TÁ NI̱ nduu kua̱ʼá na̱yivi, ni̱ nduu kuaʼa̱ ka̱ ví ña̱ kini xíʼín kua̱chi nuu̱ Ñúʼu̱ yóʼo. Ta ni̱ si̱io iin ta̱ profetá Ndio̱s ni̱ si̱naní Enoc, ta ndá iin túʼún laá ta̱ yóʼo va ni̱ si̱ka̱chúun ndaa̱ nuu̱ Ndio̱s kivi̱ jaá, ta ta̱ yóʼo va kúú ta̱ ni̱ ka̱chúun Ndio̱s já ni̱ ka̱stu̱ʼun ra xíʼín na̱yivi ña̱ jánaá Jeová Ndio̱s nu̱ú na̱yivi kíni. Jo ko̱ íin mií vá ni̱ sinájo̱ʼo ña̱ ni̱ kaʼa̱n ra̱, ta víʼi ka̱ ví ni̱ ka̱sáʼá ná kée na ña̱ kini. Ta jaá ní ko̱ ní sinájo̱ʼo java ángel ña̱ ni̱ kaʼa̱n Jeová Ndio̱s, ni̱ ja̱ndákoan indiví, ni̱ nduuan tátu̱ʼun na̱yivi, ta ni nuuan ni̱ kisian nuu̱ ñúʼu̱ yóʼo já ni̱ ta̱ndáʼa̱ ñá xíʼín kuaʼá na̱ ñáʼa̱, xín ndijaá na̱ ni̱ kuni̱ mií váán. Ta sa̱ʼá ña̱ ni̱ kiji̱ na̱yóʼo xíʼín na̱ ñáʼa̱ ni̱ kaku de̱ʼe na ni̱ si̱kuu taa̱ chi̱náni̱ ta̱ to̱ndó ni̱ si̱naní nefilim, jáchi̱ ko̱ ní káva̱ʼa Ndio̱s na̱ ángel yóʼo ña̱ kuju̱ na̱ xíʼín na̱ ñáʼa̱, ta ta̱ yóʼo ni̱ kee ña̱ ni̱ nduu kini chááka̱ ví nuu̱ Ñúʼu̱ yóʼo. Ta nda̱ níma̱ ví Ndio̱s ni̱ ta̱iʼvi̱ siní si sa̱ʼá ña̱ kini ni̱ ka̱sáʼá na̱yivi kée na.

Tá ni̱ siʼi̱ Enóc, ni̱ si̱io inga̱ ta̱a va̱ʼa ni̱ si̱naní: Noé. Mií rá xíʼín na̱ veʼe ra ni̱ ndukúndeé ná ni̱ kee na ña̱ ni̱ saʼnda Ndio̱s nuu̱ ná. Tá ni̱ chi̱kaa̱ ini Ndio̱s jánaá si nu̱ú na̱yivi kíni xíʼín ti̱kui̱í kuaʼa̱, jo ko̱ ní kuni si ña̱ ná kivi Noé ni ndijaá nu̱u kíti. Sa̱ʼá ña̱yóʼo ni̱ kachi Ndio̱s xíʼín Noé ña̱ ná kava̱ʼa ra iin sa̱to chi̱káʼno iin arká. Ta ná ndi̱ʼvi mií rá xíʼín na̱ veʼe ra ini arká ta ná ndachiʼi ra ndijaá nu̱u kíti̱ ini tó. Ni̱ sinájo̱ʼo Noé ña̱ ni̱ kaʼa̱n Ndio̱s xíʼín rá, ta tein 40 á 50 ká kuia̱ ni̱ ka̱chúun ra ni̱ ka̱va̱ʼa ra arká. Jaá taʼni “sa̱ da̱náʼa̱ [ra̱] no̱ó ña̱yuu ña̱ kendísáʼano na” (2 Pedro 2:5). Ni̱ ka̱stu̱ʼun ra xíʼín na̱yivi ña̱ kuun Ti̱kui̱í kuaʼa̱ nuu̱ ñúʼu̱ yóʼo, jo ni iin na ko̱ ní kándísa ña̱ ni̱ kaʼa̱n ra̱. Tá ni̱ saa̱ kivi̱ ña̱ ki̱ʼvi Noé xíʼín na̱ veʼe ra ini arká ni̱ nda̱chiʼi ra ndijaá kíti ini to̱. Jaá ni̱ saji Ndio̱s yéʼé arká já ni̱ ka̱sáʼá kúun javi̱ xée̱n.

