SECCIÓN 21
Ni̱ na̱taku Jesús
Ni̱ naʼa̱ Jesús mií sí nu̱ú na̱ ni̱ si̱ndíko̱ ñaʼá já ni̱ na̱ki̱ʼa si to̱ndeé iní nuu̱ ná, ta ni̱ saʼnda si java ka̱ chuun nuu̱ ná
TÁ NI̱ xi̱no uni̱ kivi̱ ña̱ ni̱ siʼi̱ Jesús, jaá ni̱ saʼa̱n java na̱ ñáʼa̱ na̱ ndíko̱ ñaʼá ni̱ si̱nde̱ʼé ná nu̱ú ni̱ ndu̱xi si. Ta tá ni̱ saa̱ na̱ si̱ náʼa̱ va ña̱ ió na̱ ni̱ ja̱kúsio yuu̱ ndají yuʼú yávi̱ íkáa, ta ko̱ ní nániʼi̱ ka̱ na̱ yikí ku̱ñu Jesús.
Jaá ni̱ saa̱ uvi̱ ángel nu̱ú ndíta na̱yóʼo. Ta ni̱ kachi iin ángel yóʼo á: “Nándukú ndó Jesús, na̱ ñoo Nazaret [...] ni̱ na̱taki va na” (San Marcos 16:6). Ta vitíʼón ni̱ kana̱kunu na̱yóʼo ni̱ saʼa̱n na̱ ni̱ ka̱stu̱ʼun na xíʼín na̱ ni̱ xika tuun xíʼín Jesús. Ta íchi̱ nu̱ú xíka na̱yóʼo kuaʼa̱n na̱, ni̱ na̱kotáʼan na xíʼín Jesús, ta ni̱ kachi si xíʼín ná: “Ná dáʼa ni yu̱ʼú ndo̱. Kuaʼán ndo̱ kasto̱ʼon ndó xíʼín ñani kuálíi̱ ña̱ ná koʼo̱n xi̱ chí Galilea diʼa, ta ñoó koni xi̱ yuʼu̱” (San Mateo 28:10).
Chááka̱ ni si̱ini, tá ni̱ kana uvi̱ na̱ ndíko̱ Jesús nuu̱ ñuu Jerusalén xíka na kuaʼa̱n na̱ chí inga̱ ñuu naní Emaús, jaá ni̱ na̱kotáʼan na xíʼín iin ta̱ ko̱ síni̱ na̱, jaá ni̱ ndaka̱tu̱ʼún rá na̱ ndáki̱án ndatúʼún ná kuaʼa̱n na̱. Mií vá Jesús kúú ta yóʼo, jo ko̱ ní nákuni ñaʼá ná jáchi̱ sa̱ jíin va káa si. Ndaʼví kúú ini na ta ni̱ kachi na xíʼín rá, ña̱ saʼa̱ Jesús ndatúʼún ná va̱si na, ta ni̱ ka̱sáʼá ta̱ yóʼo nákani ra nuu̱ ná, ndijaá ña̱ káʼa̱n Tutu Ii̱ saʼa̱ Mesías. Jáchi̱ ndijaá ña̱ sa̱ ni̱ kaʼa̱n na̱ ña̱ ndoʼo Mesías ni̱ xino̱ko̱an ni̱ si̱ioan xíʼín Jesús. * Ta tá ni̱ ka̱ndaa̱ ini na ña̱ xíʼín mií vá Jesús káʼa̱n na̱, jaá kía̱n ni̱ naá níʼni si nuu̱ ná jáchi̱ si̱ ni̱ nduu si iin espíritu va.
