ÑANI keʼén Jesús ni̱ si̱kuu Santiago xíʼín Judas, ta Pedro xíʼín Juan ni̱ si̱kuu na̱ ni̱ xika̱nuu tuun xíʼín sí. Usa̱ tutu ña̱ va̱si nu̱ú Tu̱ʼun Ndio̱s ña̱ kúú tu̱ʼun Griegó ni̱ taa ndin kumi̱ na̱yóʼo, jáchi̱ ni̱ ja̱túu̱n Ndio̱s xinítóni̱ ná, ta iin tá iin tutu yó néʼan kivi̱ na̱ ni̱ taa ña. Ta ni̱ taa na̱yóʼo ndijaá tutu yóʼo jáchi̱ ni̱ kuni̱ na̱ chindeé ná ndijaá na̱ kuendá Jesús já ná kukuu na na̱yivi ndaa̱ nuu̱ Ndio̱s ta ná o̱ndándojó na̱ saʼa̱ Gobiernó Ndio̱s.

Ná naʼa̱ yó ña̱ kándeé ini yó Ndio̱s. Ko̱ kánian kaʼa̱n uun yó ña̱ kándeé ini yó Ndio̱s; xíʼín ña̱ kée va yó kánian naʼa̱ yo̱ ña̱yóʼo. Tátu̱ʼun ni̱ kaʼa̱n Santiago, “ko̱ ta̱kí ña̱ kándeé iní yo̱ Ndio̱s tá ko̱ kée yó ña̱ va̱ʼa” (Santiago 2:26). Tá ná kandeé ini yó Ndio̱s tá ndóʼo yó tu̱ndóʼó, jaá kía̱n nduu ndeé chááka̱ ini yó. Ta jaá ní kuu kaka̱ yó ña̱ ndi̱chí nuu̱ Ndio̱s, jáchi̱ kandeé ini yó ña̱ ki̱ʼa si ña̱ nuu̱ yó. Tá ná kukuu yó na̱yivi ndaa̱ nuu̱ Jeová Ndio̱s, jaá kía̱n kande̱ʼé va̱ʼa si ña̱ kée yó (Santiago 1:2-6, 12). Jaá ió va Ndio̱s ña̱ chindeé sí na̱ kúú na̱yivi ndaa̱ nuu̱ sí. Sa̱ʼá ña̱yóʼo kachí Santiago: “Kayati ndó nu̱ Ndióxi̱ ta já kayati Ndióxi̱ nu̱ ndo̱” (Santiago 4:8).

Ndijaá na̱ kuendá Jesús kánian kandeé ndiva̱ʼo ini na Ndio̱s jaá kía̱n o̱yáʼa na kee na ña̱ kini á ña̱ ko̱ váʼa ió ñuyíví yóʼo. Ni̱ si̱ndoyi ndiva̱ʼo na̱yivi ni̱ si̱kee kua̱chi kini nuu̱ Ndio̱s kivi̱ ni̱ si̱io Judas, sa̱ʼá ña̱yóʼo ni̱ kachi ra xíʼín na̱ ndíko̱ Jesús “ndi̱ʼi ini ndo̱ kandita ndaa̱ ndo̱ xíʼín ña̱ ndaa̱ kándísa yó” (Judas 3).

