TÁ NI̱ ya̱ʼa kivi̱ ña̱ ni̱ ja̱ndákoo Salomón ña̱ kéekáʼno ra Jeová Ndio̱s, jaá kía̱n ni̱ taʼnda̱ táʼan na̱ ñuu Israel tátu̱ʼun ki̱ʼa si̱ ni̱ kaʼa̱n Ndio̱s ña̱ koo. Ni̱ ja̱yáʼa Salomón chuun ni̱ si̱neʼe ra nu̱ú de̱ʼe ra Rehoboam, ta̱ kini ndiva̱ʼo ni̱ si̱kuu ta̱ yóʼo xíʼín na̱ ñuu Israel, sa̱ʼá ña̱yóʼo ni̱ kana jíin va na̱ uxi̱ taʼndá na̱ veʼe Israel na̱ ni̱ ka̱ndo̱o chí sio ni̱no kuaʼa̱n na̱. Jo na̱ uvi̱ ta̱ʼndá na̱ veʼe Israel na̱ ni̱ si̱kuu na̱ ñuu Judá ni̱ si̱ndiko̱ i̱í vá ná ta̱ rey ni̱ si̱neʼe chuun nuu̱ ñuu Jerusalén nu̱ú ni̱ si̱io David ni̱ si̱neʼe ra chuun.

Ta ko̱ ní kúu ka̱ kandoyi va̱ʼa na̱ ñuu Israel yóʼo sa̱ʼá ña̱ ko̱ ní sinajo̱ʼo ta̱ ni̱ si̱kuu rey nuu̱ ná ña̱ ni̱ kaʼa̱n Ndio̱s, ta sa̱ʼá ña̱ ko̱ ní kándeé ini ra̱ sí. Jo ta̱ ni̱ si̱kuu ta̱ kini chááka̱ ví ni̱ si̱kuu ta̱ ni̱ si̱neʼe chuun chí sio ni̱no ñuu Israel, jáchi̱ nda̱ míí saʼa̱ va ni̱ ja̱kasáʼá rá nuu̱ religión ña̱ ko̱ ndáa̱. Ta va̱árá ni̱ ta̱ndaʼá Ndio̱s profeta si Elías xíʼín Eliseo —ta̱ ni̱ ja̱nátaku java na̱yivi na̱ ni̱ siʼi̱— já ná kaʼa̱n ra̱ xíʼín ná, jo ko̱ ní xíin na kunijo̱ʼo na ña̱ ni̱ kaʼa̱n ra̱. Sa̱ʼá ña̱yóʼo tá ni̱ ndiʼi, já ni̱ si̱ʼa va̱ Ndio̱s íchi̱ ña̱ ni̱ ka̱ndeé na̱ ñuu Asiria ni̱ na̱kiʼin na ñuu Israel.

Yáʼa chááka̱ nuu̱ iin cientó kuia̱ tá ni̱ ndiʼi, jaá ní ni̱ si̱ʼa Ndio̱s íchi̱ ña̱ ni̱ ndoʼo ini na̱ ni̱ ka̱ndo̱o ñuu Judá yóʼo. Ni̱ ka̱stu̱ʼun va ta̱ profeta Ndio̱s nuu̱ ndijaá ta̱ ni̱ si̱kuu rey yóʼo, jo cháá ndiva̱ʼo ta̱ yóʼo ni̱ sinajo̱ʼo ña̱ ni̱ kaʼa̱n Ndio̱s ta ni̱ kee ra tata̱ ni̱ kaʼa̱n ra̱ xíʼín na̱ ñuu Israel ña̱ ná nandióko̱o tuku na ndiko̱ na̱ Jeová Ndio̱s. Iin ta̱ yóʼo ni̱ si̱kuu ta̱ rey Josías, ta̱ ni̱ chi̱kaa̱ ini jándíʼi ra nu̱ú ña̱ ni si̱keekáʼno na toʼó, ta ni̱ ndaja̱va̱ʼa ra veʼe nu̱ú kéekáʼno na Jeová Ndio̱s. Tá ñúʼu na káchúun na, yóʼo ni̱ nda̱níʼi̱ ná tutu ña̱ ni̱ si̱ʼa Ndio̱s nuu̱ Moisés nu̱ú va̱si chuun saʼndá si. Jaá kía̱n ni̱ kujii̱ ndiva̱ʼo ini Josías ta ni̱ sino̱ chááka̱ ví ini ra jándíʼi ra nu̱ú ña̱ kéekáʼno na toʼó.

Ndaʼví kuaʼa̱n, jáchi̱ ndijaá ta̱ ni̱ si̱kuu rey tá ni̱ ndiʼi ña̱ ni̱ si̱neʼe Josías yóʼo chuun, ko̱ ní kée ra tátu̱ʼun ni̱ kee ta̱ yóʼo. Ta sa̱ʼá ña̱yóʼo ni̱ si̱ʼa Jeová Ndio̱s íchi̱ ña̱ ni̱ ka̱ndeé na̱ ñuu Babilonia ni̱ na̱kiʼin na̱ ñuu Judá, ta ni̱ ja̱naá na ñuu Jerusalén xíʼín veʼe nu̱ú ni̱ si̱kee káʼno na Jeová Ndio̱s. Ta na̱ ni̱ ka̱ku ni̱ tiin na na̱ néʼe na kuaʼa̱n na̱ ñuu Babilonia, ta ni̱ kachi Ndio̱s ña̱ ya̱ʼa uni̱ xiko uxi̱ kuia̱ já kuu nandióko̱o na ñuu mií ná. Ta ko̱ íin ka̱ kandoyi nuu̱ ñuu Judá íkáa nuu̱ ndijaá kuia̱ káa.

Ni iin ka̱ de̱ʼe ñání David o̱kúkuu ra rey nda̱ kivi̱ ná kusaa̱ Mesías, ta Rey ni̱ ka̱ndo̱o Ndio̱s tandaʼá sí kisi. Ta kuaʼá ka̱ ta̱ rey ta̱ ni̱ kisi tein na̱ veʼe David yóʼo, ni̱ naʼa̱ ra̱ xíʼín ña̱ ni̱ kee ra ña̱ ni iin na̱yivi o̱kúu kaneʼe va̱ʼa na chuun jáchi̱ na̱yivi kua̱chi kúú ná. Si̱va̱ʼa iin túʼún laá Mesías va kúú ta kuu kee ña̱yóʼo. Sa̱ʼá ña̱yóʼo diʼa ni̱ kachi Jeová Ndio̱s saʼa̱ Mesías: “Ta kaneʼe xi choon no̱ó na̱ veʼe Jacob, ta ni iin kuu̱ o̱ ndíʼi ña̱ [kaʼnda xi choon]” (Lucas 1:33).

(Ña̱yóʼo va̱sian nuu̱ 1 Reyes, 2 Reyes, capítulo 10 nda̱ 36 ña̱ 2 Crónicas xíʼín Jeremías 25:8-11.)