TUTU Revelación á Apocalipsis ña̱ nu̱jandíʼí va̱si nu̱ú Tu̱ʼun Ndio̱s, náki̱ʼo ña̱ to̱ndeé iní nuu̱ ndijaá na̱yivi. Apóstol Juan ni̱ taa tutu yóʼo, ta ni̱ taa ra kua̱ʼá ña̱ ni̱ kee Ndio̱s ña̱ ni̱ xini ra ña̱ koo chááka̱ chínuu̱, ta xino̱ko̱o ndijaá ña̱yóʼo koan tá ná koo ña̱ kúni̱ Jeová Ndio̱s.

Ta ña̱ xinañúʼú ni̱ si̱ʼa Ndio̱s ni̱ xini Juan, kúú nu̱ú ni̱ xini ra Jesús tá sa̱ ni̱ na̱taku si, ta ni̱ na̱ki̱ʼo si to̱ndeé ini nu̱ú kua̱ʼá na̱ kuendá sí na̱ jíin jíin ñuu, ta ni̱ kaʼa̱n niʼni si xíʼín ná. Ta nuu̱ inga̱ ña̱ ni̱ xini ra, yóʼo kúú nu̱ú nákani ra ndixi káa nu̱ú ió Ndio̱s néʼe si chuun indiví, ta yóʼo kúú nu̱ú ndóyi ángel kée káʼno na Ndio̱s.

Tá sa̱ kúyati xino̱ko̱o ndijaá ña̱ kúni̱ Ndio̱s koan, jaá kía̱n ni̱ niʼi̱ Jesucristó ta kúú tátu̱ʼun iin ndikachi iin tutu ni̱ na̱ti̱ví tuun, ta ndají yuʼán xíʼín usa̱ selló. Tá ni̱ saʼnda Jesús kumi̱ selló yóʼo, jaá ni̱ xini Juan, kumi̱ ta̱a kándojó kuéi̱. Ta ta̱ va̱si nuu̱ kúú Jesús, ta kánóo si sata̱ iin kuéi̱ ku̱xí va̱si si̱, ta ni̱ ka̱sáʼá Néʼe si chuun. Tá ni̱ ndiʼi jaá va̱si uni̱ ka̱ ta̱ kándojó kuéi̱, ta jíin jíin ndéʼé kuéi̱ kándojó rá, ta kuéi̱ yóʼo kúni̱a̱n kachian tu̱ndóʼó ña̱ saʼní táʼan na̱yivi, tama̱ xíʼín kueʼe̱, ta ndijaá ña̱yóʼo náʼa̱a̱n ña̱ si̱ ni̱ ku̱yati va ndiʼi nuu̱ ñuyíví yóʼo. Tá ni̱ taʼnda̱ selló kúú usa̱ jaá ni̱ tavi̱ ni̱ tivi na usa̱ trompetá, ta ña̱yóʼo kúni̱a̱n kachian ña̱ kástu̱ʼun na sa̱ʼá ña̱ va̱si Ndio̱s keeyíko̱ si. Yóʼo kúú nu̱ú kasáʼá usa̱ ka̱ tu̱ndóʼó, á ña̱ naʼa̱ ña̱ ni̱ xijo̱ ini Ndio̱s.

Jaá ni̱ xini Juan ña̱ ni̱ kaku iin ta̱ yií lóʼo̱, ta ña̱yóʼo kúni̱a̱n kachian ña̱ sa̱ ni̱ ka̱sáʼá vá Jesús néʼe si chuun indiví. Jaá ni̱ ka̱sáʼá tu̱ndóʼó indiví, jaá ni̱ ja̱kána niʼni Ndio̱s Satanás xíʼín ndijaá ángel kini, jaá ni̱ na̱xino̱a̱n nuu̱ Ñúʼu̱ yóʼo. Jaá ni̱ sinijo̱ʼo na iin tachi̱ ni̱ʼi ni̱ kaʼa̱n, ta ni̱ kachian: “Ndaʼí kúu ví ndoʼó, na̱ ndéi no̱ñóʼo̱ xaa̱n”. Jáchi̱ xíjo̱ ndiva̱ʼo ini Ti̱míaʼá, ta xíni̱an ña̱ nda̱já cháá vá kivi̱ kooan (Apocalipsis 12:12).

