TEIN iin mil kuia̱ ni̱ na̱taa na yaa ii̱ ña̱ va̱si nuu̱ tutu káʼno chááka̱ va̱si nu̱ú Tu̱ʼun Ndio̱s. Ndijaá ta̱ ni̱ taa tutu yóʼo ñúchí ni̱ na̱kani ra ña̱ ni̱ ka̱ndeé ndiva̱ʼo ini ra Ndio̱s. Jaá ní ni̱ na̱taa ra saʼa̱ ndijaá ña̱ ni̱ ndoʼo ra, ni̱ na̱kani ra ña̱ ni̱ ku̱jii̱ ini ra, ña̱ ni̱ ndoʼo ini ra, ña̱ ni̱ na̱ndióko̱o ini ra, ta ni̱ na̱ke̱ʼe ra ndivéʼe nuu̱ Ndio̱s, ta ni̱ keekáʼno ra si. Ndijaá ta̱ ni̱ taa tutu Salmos yóʼo ni̱ si̱kúni̱ ra̱ Ndio̱s, ta va̱ʼa ndiva̱ʼo ni̱ si̱neʼe táʼan ra xíʼín sí. Ná kande̱ʼé yó ndí ku̱ú ña̱ káʼa̱n ña̱ va̱si nuu̱ tutu Salmos yóʼo.

Jeová Ndio̱s kúú Ta ndaa̱ ndisa káʼno chááka̱ nuu̱ ñuyíví yóʼo, ña̱káa kánian keekáʼno yó ta kandaño̱ʼo yó si. Nuu̱ Salmo 83:18 kachía̱n: “Miíní naní Jeová, iin túʼún láá miíní kúú ta káʼno chááka̱ nuu̱ iníí kúú ñuyíví”. Kuaʼa̱ Salmo yóʼo kée káʼnoan Jeová Ndio̱s sa̱ʼá ña̱ ni̱ ka̱va̱ʼa si indiví, ña̱ ni̱ ka̱va̱ʼa si ti̱ñuu̱,ña̱ ni̱ ka̱va̱ʼa si ndiʼi ña̱ ta̱kú ió nuu̱ ñúʼu̱ yóʼo, ta ña̱ va̱ʼa ndiva̱ʼo ni̱ ka̱va̱ʼa si mií yó (Salmos 8, 19, 139 xíʼín 148). Kuaʼa̱ Salmos yóʼo kéekáʼnoan Jeová Ndio̱s jáchi̱ chíndeé sí ta jáka̱ku si na̱ káchúun ndaa̱ nuu̱ sí (Salmos 18, 97 xíʼín 138). Ta java ka̱ Salmos yóʼo kéekáʼnoan Ndio̱s jáchi̱ kée ndaa̱ si chuun ta chíndeé sí na̱yivi ndóʼo ini, jo ko̱ síio káʼno ini si sa̱ʼá na̱yivi na̱ kée ña̱ kini (Salmos 11, 68 xíʼín 146).

Síʼa Jeová Ndio̱s to̱ndeé ini nu̱ú na̱ kúni̱ ñaʼá ta chíndeé sí na̱. Salmo ña̱ síni̱ chááka̱ na̱yivi kúú Salmo 23 yóʼo kúú nu̱ú káʼa̱n David ña̱ tátu̱ʼun kée iin ta̱ ndáka ndikachi, ndaá ra̱ rí jáchi̱ kúni̱ ra̱ rí ki̱ʼa jaá ió ini Jeová Ndio̱s xíʼín na̱yivi. Nuu̱ Salmo 65:2 kachía̱n ña̱ Jeová Ndio̱s kúú ta “Sinajo̱ʼo tá síka̱taʼvi̱ yó nuu̱ sí”. Nda̱ na̱yivi ni̱ si̱kee ña̱ kini ndiva̱ʼo níʼi̱ ná to̱ndeé ini nuu̱ Salmo 39 xíʼín 51. Nuu̱ Salmo yóʼo kúú nu̱ú ni̱ kaʼa̱n David ña̱ míía̱n ndaa̱ ndisa ni̱ na̱ndióko̱o ini ra sa̱ʼá kua̱chi kini ni̱ kee ra, ta ni̱ ka̱ndeé ndisa ini ra ña̱ koo káʼno ini Ndio̱s saʼa̱ rá. Ta nuu̱ Salmo 55:22 kachía̱n ña̱ ná kandeé ini yó Jeová ta ná ki̱ʼa yó íchi̱ ña̱ ná chindeé si yó.

Tá ná kaʼnda Mesías chuun nuu̱ Ñúʼu̱ yóʼo jaá kía̱n jándúu sa̱á Jeová Ndio̱s ñuyíví yóʼo. Nuu̱ Salmos yóʼo va̱si kua̱ʼá tu̱ʼun ña̱ káʼa̱n saʼa̱ Mesías, Rey ni̱ ka̱ndo̱o Ndio̱s tandaʼá sí kisi. Ta nuu̱ Salmo 2 kachía̱n ña̱ jánaá ta yóʼo nuu̱ ndijaá java ka̱ ñuu ña̱ ko̱ kúni̱ kundiko̱ chuun saʼndá si. Ta Salmo 72 kachía̱n ña̱ jándíʼi Rey yóʼo nu̱ú jo̱ko, ta ña̱ ndóʼo ini na̱yivi. Tátu̱ʼun kachí Salmo 46:9, Gobiernó Mesías kúú ña̱ kachúun Ndio̱s já jándíʼi si nu̱ú na̱ saʼní táʼan, ta jándíʼi si nditáʼa̱n ña̱ káchúun na naá na̱. Ta nuu̱ Salmo 37 kachía̱n ña̱ o̱kándoyi ka̱ na̱yivi kíni nuu̱ Ñúʼu̱ yóʼo jáchi̱ ndijaá táʼa̱n na̱yivi kaneʼe táʼan va̱ʼa na ta ndinuʼu na̱yivi va̱ʼa va kandoyi vií yóʼo ndijaá táʼa̱n kivi̱.

(Ña̱yóʼo va̱sian nuu̱ tutu Salmos.)