ yó chuun saʼndá si. Tá ná kee yó ña̱yóʼo jaá kía̱n kandoyi va̱ʼa yó: jáchi̱ kaja jii̱ yó ini Jeová Ndio̱s, ta jaá naʼa̱ yó ña̱ ña̱tu̱ʼún kuití vá káʼa̱n Ti̱míaʼá (Proverbios 27:11).

Na̱ veʼe yó xíʼín na̱ néʼe táʼan va̱ʼa xíʼín yó. Kivi̱ víti síniñúʼú ndiva̱ʼo na̱yivi kundiko̱ na̱ ña̱ káʼa̱n Ndio̱s. Ña̱yóʼo káʼa̱n Ndio̱s xíʼín ta̱ kúú yíi̱: “Kánian kujii̱ iniún xíʼín ñajíʼun ñá ni̱ kiʼún nda̱ kivi̱ ni̱ si̱kuún iin ta̱ lóʼo̱”, ña̱yóʼo kúni̱a̱n kachian ña̱ ko̱ kánian jándaʼví ra ñajiʼí ra̱ xíʼín inga̱ na̱ ñáʼa̱ (Proverbios 5:18-20). Nuu̱ tutu Proverbios capítulo 31 yóʼo va̱si ña̱ kánian kee iin ñá kúú ñajiʼí já niʼi̱ ñá ña̱ñúʼú nuu̱ yíi̱ ñá xíʼín de̱ʼe ñá. Ta jaá ní káʼa̱n ña̱ xíʼín na̱ ku̱alí ña̱ ná kunijo̱ʼo na ña̱ káʼa̱n tatá na̱ á naná na̱ xíʼín ná (Proverbios 6:20). Ta jaá ní káʼa̱n nuu̱ tutu yóʼo ña̱ síniñúʼú yó kaneʼe táʼan va̱ʼa yó xíʼín java ka̱ na̱yivi, jáchi̱ tá ná kuu síká yó nuu̱ java ka̱ na̱yivi ña̱yóʼo kuu keean ña̱ o̱ndíʼi ka̱ ini yó saʼa̱ java ka̱ na̱ (Proverbios 18:1). Va̱árá síniñúʼú yó kandoyi na̱ kaneʼe táʼan xíʼín yó jo kánian ka̱si va̱ʼa yó na̱ kaneʼe táʼan va̱ʼa xíʼín yó jáchi̱ na̱yóʼo kuu jákaʼa̱n na̱ ini yó kee yó ña̱ va̱ʼa á ña̱ ko̱ váʼa (Proverbios 13:20; 17:17).

Ndixi chíndeéán yóʼo miíyó. Nuu̱ tutu Proverbios yóʼo va̱si kuaʼa̱ konsejó ña̱ chíndeé yó já kandoyi va̱ʼa yó, ta jaá ní chindeéa̱n yóʼo miíyó já ná o̱nákani ini yó ndijaá ña̱ ko̱ chúun, ta chíndeéán yó já ná o̱kúkuu yó na̱ xíʼi, ta chíndeéán yó já ná kukuu yó na̱yivi káchúun ndeé (Proverbios 6:6; 14:30; 20:1). Ta jaá ní kástu̱ʼun ña xíʼín yó ña̱ ndoʼo ndiva̱ʼo ini yó tá ná kee yó ña̱ kée na̱yivi na̱ ko̱ sinajo̱ʼo ña̱ káʼa̱n Ndio̱s (Proverbios 14:12). Ta jaá ní káʼa̱n ña̱ xíʼín yó ña̱ ná kandaa yó —níma̱ yo̱— nuu̱ ndijaá ña̱ kini ió ñuyíví yóʼo jáchi̱: “kánian kandaa yó iníma̱ yo̱ já ná o̱kíʼvi ni̱ iin ña̱ ko̱ váʼa, jáchi̱ ña̱ ñúʼu iníma̱ yó kía̱n kee á kutaku yó á kivi yó” (Proverbios 4:23).

Ta chíndeé konsejó yóʼo millón na̱yivi ña̱ kándeé ini na ña̱ mií Jeová Ndio̱s kúú ta kánian kaʼnda chuun.

(Ña̱yóʼo va̱sian nuu̱ tutu Proverbios.)