¿NDIXI kuu nakuni na̱yivi Mesías? Mií Ndio̱s kastu̱ʼun si yoo kúú rá. Kumi̱ cientó kuia̱ tá ni̱ ndiʼi ña̱ ni̱ taa na Tu̱ʼun Ndio̱s ña̱ kúú tu̱ʼun Hebreó, jaá ni̱ naʼa̱ iin ángel naní Gabriel nuu̱ María, iin ñá tákú ni̱ si̱io chí sio ni̱no ñuu Galilea, nuu̱ iin ñuu naní Nazaret. Ta ni̱ ka̱stu̱ʼun ángel Gabriel xíʼín María ña̱ koo iin leé ñá. Va̱árá tu̱ñáʼa̱ ka̱ koo ñá xíʼín iin ta̱ ta̱a, jáchi̱ kachúun Ndio̱s ndée̱ ii̱ sí, ña̱ kúú espíritu santó si já kee si ña̱ kañuʼu de̱ʼe ñá. Ta̱ lóʼo̱ yóʼo kukuu Rey ni̱ ka̱ndo̱o Ndio̱s tandaʼá sí kixi já kaʼnda si chuun ndijaá táʼa̱n kivi̱. Ña̱ ndaa̱ kía̱n de̱ʼe mií vá Ndio̱s kúú ta̱ lóʼo̱ yóʼo, ta mií vá Ndio̱s kee ña̱ kaku ta̱ leé yóʼo ti̱si María.

Ndaʼví va ni̱ si̱io ini María yóʼo ta ni̱ ka̱ndísa ñá ña̱ ni̱ kaʼa̱n ángel xíʼín ñá. Ta ta̱ ni̱ si̱ʼa tu̱ʼun ña̱ tandaʼa̱ rá xíʼín ñá ni̱ si̱kuu ra iin ta̱ túxí yíto̱ ni̱ si̱naní José, tá ni̱ ndiʼi ña̱ ni̱ ta̱ndaʼá Ndio̱s iin ángel sí já ni̱ na̱kani ra xíʼín ta̱ yóʼo ndiva̱ʼa ñúʼú ri de̱ʼe María yóʼo, jaá kía̱n ni̱ ta̱ndáʼa̱ rá xíʼín ñá. Jo ná naku̱ʼun ini yó ña̱ ni̱ kachi na ña̱ nuu̱ ñuu Belén va kaku Mesías yóʼo, o̱ju̱ú nuu̱ ñuu Nazaret (Miqueas 5:2). Jo ¿ndixi saa̱ tu̱ʼun yóʼo kooan? Jáchi̱ 140 kilómetro síká ni̱ si̱káa̱ ñuu yóʼo nu̱ú ni̱ si̱ndoyi na.

Chááka̱ ni chínuu̱ jaá kía̱n ni̱ saʼnda iin ta̱ néʼe chuun ñuu Romá chuun ña̱ ná nakaʼvi na ndijaá táʼa̱n na̱yivi na̱ ndóyi nuu̱ ñuu íkáa, ta ndijaá táʼa̱n na̱yivi ni̱ kanian ni̱ saʼa̱n na̱ ni̱ na̱kojo̱ na̱ ñuu nu̱ú ni̱ kaku na. Ta na̱ ñuu Belén ni̱ si̱kuu na̱ veʼe José xíʼín María. Sa̱ʼá ña̱yóʼo ni̱ kana José ni̱ saʼa̱n ra̱ ñuu íkáa xíʼín ñajiʼí ra̱, tá si ni̱ ku̱yati kivi̱ kaku de̱ʼe ñá (San Lucas 2:3). Ta nu̱ú ñúʼu va̱ʼa kíti̱ ni̱ kaku Jesús, ta ni̱ kanian ni̱ chi̱ndúʼu̱ ná xi nu̱ú sísáʼan kíti̱. Jaá ní, ni̱ ta̱ndaʼá Ndio̱s kua̱ʼá na̱ ángel sí nu̱ú ndóyi java ta̱ ndáka ndikachi nuu̱ iin yúku̱ yati nu̱ú ni̱ kaku Jesús yóʼo, já ná kastu̱ʼun na xíʼín rá ña̱ si̱ ni̱ kaku va Mesías, á Cristó ta ni̱ kachi na ña̱ kisi.

Jaá ní, kaʼa̱n java ka̱ na̱ ña̱ Jesús kúú Mesías ta ni̱ ka̱ndo̱o Ndio̱s tandaʼá sí kisi. Si̱ ni̱ kachi va ta̱ profetá Isaías ña̱ koo va iin na̱ kajanduu íchi̱ já kasáʼá koo chuun kúni̱ʼi ña̱ kee Cristó (Isaías 40:3). Ta̱ ni̱ kee ña̱yóʼo ni̱ si̱kuu Juan Bautistá. Tá ni̱ xini ra Jesús, já ni̱ kachi ra: “Kande̱ʼé ndo̱. Da̱ va̱xi ja̱n kúú dá tátu̱ʼun ndikachi jóko̱ na̱ nu̱ Ndióxi̱. Ta da̱ ja̱n kúú da̱ jándoo kua̱chi ña̱yivi [ndóyi] ñuyíví”. Ta java ta̱ ni̱ si̱xika̱nuu xíʼín Juan Bautistá vitíʼón kíi̱ ni̱ ndiko̱ ra̱ Jesús. Ta iin ta̱ yóʼo ni̱ kachi ra: “Ni̱ na̱kiʼin táʼan ndu xíʼín na̱ kúú Mesías” (San Juan 1:29, 36, 41).

Jo ña̱ ni̱ naʼa̱ chááka̱ ña̱ Jesús kúú Mesías, ña̱yóʼo va̱si i̱í váán kooan. Tá ni̱ kajandúta̱ Juan Jesús, jaá kía̱n ni̱ kaʼa̱n mií Jeová Ndio̱s nda̱ indiví. Yóʼo kúú nu̱ú ni̱ ka̱si Ndio̱s xíʼín espíritu ii̱ sí Jesús já kukuu si Mesías ta diʼa ni̱ kachi si: “Yoʼó kúún ja̱ʼyi ma̱níi̱ ta káji̱i̱ ndiva̱ʼa inii̱ xu̱ʼu̱n” (San Mateo 3:16, 17). ¡Nda̱ yóʼo ví kúú nu̱ú ni̱ kasaa̱ Mesías ta ni̱ kachi na kisi!

Jo ¿ndá nama ni̱ si̱io ña̱yóʼo? Ña̱yóʼo ni̱ si̱ioan kuia̱ 29 tá sa̱ ni̱ kasáʼá kuia̱ 1, tá míí kuia̱ ni̱ si̱no kumi̱ cientó kumi̱ xíko uni̱ kuia̱ ña̱ si̱ ni̱ kachi Daniel ña̱ ya̱ʼa. Jaa̱n, ña̱yóʼo kúú java va ña̱ náʼa̱ ña̱ Jesús kúú Mesías, á Cristó. Jáchi̱ ió ka̱ ví kua̱ʼá ka̱ ña̱ naʼa̱ ña̱yóʼo. Jo ¿ndá sa̱ʼá kía̱n kaʼa̱n ta̱ yóʼo ndijaá kivi̱ ña̱ koo ra nuu̱ Ñúʼu̱ yóʼo?

(Ña̱yóʼo va̱sian nuu̱ capítulo 1 nda̱ 3 San Mateo, capítulo 1 San Marcos, capítulo 2 San Lucas xíʼín capítulo 1 San Juan.)