Jaá ni̱ xini tuku Juan Jesús indiví káa, ta kúú sí tátu̱ʼun iin ndikachi, ta ndóyi 144.000 na̱yivi na̱ ni̱ ka̱xi Ndio̱s já “kakomí na̱ kuentá sa̱ʼá ña̱yivi” xíʼín Jesús. Sa̱ʼá ña̱yóʼo tutu Apocalipsis jánaʼa̱a̱n, ña̱ 144.000 va kúú na̱yivi na̱ kúú kuendá inga̱ sio tata na̱ ni̱ kaʼa̱n Ndio̱s tandaʼá sí kixi (Apocalipsis 14:1; 20:6).

Tá ni̱ ndiʼi jaá ni̱ na̱taka ndijaá ta̱ néʼe chuun nuu̱ Ñúʼu̱ yóʼo nu̱ú naní Armagedón á nu̱ú “na̱á ra̱ xíʼín Ndio̱s tá ná kasandaá kuu̱ ni̱ ka̱xi mií Ndio̱s, na̱ kándeé kée ndidaá táʼa̱n ña̱ʼa”, ta yóʼo kúú nu̱ú na̱á ra̱ xíʼín Jesús ta kánóo sata̱ iin kuéi̱ ku̱xí, ta xíʼín ndijaá na̱ ángel indiví va̱si xíʼín sí. Ta ¿ndixi ndiʼi nu̱ú tu̱ndóʼó yóʼo? Yóʼo kúú nu̱ú jánaá si nuu̱ ndijaá ta̱ néʼe chuun ñuyíví yóʼo, ta kató sí Satanás. Ta iin mil kuia̱ kaʼnda Jesús chuun nuu̱ Ñúʼu̱ yóʼo xíʼín 144.000 na̱yivi, ta tá ná ndiʼi nuu̱ iin mil kuia̱ yóʼo, jaá kía̱n iin ndée̱ vá naá nu̱ú Ti̱míaʼá (Apocalipsis 16:14; 20:4).

Ta ¿ndíki̱án kee Cristó sa̱ʼá na̱yivi na̱ sinajo̱ʼo ña̱ káʼa̱n Ndio̱s, tein iin Mil kuia̱ ña̱ Kaʼnda si chuun? Ña̱yóʼo ni̱ taa apóstol Juan: “Ta dánayaa Ndios ndirnoo̱ ña̱yuu na̱. Ta o̱ ku̱ú ka̱ na̱, ta ni o̱ kúndaʼí ka̱ ini na̱, ta o̱ kuáki ka̱ na̱, ta o̱ ndóʼo ka̱ nío̱ ná, dá chi̱ ndidaá ña̱ʼa sa̱ ndoʼo na tá sata̱ ni̱ ke̱xoo vaan” (Apocalipsis 21:4). Jaá kía̱n, ¡nduu ñúchí tuku nuu̱ Ñúʼu̱ yóʼo!

Ta xíʼín tu̱ʼun ña̱ va̱si nuu̱ tutu Apocalipsis yóʼo xíno̱ko̱o ndijaá ña̱ káʼa̱n Tu̱ʼun Ndio̱s: tá ná Kaʼnda Mesías chuun nuu̱ Ñúʼu̱ yóʼo jaá kía̱n jándúvií Jeová Ndio̱s kivi̱ sí, ta yóʼo kúú nu̱ú jánaʼa̱ káxí sí ña̱ iin túʼún mií vá sí kánian kaʼnda chuun ndijaá táʼa̱n kivi̱.

(Ña̱yóʼo va̱sian nuu̱ tutu Apocalipsis.)