TÁ IÓ Jesús xini̱ yúku̱ naní Olivós, nu̱ú ñúchí ndiva̱ʼo ni̱ si̱ti̱vi ñuu Jerusalén xíʼín veʼe nu̱ú ni̱ si̱keekáʼno na Ndio̱s, jaá ni̱ na̱tivi yati kumi̱ na̱ ni̱ xika tuun xíʼín sí nu̱ú ko̱ íin ndóyi jaá ni̱ ndaka̱tu̱ʼún xoo na si, já ná nakani si nuu̱ ná sa̱ʼá java ña̱ ni̱ kaʼa̱n si tá yachi̱. Jáchi̱ sa̱ ni kaʼa̱n va Jesús xíʼín ná ña̱ naá nuu̱ veʼe ñu̱ʼu Jerusalén, ta tá yachi̱ chááka̱ ni̱ kaʼa̱n si xíʼín ná sa̱ʼá “ki̱ví ndiʼi sa̱ʼá ñuyíví” (San Mateo 13:40, 49). Sa̱ʼá ña̱yóʼo ni̱ ndaka̱tu̱ʼún na̱ si: “¿Ndá ama koo [...] ndiʼi ña̱yóʼo. Ta ndaja koo tá ná xi̱nu̱ko̱o ki̱ví kixi tuku [ní] ñuyíví yóʼo?” (San Mateo 24:3).

Nu̱ú tu̱ʼun ni̱ na̱ndiónéʼe Jesús nuu̱ ná, yóʼo kúú nu̱ú ni̱ kaʼa̱n kásí si xíʼín ná ndijaá ña̱ koo tá si̱ ni̱ ku̱yati kivi̱ ña̱ naá nuu̱ ñuu Jerusalén. Jo kua̱ʼá ka̱ va néʼe tu̱ʼun ña̱ ni̱ kaʼa̱n si, jáchi̱ chááka̱ chínuu̱ jaá kía̱n saa̱ ña̱yóʼo koan nuu̱ iníí kúú ñuyíví. Sa̱ʼá ña̱yóʼo kánian kandoyi ti̱ʼa ndiva̱ʼo na̱yivi kande̱ʼé ná iin ña̱ naʼa̱ ña̱yóʼo, já kuu kandaa̱ ini na ndá ama nandióko̱o tuku Jesús kixi si. Ta ña̱yóʼo saa̱ ña̱ koan: tein iin túʼún tiempó tá ná koo ndijaá tu̱ndóʼó yóʼo nuu̱ inií kúú ñuyíví. Ta ndijaá ña̱ kúu nuu̱ Ñúʼu̱ yóʼo, ña̱yóʼo kía̱n naʼa̱ ña̱ si̱ ni̱ ka̱sáʼá néʼe Jesús chuun indiví. Yóʼo kúú nu̱ú jáya̱ʼa Jeová Ndio̱s chuun nuu̱ ndáʼa̱ Jesús já kukuu si Rey kuendá Gobiernó Mesías, ta yóʼo kúú nu̱ú naʼa̱ ña̱ si̱ ni̱ ku̱yati va jándíʼi gobiernó yóʼo nu̱ú ña̱ kini ió nuu̱ ñuyíví, ta na̱kandoyi va̱ʼa na̱yivi nuu̱ iníí kúú ñuyíví yóʼo. Ña̱káa ndijaá ña̱ si̱ ni̱ kaʼa̱n Jesús ña̱ koo, ña̱yóʼo kúú ña̱ naʼa̱ ña̱ si̱ ni̱ ku̱yati ndiʼi nuu̱ ñuyíví yóʼo —xíʼín ndijaá ña̱ kúú kuendá religión ña̱ ko̱ jánaʼa̱ ña̱ ndaa̱, xíʼín polítika̱, ta ki̱ʼa ndóyi na̱yivi— tá ni̱ ndiʼi nu̱ú ña̱yóʼo jaá kía̱n ka̱sáʼá ñuyíví sa̱á.

Ni̱ kachi Jesús ña̱, tá ná kasáʼá sí kaneʼe si chuun indiví, nuu̱ iníí kúú nuu̱ Ñúʼu̱ yóʼo ndakui̱ta na na̱á na̱, ta koo jo̱ko, ta koo ña̱ táan xíʼín kueʼe̱. Kua̱ʼá na̱yivi o̱kúnijo̱ʼo ka̱ na̱ ña̱ káʼa̱n ley. Ta jaá ní kakanuu na̱ kúú ndisa na̱ ndíko̱ Jesús kastu̱ʼun na tu̱ʼun va̱ʼa saʼa̱ Gobiernó Ndio̱s nuu̱ iníí kúú nuu̱ Ñúʼu yóʼo. Tá ná si̱no ndiʼi ña̱ ni̱ kaʼa̱n Jesús yóʼo koan jaá kía̱n kasáʼá “ki̱ví ndoʼo ndiva̱ʼa ini ña̱yivi” ta nda̱ ki̱ví ni̱ kasáʼá ñuyíví yóʼo ko̱ ní ndóʼo ini na tátu̱ʼun ki̱ʼa ndoʼo ini na kivi̱ jaá (San Mateo 24:21).

Ta ¿ndixi kuu kee na̱ ndíko̱ Jesús já kandaa̱ ini na ña̱ si̱ ni̱ ku̱yati kivi̱ tu̱ndóʼó yóʼo? “Kaneʼe ndó kuendá táto̱ʼon ki̱ʼo kée ta̱ño̱ʼó” ni̱ kachi Jesús xíʼín na̱ ni̱ si̱ndíko̱ si (San Mateo 24:32). Tá kásáʼá nána nóma̱ yúta̱ ndáʼa̱ yíto̱, jaá kía̱n kúndaa̱ ini yó ña̱ si̱ ni̱ ku̱yati va yoo̱ kuun javi̱. Jaá ní, tá tein iin túʼún tiempó ná koo ndijaá tu̱ndóʼó ña̱ ni̱ kaʼa̱n Jesús ña̱ koo, yóʼo kúú nu̱ú kandaa̱ ini yó ña̱ si̱ ni̱ ku̱yati ndiva̱ʼo kivi̱ ña̱ ndiʼi nuu̱ ñuyíví yóʼo. Ta ni̱ kachi Jesús ña̱ iin túʼún laá tatá va si kúú ta síni̱ ndá horá ta ndá kivi̱ kasáʼá tu̱ndóʼó káʼno yóʼo. Sa̱ʼá ña̱yóʼo ni̱ kachi si xíʼín na̱ ndíko̱ si: “Kañuʼu ini ndó [...] jáchi̱ ko̱ xíni̱ ndó ndá ki̱ví xi̱nu̱ko̱o ña̱yóʼo” (San Marcos 13:33).

(Ña̱yóʼo va̱sian nuu̱ capítulo 24 xíʼín 25 tutu San Mateo, capítulo 13 San Marcos xíʼín capítulo 21 San Lucas.)