40 nduúví xíʼín 40 si̱kuaá ni̱ kuun ndeé javi̱ ta ni̱ na̱kutú iin níí kúú nuu̱ Ñúʼu̱ yóʼo xíʼín ti̱kui̱í. Ni̱ naá nuu̱ ndiʼi na̱yivi kíni. Tá ni̱ ya̱ʼa java ka̱ yoo̱ já ni̱ nuu ndaʼa cháá ti̱kui̱í já ni̱ na̱xino̱ arká xini̱ iin yúku̱. Saa̱ iin kuia̱ ví ni̱ ya̱ʼa já ni̱ kana Noé xíʼín na̱ veʼe ra ña̱ ni̱ si̱ñuʼu na ini arká. Ta jaá ni̱ jo̱ko ra iin kíti̱ nuu̱ Jeová Ndio̱s já ni̱ na̱ke̱ʼe ra ña̱ñúʼú nuu̱ sí ña̱ ni̱ ja̱káku ñaʼá sí. Ta ni̱ kachi Ndio̱s ña̱ o̱nándióko̱o ka̱ si jánaá si nditáʼa̱n ña̱ takú nuu̱ Ñúʼu̱ yóʼo xíʼín ti̱kui̱í kuaʼa̱. Ta xíʼín iin chi̱yánguí ni̱ naʼa̱ Jeová Ndio̱s nu̱ú na̱yivi ña̱ ni̱ ka̱ndo̱o si xíʼín ná. Ndijaá kivi̱ ña̱ ná kuni na ña̱yóʼo, jaá kía̱n naku̱ʼun ini na̱ ña̱ ni̱ ka̱ndo̱o Ndio̱s kee si sa̱ʼá na̱yivi.

Tá ni̱ ndiʼi ña̱ ni̱ kuun Ti̱kui̱í kuaʼa̱, já ni̱ saʼnda Ndio̱s java ka̱ chuun nuu̱ Noé xíʼín na̱ veʼe ra. Ni̱ kachi Ndio̱s xíʼín ná ña̱ kuu va kasí ná ku̱ñu kíti̱ jo ko̱ kánian kasí ná nii̱ ri̱. Jaá ní ni̱ saʼnda Ndio̱s chuun ña̱ ná naku̱ita̱nuu na̱yivi nu̱u iin níí kúú nuu̱ Ñúʼu̱ yóʼo. Jo kuaʼa̱ ná ko̱ ní xíin na kunijo̱ʼo na ña̱ ni̱ saʼnda Ndio̱s, ta ni̱ ndatútú ná ni̱ ku̱sáʼá ná káchúun na nuu̱ iin ta̱ naní Nemrod, ta ni̱ ku̱sáʼá ná káva̱ʼa na iin veʼe totó táʼan nuu̱ iin ñuu ni̱ si̱naní Babel. Jo ko̱ ní si̱ʼa Ndio̱s íchi̱ ña̱ kee na tátu̱ʼun ni̱ kaʼán ná. ¿Ndixi ni̱ kee si? Ni̱ na̱jaka si tu̱ʼun káʼa̱n na̱ —ñuu ni si̱naní Babel ña̱ chááka̱ chínuu̱ ni̱ si̱naní Babilonia— ta ni̱ ja̱ndúu kuaʼa̱ sí yúʼu̱ káʼa̱n na̱. Tá ko̱ ní kúu ka̱ kandaa̱ ini na̱ ndíki̱án káʼa̱n iin tá iin na, ta ko̱ ní kúu ka̱ kava̱ʼa na veʼe íkáa, jaá kía̱n ni̱ xita̱núu na kuaʼa̱n na̱.

(Ña̱yóʼo va̱sian nuu̱ tutu Génesis capítulo 6 nda̱ 11 xíʼín Judas 14, 15.)