SA̱ NI̱ kaʼa̱n va Jeová Ndio̱s ña̱ ki̱ʼo si ñúʼu̱ Canaán nuu̱ de̱ʼe Abraham kua̱ʼá kuia̱ chí sata̱ tá kúmani̱ ki̱ʼvi na̱ ñuu Israel nuu̱ ñuu íkáa. Ta viti ndáka Josué na̱ ñuu Israel si̱ ndíta ti̱ʼa na kuaʼa̱n na̱ ki̱ʼvi na nuu̱ Ñúʼu̱ ña̱ ni̱ Kaʼa̱n Ndio̱s ki̱ʼa si nuu̱ ná.

Ni̱ chi̱kaa̱ ini Ndio̱s jánaá si nu̱ú na̱ ñuu Canaán jáchi̱ na̱ to̱ndó ndiva̱ʼo ni̱ si̱kuu na, ta ni̱ si̱kee ndiva̱ʼo na kua̱chi kini nuu̱ Ndio̱s. Ta sa̱ʼá ña̱yóʼo ni̱ kachi Ndio̱s xíʼín na̱ ñuu Israel ña̱ ná jánaá na iníí ñuu Canaán.

Jo tá kúmani̱ ki̱ʼvi na̱ ñuu Israel nuu̱ ñuu Canaán xinañúʼú ni̱ ta̱ndaʼá Josué uvi̱ ta̱ ni̱ saʼa̱n ni̱ si̱na̱ní nuu̱ ñuu ikáa. Ñuu naní Jericó ni̱ ki̱ʼvi ta̱ yóʼo ta ni̱ saa̱ ra̱ ni̱ si̱ndoyi ra veʼe iin ñá ni̱ si̱naní Rahab. Ta ni̱ si̱ʼa ñá yóʼo veʼe ñá ni̱ si̱ndoyi ta̱ yóʼo va̱árá ni̱ si̱síni̱ ñá ña̱ ta̱ ñuu Israel kúú ta̱ yóʼo. ¿Ndiva̱ʼa ri? Jáchi̱ ni̱ sinajo̱ʼo ñá ña̱ káʼa̱n na̱ sa̱ʼá ña̱ ni̱ kee Jeová Ndio̱s já ni̱ ja̱káku si na̱ ñuu si, ña̱káa ni̱ ka̱ndeé inián si. Ta ni̱ ja̱síno̱ ñá ini ta̱ yóʼo ña̱ tá ná saa̱ na̱ ñuu Israel jánaá na nu̱ú na̱ ñuu Canaán ná ka̱ku mií ñá xíʼín na̱ veʼe ñá.

Jaá ni̱ ka̱sáʼá na̱ ñuu Israel naá na̱ xíʼín na̱ ñuu Jericó. Ta ni̱ ja̱nákava Jeová Ndios náma̱ ñuu ikáa já ni̱ kuu ni̱ ja̱naá na̱ ñuu Israel nu̱ú na̱ ñuu Jericó, jo ni̱ ka̱ku va Rahab xíʼín na̱ veʼe ñá. Nu̱ú iñu̱ kuia̱ ni̱ ndukúndéé Josué xíʼín na̱ ñuu Israel já ni̱ ka̱ndeé ná ni̱ nakiʼin na kuaʼa̱ Ñúʼu̱ ña̱ ni̱ Kaʼa̱n Ndio̱s ki̱ʼo si nuu̱ ná. Tá ni̱ ndiʼi já ni̱ na̱taʼnda̱ ñúʼu̱ yóʼo nu̱ú ndin uxi̱ uvi̱ taʼndá na̱ veʼe Israel.

Tá si̱ ni̱ ku̱yati ndiʼi ña̱ sínokuáchí Josué nuu̱ Ndio̱s, ni̱ ja̱nátaka ra ndiʼi na̱ ñuu. Ta ni̱ ja̱náku̱ʼun ra ini na ña̱ ni̱ kee Ndio̱s xíʼín na̱ veʼe na na̱ ni̱ si̱ndoyi tá yachi̱ ta ni̱ kachi ra xíʼín ná ña̱ ná kachúun ndaa̱ na̱ nuu̱ Ndio̱s. Jo tá ni̱ siʼi̱ Josué ta ni̱ siʼi̱ ndijaá ta̱ ni̱ sika̱nuu xíʼín rá, jaá kía̱n ni̱ ja̱nákoo na̱ ñuu Israel ña̱ kéekáʼno na Jeová Ndio̱s ta ni̱ ka̱sáʼá ná kéekáʼno na ndio̱s ko̱ ndáa̱ ió ñuyíví yóʼo. Nuu̱ tein uni̱ cientó kuia̱ chínuu̱ o̱ju̱ú ndijaá kivi̱ ní sinajo̱ʼo na chuun saʼndá Ndio̱s. Ta ni̱ si̱ja̱yaa̱ ndáʼa̱ ñaʼá Jeová Ndio̱s nuu̱ ndáʼa̱ ta̱ filisteo á nuu̱ na̱ java ka̱ ñuu na̱ si̱ka̱ndají ñaʼá tá ko̱ ní sísinajo̱ʼo na chuun saʼndá si. Jo tá ni̱ si̱káʼa̱n na̱ xíʼín Ndio̱s ña̱ ná chindeé ñaʼá sí, ni̱ si̱ka̱si Jeová Ndio̱s ta̱ kukuu juez já ná chi̱ndeé rá na̱. Ta uxi̱ uvi̱ ni̱ si̱kuu ndijaá ta̱ yóʼo.

Nu̱ú Tu̱ʼun Ndio̱s káʼa̱n ña sa̱ʼá kuia̱ ni̱ si̱io ña̱yóʼo, ta nu̱ú kasáʼá ñá nákanian sa̱ʼá iin ta̱ ni̱ si̱naní Otniel ta nu̱ú ndíʼi ña nákanian saʼa̱ iin ta̱ ni̱ si̱kuu ta̱a ndakú chááka̱ ni̱ si̱io ñuyíví yóʼo: ni̱ si̱naní Sansón. Ña̱ nákani tutu Jueces yóʼo jánaʼa̱ ña̱ iin ña̱ ndáya̱ʼvi ndiva̱ʼo nuu̱ yó: tá ná kunijo̱ʼo yó ña̱ káʼa̱n Jeová Ndio̱s naniʼi̱ yó ña̱ va̱ʼa, jo tá ko̱ó ndoʼo ndiva̱ʼo ini yó.

(Ña̱yóʼo va̱sian nuu̱ tutu Josué, Jueces xíʼín Levítico 18:24, 25.)