TÁTU̱ʼUN 350 ká kuia̱ ni̱ ya̱ʼa ña̱ ni̱ kuun Ti̱kui̱í kuaʼa̱. Ta nuu̱ iin ñuu kui̱ká ni̱ si̱naní Ur ñuu ña̱ naní Irak kivi̱ víti, yóʼo ni̱ si̱io Abraham. Iin ta̱ ni̱ kandeé ini Ndio̱s ni̱ si̱kuu ra, jo tá ni̱ ya̱ʼa ra nu̱ú tu̱ndóʼó jaá ni̱ na̱ʼa ra̱ mií rá á miía̱n ndaa̱ ndisa ni̱ si̱ka̱ndeé ini ra Ndio̱s. Ná kande̱ʼé yó ndíki̱án ni ndoʼo ra.

Ni̱ kachi Jeová Ndio̱s xíʼín rá ña ná jándákoo ra ñuu mií rá ta ná kuʼu̱n ra̱ koo ra iin ñuu naní: Canaán. Ko̱ ní nákani kuáchi̱ ini Abraham ta ni̱ sinajo̱ʼo ra ña̱ ni̱ kaʼa̱n Ndio̱s xíʼín rá. Ta ni̱ kana ra kuaʼa̱n si̱ká rá xíʼín ñajiʼí ra Sara, xíʼín jaxi̱ rá Lot, ta xíʼín ndiʼi na̱veʼe ra. Tá ni̱ saa̱ ra̱ ñuu Canaán o̱ju̱ú iin ni ñuu ní si̱io ra, tá ñuu tá ñuu ni̱ sika̱nuu ra, ta ni̱ si̱io ra veʼe ni̱ ka̱va̱ʼa na xíʼín ñíi̱. Ni̱ ka̱ndo̱o Ndio̱s xíʼín Abraham ña̱ saʼa̱ mií rá kee máni̱ sí ndikuií na̱yivi nuu̱ ñúʼu̱ yóʼo, ni̱ kachi si xíʼín rá ña̱ iin ñuu káʼno saa̱ de̱ʼe ra kukuu na, ta nuu̱ mií ná kando̱o ñuu Canaán.

Ni̱ nduu kuaʼa̱ ndiva̱ʼo ndikachi xíʼín ti̱ndiki̱ ni̱ si̱komí Abraham xíʼín Lot. Ta̱a va̱ʼa ini ni̱ si̱kuu Abraham jáchi̱ ni̱ si̱ʼa ra ña̱ ná ka̱si mií jasi̱ rá ñúʼu̱ nu̱ú kútoó ra kandoyi kíti̱ rá. Ta ni̱ ka̱si Lot ñúʼu̱ va̱ʼa ni̱ si̱ndoyi chí sio yuʼú yu̱ta Jordán, ta ni̱ saa̱ ra̱ ni̱ si̱io ra yati ñuu Sodoma. Jo na̱yivi kini ndiva̱ʼo ni̱ si̱kuu na̱ ñuu ikáa, ni̱ si̱kee na kua̱chi kini nuu̱ Jeová Ndio̱s.

Tá ni̱ ndiʼi ña̱ ni̱ kiʼin Abraham xíʼín Lot kuaʼa̱n na̱ jíin jíin sio, jaá ni̱ kachi Jeová Ndio̱s xíʼín Abraham ña̱ tátu̱ʼun ki̱ʼa kuaʼa̱ kúú ti̱ñuu̱ ió indiví ki̱ʼa jaá kuaʼa̱ kukuu de̱ʼe ra. Ni̱ si̱ka̱ndeé ini Abraham, Jeová Ndio̱s, jo ko̱ ní síkuu koo de̱ʼe Sará ñá ni̱ si̱kuu ñajiʼí ra̱. 99 kuia̱ Abraham ta 90 kuia̱ Sará tá ni̱ kaʼa̱n Ndio̱s xíʼín ná ña̱ koo iin de̱ʼe na. Ta jaá ndisa ni̱ kuu: ni̱ ja̱káku ñá iin taleé ni̱ si̱naní Isaac. Ni̱ si̱ndoyi va java ka̱ de̱ʼe Abraham, jo sa̱ʼá ña̱ ni̱ si̱io Edén yoo ni̱ kaʼa̱n Ndio̱s kisi jáka̱ku na̱yivi, ta yóʼo kisi si tein na̱ veʼe Isaac.

Ta ñuu Sodoma ni̱ si̱io Lot xíʼín na̱ veʼe ra. Jo ko̱ ní kée ra kua̱chi kini ña̱ ni̱ si̱kee na̱ Sodomá jáchi̱ ta̱a va̱ʼa va ni̱ si̱kuu ra. Sa̱ʼá ña̱yóʼo tá ni̱ chi̱kaa̱ ini Jeová Ndio̱s jánaá si ñuu Sodomá, xinañúʼú ni̱ ta̱ndaʼá sí java na̱ ángel já ná kastu̱ʼun na xíʼín Lot ña̱ jánaá Ndio̱s ñuu Sodomá. Ta ni̱ saʼnda ángel yóʼo chuun nuu̱ Lot, ña̱ ná nomi̱ kíi̱ rá kana ra kuʼu̱n ra̱ xíʼín na̱ veʼe ra, ta ná o̱nándióko̱o na kande̱ʼé ná chí sata̱. Tá ni̱ ndiʼi jaá ni̱ ja̱kúun Ndio̱s ñoʼó ita̱ xíʼín yuu̱ káyi̱ já ni̱ ja̱naá si nuu̱ ñuu Sodomá xíʼín nuu̱ ñuu ni̱ si̱káa̱ yati ni̱ si̱naní Gomorrá. Ni̱ ka̱ku va Lot xíʼín ndin uvi̱ de̱ʼe jiʼí ra̱. Jo ni̱ siʼi̱ va ñajiʼí ra̱ jáchi̱ ṉi na̱ndióko̱o ñá ni̱ si̱nde̱ʼán chí sata̱, ndá ni̱ kundaʼví inián sa̱ʼá ña̱ ni̱ ja̱ndákoán chí sata̱. Ta ni̱ siʼi̱ va ñá sa̱ʼá ña̱ ko̱ ní sínajo̱ʼán ña̱ ni̱ kaʼa̱n ángel xíʼán.

(Ña̱yóʼo va̱sian nuu̱ tutu Génesis 11:10–19:38.)