Ná kukuu yó na̱yivi vií nuu̱ Ndio̱s. Kúni̱ Jeová Ndio̱s ña̱ na̱ xinokuáchí nuu̱ sí ná kukuu na na̱yivi vií sata̱ ndijaá táʼa̱n ña̱ʼa. Sa̱ʼá ña̱yóʼo ni̱ taa Pedro: “Koo vii ndo̱ no̱ó ndidaá ña̱ kée ndó. Dáchi̱ diʼa kaá tuti ii̱ Ndio̱s: ‘Koo vii ndo̱, chi̱ na̱ vii kúú yuʼu̱ [Jeová]ʼ” (1 Pedro 1:15, 16). Ta sa̱ʼá ña̱yóʼo kuu kee yó ña̱ ni̱ kee Cristó, jáchi̱ ni̱ kachi Pedro ña̱ ki̱ʼa jaá ni̱ ja̱náʼa na nuu̱ yó já ná “kaka yó íchi̱ ni̱ xika mií ná” (1 Pedro 2:21). Ta va̱árá ná kanian ndoʼo ini na̱ ndíko̱ Jesús java taʼndá sa̱ʼá ña̱ sinajo̱ʼo na chuun saʼndá Ndio̱s, jo ña̱ kúni̱ʼi kía̱n ná koo “iin ña̱xintóni̱ vii” ná nuu̱ Ndio̱s (1 Pedro 3:16, 17). Ta jaá ní ni̱ kaʼa̱n Pedro ña̱ kúni̱ʼi ndiva̱ʼo ña̱ ná kukuu yó na̱yivi vií, ta xíʼín ña̱ kée yó ná naʼa̱ yo̱ ña̱ ndinuʼu ini yó xinokuáchí yó nuu̱ Ndio̱s, xía̱n nani ndáti yó kasaa̱ kivi̱ kee yíko̱ Ndio̱s saʼa̱ ndijaá ña̱ʼa, xíʼín ñuyíví sa̱á nu̱ú “koo ndinoʼo ña̱ ndaa̱” (2 Pedro 3:11-13).

Ná kiʼvi̱ ini yó saʼa̱ ñani táʼan yó. Ni̱ kachi Juan ña̱ “Ndio̱s kúú na̱ kúʼu̱ ini saʼa̱ yó”. Ta ni̱ naʼa̱ Jeová Ndio̱s ña̱ kiʼvi̱ ndiva̱ʼo ini si yó, tá ni̱ ta̱ndaʼá si de̱ʼe si Jesús ni̱ kixi na ni̱ siʼi̱ na já “ni̱ chi̱ya̱ʼi na sa̱ʼá kua̱chi yó”. ¿Ndixi kuu naʼa̱ yó ña̱ nákuni yó ña̱ ni̱ kee Ndio̱s saʼa̱ yo̱? Apóstol Juan ni̱ na̱kani ndixi: “Na̱ mani̱ miíi̱, tá ki̱ʼo dión kúʼu̱ ini Ndio̱s saʼa̱ yo̱, dá kía̱n ki̱ʼo dión taʼani kánian kuʼu̱ ini sátáʼan yó” (1 Juan 4:8-11). Iin ña̱ kánian kee yó já naʼa̱ yó ña̱ kíʼvi̱ ini yó ñani táʼan yó na̱ iin kándísa xíʼín yó kía̱n chindeé yó na̱ xíʼín ña̱ xíniñúʼú ná (3 Juan 5-8).

Ta ¿ndixi kuu naʼa̱ na̱ xinokuáchí nuu̱ Jeová Ndio̱s ña̱ kúni̱ ndisa na si? Ni̱ na̱ndiónéʼe Juan tu̱ʼun yóʼo tá ni̱ kachi ra: “Tá kóni̱ ndisa yó Ndio̱s, dá kía̱n kee yó choon saʼándá na̱. Ta ko̱ ta̱ʼón ña̱ kuáchi̱ kíán kee yó choon saʼándáa̱n” (1 Juan 5:3; 2 Juan 6). Sa̱ʼá ña̱yóʼo tá ná kunijo̱ʼo yó chuun saʼndá Ndio̱s, jaá kía̱n kuu kandeé ini yó ña̱ ndijaá táʼa̱n kivi̱ kiʼvi̱ ini Ndio̱s saʼa̱ yó xía̱n nani ndáti yó ña̱ “kataki chíchí” yó (Judas 21).

(Ña̱yóʼo va̱sian nuu̱ tutu Santiago, 1 Pedro, 2 Pedro, 1 Juan, 2 Juan, 3 Juan xíʼín Judas.)