Ta ni̱ na̱ndióko̱o tuku ndin uvi̱ na̱ ni̱ si̱ndíko̱ Jesús yóʼo nuu̱ ñuu Jerusalén, nu̱ú ndóyi na̱ ni̱ si̱xika tuun xíʼín Jesús, ta tá ni̱ saa̱ na̱ ndají tuun yéʼé ndóyi na̱yóʼo ini veʼe. Ta tá míí nákani na̱yóʼo ña̱ ni̱ ndoʼo na íchi̱ nu̱ú ni̱ kixi na, jaá ni̱ ka̱sáa̱ tuku Jesús, ta ndijaá na̱ ndóyi íkáa ni̱ naá vá ini na tá ni̱ xini na si. Jaá ni̱ ndaka̱tu̱ʼún sí na̱: “[¿]Ndá kuentá kéa̱ ko̱ [kándísa] ndó ña̱ kúú ye̱ʼe̱ Jesús[?]”. Ta ni̱ kachi si xíʼín ná: “Káʼa̱n tuti ii̱ Ndio̱s ña̱ miía̱n ndúsa̱ ndoʼo naní nío̱ Cristo, [...] dá nataki na̱ ti̱xi kuu̱ óni̱ tein na kúú ndi̱i” (San Lucas 24:38, 46).
Ta tein uvi̱ xiko kivi̱ chínuu̱ tá si̱ ni̱ na̱taku Jesús, kuaʼa̱ taʼndá ni̱ naʼa̱ si mií sí nu̱ú na̱ ni̱ si̱ndíko̱ ñaʼá. Tá iin taʼndá yóʼo ni̱ naʼa̱ si mií sí nu̱ú yáʼa chááka̱ uʼu̱n cientó na̱yivi. Ndá yóʼo ví kúú nu̱ú ni̱ saʼnda si iin chuun kúni̱ʼi ndiva̱ʼo nu̱ú na̱ ndíko̱ si, tá ni̱ kachi si xíʼín ná: “Kuáʼán ndo̱ jána̱ʼa̱ ndo̱ nu̱ú ña̱yivi ndúu ndijáá ñuyíví ndaja kaja na kaka va̱ʼa na íchi̱ kuentá míi̱ [...] jána̱ʼa̱ ndó na̱ ña̱ ná kaja na [...] ndiʼi ña̱ na̱ saʼndai̱ nu̱ ndó kaja ndó. Ta méa̱ ndaa̱ kooi̱ xi̱ʼi̱n ndo̱ ndijáá níí kivi̱ ja̱nda̱ kia̱ʼva ná xi̱nu̱ ko̱o ki̱vi̱ ndiʼi saʼa̱ ñuyíví” (San Mateo 28:19, 20).
Tá kivi̱ nu̱jandíʼí ni̱ si̱io Jesús xíʼín uxi̱ iin na̱ ni̱ xika tuun ndaa̱ ndisa xíʼín sí, jaá ni̱ kachi si xíʼín ná: “Tído natiin ndó choon tá ná xino̱ Espíritu ii̱ Ndios dákútí[án] [...] nío̱ ndo̱, dá kankuei ndó ki̱ʼo ndó kuendá sa̱ʼá yúʼu̱ no̱ó [...] ndidaá kúú xíán nda̱ noo̱ xíká cháá ka̱ ñayuú yóʼo” (Hechos 1:8). Tá ni̱ ndiʼi, jaá ni̱ nana Jesús kuaʼa̱n si indiví ta iin viko̱ ni̱ chi̱ja̱ʼvi si nu̱ú na̱ ni̱ si̱ndíko̱ ñaʼá.
(Ña̱yóʼo va̱sian nuu̱ capítulo 28 San Mateo, capítulo 16 San Marcos, capítulo 24 San Lucas, capítulo 20 xíʼín 21 San Juan xíʼín 1 Corintios 15:5, 6.)
^ parr. 6 Kuu na̱niʼi̱ ní java ka̱ ña̱ si̱ ni̱ kaʼa̱n na̱ ña̱ ndoʼo Mesías ña̱ ni̱ sino̱ko̱o ni̱ si̱ioan xíʼín Jesús, tá ná kaʼvi ní sección 14, sección 15 xíʼín sección 16 tutu yóʼo, ta jaá ní nuu̱ sección ña̱ naní “Jesucristo, el Mesías prometido” apéndice tutu ña̱ naní ¿Qué enseña realmente la Biblia?
