TÁ KIVI̱ ni̱ si̱ndoyi ta̱ rey nuu̱ ñuu Israel xíʼín ñuu Judá jaá ni̱ si̱ndoyi: Na̱ profetá. Ni̱ si̱io ndeé ndiva̱ʼo ini ndijaá na̱yóʼo ta ni̱ ka̱ndeé ndiva̱ʼo ini na Ndio̱s já ni̱ kuu ni̱ ka̱stu̱ʼun na ña̱ ni̱ kaʼa̱n si. Ná kande̱ʼé yó kumi̱ sa̱ʼá ña̱ ni̱ kaʼa̱n na̱:

1. Ña̱ naá nuu̱ ñuu Jerusalén. Tá yachi̱ nda̱ tá tu̱ñáʼa̱ koo ña̱yóʼo, si̱ ni̱ kaʼa̱n va na̱ profetá Ndio̱s —na̱ ni̱ si̱naní Isaías xíʼín Jeremías— ña̱ naá nuu̱ ñuu Jerusalén ta ko̱ íin ka̱ kandoyi nu̱án. Jaá ní kásí ni̱ kaʼa̱n na̱yóʼo ndiva̱ʼa ni̱ ja̱kúijo̱ na̱ ñuu yóʼo ini Ndio̱s. Va̱árá ni̱ si̱kachi na̱ ñuu Jerusalén ña̱ sínokuáchí na nuu̱ Ndio̱s, jo xíʼín ña̱ ni̱ si̱kee na ni̱ naʼa̱ na̱ ña̱ o̱ju̱ú jaá ní sí kian, jáchi̱ toʼó va ni̱ si̱keekáʼno na, ni̱ si̱kee na ña̱ kini ta na̱ to̱ndó ndiva̱ʼo ni̱ si̱kuu na (2 Reyes 21:10-15; Isaías 3:1-8, 16-26; Jeremías 2:1–3:13).

2. Nandióko̱o tuku na kandañu̱ʼu na Ndio̱s ndaa̱ ndisa. Tá ná si̱no na̱ ñuu Ndio̱s 70 kuia̱ nuu̱ ñuu Babilonia, jaá kía̱n nandióko̱o na nuʼu̱ na̱ ñuu mií ná já ndajava̱ʼa na veʼe nu̱ú ni̱ si̱keekáʼno na Ndio̱s nuu̱ ñuu Jerusalén, ta nandióko̱o tuku na kandañu̱ʼu na Ndio̱s ndaa̱ ndisa (Jeremías 46:27; Amós 9:13-15). Tátu̱ʼun uvi̱ cientó ká kuia̱ tá kúmani̱ koo ña̱yóʼo, sa̱ ni̱ kachi va Isaías ña̱ kandeé iin ta̱ naní Ciró ki̱ʼvi ra ñuu Babilonia ta jáka̱ku ra na̱ ñuu Ndio̱s, ta jaá ní ni̱ kaʼa̱n ra̱ ndixi kee ta̱ yóʼo ki̱ʼvi ra ñuu yóʼo (Isaías 44:24–45:3).

3. Tá ná kasaa̱ Mesías, ta ndijaá ña̱ ndoʼo ra. Nuu̱ iin ñuu naní Belén kaku Mesías (Miqueas 5:2). Ndaʼví koo ini ta̱ yóʼo, ta sata̱ iin vúrro lóʼo̱ va kanúu ta̱ yóʼo ki̱ʼvi ra ñuu Jerusalén (Zacarías 9:9). Ta va̱árá kuni̱ ndiva̱ʼo ra na̱yivi ta kiʼvi̱ ndiva̱ʼo ini ra na̱, jo kuaʼa̱ ná kande̱ʼé núu na ra̱ (Isaías 42:1-3; 53:1, 3). Ta ndaʼví ndiva̱ʼo ndoʼo ra jaá kivi ra. ¿Á kúni̱ kachi ña̱yóʼo ña̱ iin ndée̱ vá ndiʼi nuu̱ Mesías? Ko̱ó, jáchi̱ sa̱ʼá ña̱ kivi ra kandeé rá ña̱ koo káʼno ini Ndio̱s sa̱ʼá kua̱chi ndijaá táʼa̱n na̱yivi nuu̱ ñuyíví yóʼo, ta kanian nataku ra já kuu koo ña̱yóʼo (Isaías 53:4, 5, 9-12).

4. Tá ná kaʼnda Mesías chuun nuu̱ Ñúʼu̱ yóʼo. O̱kúu mií váán kaneʼe va̱ʼa na̱yivi chuun jáchi̱ na̱yivi kua̱chi kúú ná, jo Mesías yóʼo kuu va kaneʼe va̱ʼa ra chuun. Jáchi̱ ta̱ yóʼo saa̱ ra̱ kananí rá Ta̱ néʼe chuun ta̱ Jándíʼi nu̱ú tu̱ndóʼó (Isaías 9:6, 7; Jeremías 10:23). Tá ná kaʼnda ta̱ yóʼo chuun nuu̱ Ñúʼu̱ yóʼo, vií kandoyi na̱yivi nuu̱ iníí kúú ñuyíví yóʼo, ta ñúchí kandoyi na xíʼín ndijaá táʼa̱n kíti̱ (Isaías 11:3-7). Ndiʼi nuu̱ ndijaá táʼa̱n kueʼe̱ (Isaías 33:24). Ta ko̱ íin ka̱ na kivi, ndijaá ña̱yóʼo kukuan ña̱ ni̱ si̱io chí sata̱ (Isaías 25:8). Jáchi̱ tá ná kaʼnda Mesías yóʼo chuun nataku millón na̱yivi na̱ ni̱ siʼi̱ (Daniel 12:13).

(Ña̱yóʼo va̱sian nuu̱ tutu Isaías, Jeremías, Daniel, Amós, Miqueas xíʼín Zacarías.)